གཉེན་གྱི་ཁམས་འཕྲོད་ནང་ལས་ ཕོ་མོ་གཉིས་པོའི་སྤར་ཁ་དང་ སྨེ་བའི་མཐུན་ལམ་ཡོད་མེད་བརྟག་པ་ལས། དང་པོ་སྤར་ཁའི་མཐུན་སྦྱོར་བརྟག་པ་ནི།
བཟའ༌ཚང་གཉིས་པོའི་སྤར་ཁ་ ལི་མེ་དང་ཁམ་ཆུ་ ཁེན་གནམ་དང་ཁོན་ས་ དྭ་ལྕགས་དང་གིན་རི་ ཟོན་རླུང་དང་ཟིན་ཤིང་ཚུ་ཕོག་པ་ཅིན་ བཟང་པོ་བཞིའི་ནང་ལས་ གནམ་སྨན་ཕོགཔ་ལས་ལེགས་ཤོམ་ཨིན།
༡༽ དེ་ལས་སྤར་ཁ་ ཟིན་ཤིང་དང་ལི་མེ་ ཟོན་རླུང་དང་ཁམ་ཆུ་ ཁེན་གནམ་དང་དྭ་ལྕགས་ ཁོན་ས་དང་གིན་རི་ ཚུ་ཕོག་པ་ཅིན་བཟང་པོ་བཞིའི་ནང་ལས་ སྲོག་འཚོ་ཕོགཔ་ལས་ལེགས་ཤོམ་ཨིན།
༢༽ དེ་ལས་སྤར་ཁ་ ཟོན་རླུང་དང་ལི་མེ་ ཁོན་ས་དང་དྭ་ལྕགས་ གིན་རི་དང་ཁེན་གནམ་ ཁམ་ཆུ་དང་ཟིན་ཤིང་ ཚུ་ཕོག་པ་ཅིན་བཟང་པོ་བཞིའི་ནང་ལས་ དཔལ་བསྐྱེད་ཕོགཔ་ལས་ལེགས་ཤོམ་ཨིན།
༣༽ དེ་ལས་ཕོ་མོ་གཉིས་པོའི་སྤར་ཁ་ནང་འཕྲད་ཕོག་པ་ཅིན་ བཟང་པོ་བཞིའི་ནང་ལས་ཕྱྭ་ལོན་ཕོགཔ་ལས་བཟང་ཤོས་ཨིན།
༤ དེ་ལས་སྤར་ཁ། ལི་མེ་དང་དྭ་ལྕགས་ ཁོན་ས་དང་ཟོན་རླུང་ གིན་རི་དང་ཁམ་ཆུ་ ཁེན་གནམ་དང་ཟིན་ཤིང་ཚུ་ ངན་པ་བཞིའི་ནང་ལས་འདྲེ་ལྔ་ཕོགཔ་ལས་ དེ་གི་བཟློག་ཐབས་འབད་དགོཔ་ཚུ་ཡང་ རེ་རེ་བཞིན་དུ་རྩ་བ་ནང་ལས། ལི་དྭ་གྲྭ་ལྔ་ནོར་རྒྱུན་བཀླག །ཁོན་ཟོན་གྲྭ་ལྔ་ཚེ་མདོ་བསྒྲགས། །གིན་ཁམ་གཤིན་རྗེའི་བཟློག་པ་དང་། །དགྲ་སྲི་མནན་པ་མར་མེ་འབུལ། །ཁེན་ཟིན་མདོ་སྡེ་བསྐལ་བཟང་དང་། །སྟོབས་པོ་ཆེ་འདོན་སཱ་ཙྪ་འདེབས། །
༥༽ དེ་ལས་སྤར་ཁ། ལི་མེ་དང་ཁེན་གནམ་ དྭ་ལྕགས་དང་ཟིན་ཤིང་ ཁོན་ས་དང་ཁམ་ཆུ་ གིན་རི་དང་ཟོན་རླུང་ཚུ་ ངན་པ་བཞིའི་ནང་ལས་བདུད་གཅོད་ཕོགཔ་ལས་ དེ་གི་བཟློག་ཐབས་འབད་དགོཔ་ཚུ་ཡང་རེ་རེ་བཞིན་དུ་རྩ་བ་ནང་ལས། ལི་ཁེན་བདུད་བཟློག་དམ་སྲིད་དཀར། །དྭ་ཟིན་མཚན་བརྗོད་སྡོང་བརྒྱན་འདོན། །ཁོན་ཁམ་ཏོག་གཟུངས་སྤྱི་མདོས་བྱ། །གིན་ཟོན་ཕལ་ཆེན་ཏོག་གཟུངས་བཀླག །གནམ་ཁྱི་ནག་པོའི་མདོས་ཀྱང་བྱ།།
༦༽ དེ་ལས་སྤར་ཁ། ལི་མེ་དང་ཁོན་ས་ དྭ་ལྕགས་དང་ཟིན་ཤིང་ ཁེན་གནམ་དང་ཁམ་ཆུ་ གིན་རི་དང་ཟོན་རླུང་ཚུ་ ངན་པ་བཞིའི་ནང་ལས་ལུས་ཆད་ཕོགཔ་ལས་ དེ་གི་བཟློག་ཐབས་འབད་དགོཔ་ཚུ་ཡང་རེ་རེ་བཞིན་དུ་རྩ་བ་ནང་ལས། ལུས་ཆད་ལི་ཁོན་ཤེར་ཕྱིན་བཀློག །དྭ་ཟིན་ས་བདག་གཏེར་མདོས་དང་། །ཚེ་ཆོག་ལེན་མེད་སྟོན་མོ་གཏོང་། །གིན་ཟོན་བསྐོར་བའི་ཕན་ཡོན་འདོན། །ཁེན་ཁམ་དགྲ་བཟློག་དགྲ་སྲི་མནན།།
༧༽ དེ་ལས་སྤར་ཁ། ལི་མེ་དང་གིན་རི་ ཟོན་རླུང་དང་ཁེན་གནམ་ དྭ་ལྕགས་དང་ཁམ་ཆུ་ ་ཟིན་ཤིང་དང་ཁོན་ས་ཚུ་ ངན་པ་བཞིའི་ནང་ལས་གནོད་པ་ཕོགཔ་ལས་ དེ་གི་བཟློག་ཐབས་འབད་དགོཔ་ཚུ་ཡང་རེ་རེ་བཞིན་དུ་རྩ་བ་ནང་ལས། གནོད་པ་ཞེས་བྱ་ལི་གིན་གཉིས། །ལེན་མེད་སྟོན་མོ་ནོར་གཡང་ལེན། །ཁོན་ཟོན་གྲྭ་ཏོག་ཕལ་ཆེན་བཀླག །དྭ་ཁམ་བྱེ་བྲལ་གཏོ་བཅོས་དང་། །འཕགས་པ་དཀོན་མཆོག་བརྩེགས་པ་བསྒྲགས།།
གཉིས་པ་སྨེ་བའི་མཐུན་ལམ་ཡོད་མེད་བརྟག་པ་ནི།
ཕོ་མོ་གཉིས་པོའི་སྐྱེས་སྨེ་༩༡ ༢༦ ༧༨ ༣༤ ཚུ་གཅིག་ཁར་ཕོག་པ་ཅིན་གནམ་སྨན་ཕོགཔ་ལས་བཟངམ་ཨིན། སྨེ་བ་ ༩༣ ༢༨ ༧༦ ༤༡ ཚུ་གཅིག་ཁར་ཕོག་པ་ཅིན་སྲོག་འཚོ་ཕོགཔ་ལས་བཟངམ་ཨིན། སྨེ་བ་ ༩༤ ༧༢ ༦༨ ༣༡ ཚུ་ གཅིག་ཁར་ཕོག་པ་ཅིན་དཔལ་བསྐྱེད་ཕོགཔ་ལས་བཟངམ་ཨིན། སྨེ་བ་༩༩ ༨༨ ༧༧ ༦༦ ཚུ་ གཅིག་ཁར་ཕོག་པ་ཅིན་ཕྱྭ་ལོན་ཕོགཔ་ལས་བཟངམ་ཨིན།
སྨེ་བ་འ་ནི་འདི་ཚུ་དང་ཅིག་ཁར་ཕོག་མི་བཟའ་ཚང་ཚུ་ མི་ཚེ་ནང་ལུ་རང་གི་མནོ་དོན་ཚུ་ལེགས་ཤོམ་སྦེ་འགྲུབ་ཚུགསཔ་མ་ཚད་ རྒྱུ་ནོར་ལོངས་སྤྱོད་ཚུ་ཡང་ངམ་ངམ་ཤུགས་ཀྱིས་སྦེ་གོང་ནས་གོང་དུ་འཕེལ་ནི་ཨིན་པས། དེ་ལས་རང་གི་བུ་གཞི་ཚུ་ཡང་ན་ཚ་དང་ཤི་རྐྱེན་ཚུ་ མེད་པའི་ཁར་གཉེན་འདི་ཡང་བརྟན་ཏོག་ཏོ་འོང་ནི་ཨིན་པས། དེ་ལས་སྨེ་བ་༡༡ ༢༢ ༣༣ ༤༤ ཕོག་མི་ཚུ་བཟང་ངན་འབྲིང་སྦེ་འཐོནམ་ཨིན་པས། ག་དེམ་ཅི་སྦེ་སྨེ་བ་འ་ནི་ཕོག་ཚུ་གཉེན་རྐྱབ་ཡ་སོང་པ་ཅིན་ དེ་གི་བཟློག་ཐབས་ཚུ་ཡང་ སྲི་བཟློག་བསགས་ནི་དང་ ཕྱྭ་འགུགས་ཚུ་རྐྱབ་དགོཔ་ཨིན་པས། དེ་ལས་ སྨེ་བ་༩༨ ༤༦ ༧༡ ༢༣ ཚུ་ངན་པ་བཞིའི་ནང་ལས་གནོད་པ་ཕོགཔ་ལས་འབྲིང་སྦེ་བཤདཔ་ཨིན་པས། དེ་གི་བཟློག་ཐབས་འབད་དགོཔ་ཚུ་ཡང་ ཕྱྭ་འགུགས་རྐྱབ་ནི་དང་ ལྷ་མོ་ནོར་རྒྱུན་མ་དང་ གདུགས་དཀར་ཚུ་ལྷག་དགོཔ་ཨིན་པས།
དེ་ལས་ སྨེ་བ་༩༧ ༦༣ ༨༡ ༢༤ ཚུ་ངན་པ་བཞིའི་ནང་ལས་འདྲེ་ལྔ་ཕོགཔ་ལས་ངནམ་སྦེ་བཤདཔ་ཨིན་པས། དེ་གི་བཟློག་ཐབས་འབད་དགོཔ་ཚུ་ཡང་ འབུམ་ཆུང་སྡེ་ལྔ་དང་ ལྕགས་མཆུ་ ཚུ་ག་དེ་མང་མང་ལྷག་དགོཔ་ མ་ཚད་ལོ་ལྟར་བཞིན་ དཀར་མེ་སྟོང་མཆོད་ཚར་རེ་ཕུལ་དགོཔ་ཨིན་པས།
དེ་ལས་ སྨེ་བ་༩༦ ༢༡ ༣༧ ༨༤ ཚུ་ངན་པ་བཞིའི་ནང་ལས་ བདུད་གཅོད་ཟེར་མི་འདི་ཕོགཔ་ལས་ངནམ་སྦེ་བཤདཔ་ཨིན་པས། དེ་གི་བཟློག་ཐབས་འབད་དགོཔ་ཚུ་ཡང་ རྒྱ་ཆེར་རོལ་པའི་མདོ་ལྷག་ནི་དང་ སྲི་བཟློག་བསག་དགོ་ ཚྭ་ཚྭ་བཏབ་ནི་ བདུད་མདོས་དང་མི་ཁ་དགྲ་བཟློག་བཏང་དགོཔ་ཨིན་པས། དེ་ལས་ སྨེ་བ་༩༢ ༧༤ ༦༡ ༨༣ ཚུ་ངན་པ་བཞིའི་ནང་ལས་ ལུས་ཆད་ཕོགཔ་ལས་ངནམ་སྦེ་བཤདཔ་ཨིན་པས། དེ་གི་བཟློག་ཐབས་འབད་དགོཔ་ཚུ་ཡང་ མདོ་མང་ལྷག་ནི་དང་ སྲི་ཟློག་བསག་ནི་ རྒྱལ་མདོས་བཏང་ནི་ ཡར་དཀོན་མཆོག་ལུ་མཆོད་པ་དང་ ངན་སློང་ལུ་སྦྱིན་པ་ཚུ་ག་དེ་དྲག་དྲག་བརྩོན་དགོཔ་ ཨིན་པས། གོང་གི་བཟློག་ཐབས་འབད་དགོཔ་ཚུ་ཡང་ ལོ་རེ་ལུ་ཚར་རེ་འབད་ཚུགས་པ་ཅིན་ལེགས་ཤོམ་འོང་ནི་ཨིན་པས། གོང་གི་སྤར་སྨེའི་མཐུན་སྦྱོར་བརྟག་ཐབས་འདི་ རྩིས་གཞུང་བག་རྩིས་ནམ་མཁའི་འགྲེལ་པ་ནང་ལས་བཏོན་ཏེ་བྲིས་པ་དགེ་ལེགས་འཕེལ།
ཞིབ་འཚོལ་དང་རྩོམ་སྒྲིགཔ་ སྤ༌རོ༌ཤེས༌རིག༌མཐོ༌རིམ༌སློབ༌གྲྭའི༌ལེགས༌སྦྱར༌བ༌ སློབ་དཔོན༌རིན་ཆེན་དབང་འདུས།
མ་གཞི་བག་རྩིས་ཞིབ་འཚོལ་དང་རྩོམ་སྒྲིགཔ་ སློབ་དཔོན་རིན་ཆེན་དབང་འདུས་ཨིན་རུང་ ཚོང་འབྲེལ་དང་ཁེ་སང་གི་དོན་ལུ་མེནམ་མ་ཚད་ ཤོ་མཉམ་ལུ་ཕན་ཐོགས་འབྱུང་ཚུགས་ནི་ཨིན་པས་ཟེར་མནོ་སྟེ་ ངེའི་ཡོངས་འབྲེལ་ནང་བཙུགས་ཏེ་ དར་ཁྱབ་གཏང་མི་ལུ་ དགོངས་ཁྲེལ་མི་འོང་ཟེར་བའི་རེ་བ་ཡོད་ཟེར་ཞུ་ནི་ཨིན།
དང་ཕུའི་ལུགས་སྲོལ། ད་རེས་ཀྱི་ལོ་རྒྱུས། 