མ་རངས་པའི་ཚིག།

 

རྡོ་ཨིན་ཀྲག་ཀྲ་དང་། །ལྕགས་ཨིན་སིང་སིང་།།

ཨིན་ན་མེན་ན་བལྟཝ་ད་ཤེས། །རྡོ་རྗེ་གྲོ་ལོད་འཆམ་དང་ཤེས། །

བྱིན་གེ་ཟེར་བ་དགའ་མི་དགོ། ཕྱད་གེ་ཟེར་བ་འདྲོག་མི་དགོ།

མི་ངན་གྱིས་གཡུས་དཀྲུགས། །བྱ་ངན་གྱིས་གདངས་དཀྲུགས།།

ཁ་ལམ་ཆུང་རུང་མེ་ཏོག །དུང་ཤིང་སྦོམ་རུང་ཁོང་སྟོང་།།

ཁྱི་དང་བུད་མེད་ཨོ་རོག་གསུམ། །སྦྱིན་པ་བཏང་པའི་ཡུལ་ཡིན།།

དགྲ་ཆུང་དུས་ལས་བཏུལ། །མེ་ཆུང་དུས་ལས་བསད།།

གཟུགས་རང་གིས་སྦོམ་རུང་། །དྲནམ་རོགས་ཀྱིས་བཙུགས།།

སྤར་བ་སྤར་སའི་ས་མེད། །སྤར་པའི་སློབ་དཔོན་གཡས་ལས་མས།།

རྩིས་བ་རྩིས་སའི་ས་མེད། །རྩིས་པའི་སློབ་དཔོན་གཡོན་ལས་མས།།

ཆུ་མེད་པའི་ཟམ་རྐྱབ། །ཁག་མེད་པའི་འགན་འབག།

མི་ལུ་བཀལ་བའི་ངོ་ཚ། །རྟ་ལུ་བཀལ་བའི་ཁུར་ཆ།།

ཞནམ་མཐོངན་བཀོལ་དགོ་མནོ། །དྲགཔ་མཐོངན་བྱིན་དགོ་མནོ།།

སེམས་ཅན་སྟག་གི་རི་མོ་ཕྱི་ལས། །མགུ་ནག་མིའི་རི་མོ་ནང་ལས།།

ཁེ་རྒོ་གླངམོ་ཆེ་ལུ་ཡོད་རུང་། །ཡར་ཕོམ་ཀི་ཤི་གིས་ཡང་རྐྱབ་ཨིན།།

ཞནམ་མཐོ་སར་བཀལན།། ཆུ་ཡང་བྱེ་གིས་འཇལ།།

མདའ་རྐྱབ་ལུགས་མི་གཙོ་གཏད་ལུ་གཙོ།། བློ་སླབ་ལུགས་མི་གཙོ་ཉན་ལུགས་གཙོ།།

ཁུར་ཆ་གཡག་གིས་འབག། སྐད་འབྱོགཔ་གིས་རྐྱབ།།

ཀོཝ་ཉི་མའི་དྲོད་དང་བསྟུན་འཕུར།། ཐགམ་ཉི་མའི་དྲོད་དང་བསྟུན་བརྡལ།།