མི་ཚེའི་རེ་བ།

ཆུ་ཁ་དང་ཐིམ་ཕུག་ལུང་ཕྱོགས་ཀྱི་བར་ན་ གཡུས་སྐྱབས་ཁྱ་ལས་སྐྱེས་ལོ་༧༧ལང་མི་ཉིམ་རྡོ་རྗེ་འདི་ སྲུང་གཏང་ནི་དང་ དང་ཕུའི་ལོ་རྒྱུས་སླབ་ནི་ལུ་དང་འདོད་སྦོམ་ཡོད་མི་ཅིག་ཨིན་པས། ཁོ་གི་ཨ་པ་འདི་ག་ཅི་ར་འབད་དགོ་རུང་ངར་ངེས་ཡོད་པའི་ཁར་ ག་གིས་ཡང་མ་འབད་མི་ཅིག་འབད་ནིའི་རེ་བ་བསྐྱེད་མི་ཅིག་འབད་ནི་འདི་གིས་ སྐྱབས་ཁྱ་ལུ་ཆུ་རག་བཙུགས་ཏེ་མི་ཚེ་སྐྱོང་སྟེ་སྡོད་པའི་སྐབས་ ཧེ་མ་གི་གནསམོ་ལས་བུ་༤ཡོད་རུང་  དེ་བསྒང་ཁོའི་ཨའི་ཡང་ཕྱེ་ཐག་པར་སོང་སྟེ་ འབྲེལ་བ་མང་སུ་འཐབ་པའི་ཤུལ་ གཉེན་གྲོགས་བསྡོམས་ཏེ་ཉིམ་ཚེ་རིང་སྐྱེས་ནུག

ཁོ་སྐྱེས་ལོ་༡༣གཞོན་ཅུང་སྦེ་སྡོད་པའི་བསྒང་ལས་ར་ རྒྱལ་གཞུང་བསྟན་སྲུང་དམག་སྡེ་ནང་འཛུལ་ཏེ་ ལོ་ངོ་༩ཕྱག་ཞུ་བའི་སྐབས་  འགོ་པ་གི་གོ་གནས་ཐོབ་ཡོད་རུང་ བཟའ་ཚང་གི་སྟབས་མ་བདེཝ་ཅིག་ལས་བརྟེན་ དམག་ནང་ལས་དགོངསམ་ཞུ་སྟེ་ གཡུས་ཁར་སོ་ནམ་གྱི་ལཱ་འབད་སྦེ་སྡོད་ནུག ཁོ་དགོད་བྲ་ཆེ་དྲགས་ཡོད་ནི་འདི་གིས་ མང་ཤོས་ཀྱིས་ར་ངོ་ཤེས་དོ་ཡོདཔ་ཨིན་པས།

ད་རིས་ནངས་པ་ཐིམ་ཕུག་ལུ་ ཁོ་རའི་བུ་དང་མཉམ་གཅིག་སྡོད་དོ་ཡོདཔ་ད་ ཁྱིམ་ནང་སྡོདཔ་ད་ལོས་ ཐ་ན་ཕར་ཚུར་འགྱོཝ་ད་ཡང་ གནས་ཚུལ་དང་ཞབས་ཁྲ་ཉན་ནིའི་དོན་ལུ་ གླུ་སྒྲོམ་ཅིག་ཞོར་འདྲིས་རྐྱབ་སྟེ་སྡོད་མི་ཅིག་ཨིན་པས། ཉན་མི་གིས་ཁོམ་པ་ཅིན་ ཁོ་གིས་ལོ་རྒྱུས་སླབ་ནི་ལུ་ཉམས་འཚེར་དང་རྫོགས་ནི་མེད་མི་དེ་ཡང་ དང་ཕུའི་ལོ་རྒྱུས་དང་ འདིའི་ནང་ལས་ བླམ་འབྲུག་པ་ཀུན་ལེགས་ཀྱི་རྣམ་ཐར། ཨཔ་ཝང་འབྲུག་རྒྱས་ཀྱི་གཏམ། རང་བྱོན་ཁརྶ་པ་ནེའི་བྱུང་རབས་ཚུ་གི་སྐོར་ལས་ ཧེ་མ་ལས་བཟུང་བཞག་བཞགཔ་འགྲོས་བཟུམ་སྦེ་ ཡ་མཚན་ཆེ་ཏོག་ཏོ་དང་ ཧ་ལས་སི་སི་སྦེ་བཤད་པ་རྐྱབ་ད་ ཉན་དགོ་མནོ་སི་སི་ཡོད་མི་དེ་ཡང་ བློ་གི་གོ་རིམ་དང་འཁྲིལ་ཏེ་ གདོང་གི་དགའ་མཛུམ་ ལག་པའི་ཕྱག་རྒྱ་དང་ གཟུགས་ཀྱི་རྣམ་འགྱུར་ཚུ་དཔེ་དོན་འདྲེས་ཏོག་ཏོ་སྦེ་སྟོན་ནི་ཡོད་ནི་འདི་གིས་ཨིན་པས།