མི་མང་ཤོས་ཀྱིས་ རང་ཤ་ཟ་དགོ་མནོ་སྟེ་ གཞན་ལུ་ཤ་འ་ནེ་ཅིག་འབག་ཤོག་ཟེར་ མཁོ་མངགས་འབད་མི་དེ་ལུ་ ཤ་ཟ་བའི་ཉེས་པ་རྐྱངམ་གཅིག་མ་གཏོགས་ སྲོག་གཅོད་ཀྱི་རྣམ་སྨིན་མྱོང་མི་དགོ་པའི་མནོ་བསམ་བཏང་མི་དེ་འཛོལ་བ་ཨིན་པས། གཞན་ལུ་རྒྱུད་སྐུལ་འབད་བའི་སྲོག་གཅོད་ཀྱི་ལས་འདི་ རང་གིས་ར་མྱོང་དགོཔ་མ་ཚད་ གཞན་ལུ་གསད་བཅུག་མི་དེ་ སྡིག་པའི་ལས་བགོ་བཤའ་རྐྱབ་སྟེ་ སྡུག་བསྔལ་མྱོང་དགོཔ་ཨིན་པས།
དེ་མ་ཚད་སྤྱིར་བཏང་ཤའི་ཆེད་དུ་ སེམས་ཅན་སྲོག་བཅད་མི་འདི་བ་ ཤ་ཟ་མི་འདི་ཉེས་པ་ཆེ་བའི་ཚུལ་ ལུང་ལས། གསོད་པོ་ནོར་ལ་སྲེད་པ་དག །བསྐལ་བ་འབུམ་དུ་འཚེད་པར་འགྱུར། །ཟ་པོ་ཤ་ལ་སྲེད་པ་དག །བསྐལ་པ་བྱེ་བར་འཚེད་པར་འགྱུར། །ཟེར་གསུངས་ཏེ་ཡོད་དོ་བཟུམ་སྦེ་ སེམས་ཅན་གསད་མི་འདི་ བསྐལ་པ་འབུམ་ཕྲག་གཅིག་གི་རིང་ལུ་ དམྱལ་བའི་བཙོ་སྲེག་གི་སྡུག་བསྔལ་མྱོང་དགོཔ་ད། ཤ་ཟ་མི་ཚུ་ དེ་ལས་ལོག་བལྟབ་ ཚར་བཅུ་ཐམ་གྱིས་ཡུན་རིངམ་སྦེ་བསྐལ་པ་བྱེ་བ་གཅིག་གི་རིང་ལུ་ བཙོ་སྲེག་གི་སྡུག་བསྔལ་མྱོང་དགོཔ་ཡོདཔ་ལས་ ལས་རྣམ་སྨིན་ལྕི་ཡང་གི་ཁྱད་པར་གསུངས་ཡོད་མི་འདི་གིས་ སེམས་ཅན་སྲོག་གཅད་མི་བ་ ཤ་ཟ་མི་ཉེས་པ་ཆེ་དྲགས་ཨིནམ་ཤུགས་ཀྱིས་ཧ་གོ་བས།
ཤ་ཟ་བའི་ཉེས་དམིགས་དང་སྤངས་པའི་ཕན་ཡོན།
ཤ་ཟ་ནི་དེ་ ཐེག་ཆེན་ཕ་རོལ་ཏུ་ཕྱིན་པ་དང་། གསང་སྔགས་ཀྱི་སྐབས་ལུ་ཁྱད་མེདཔ་སྦེ་རྩིས་མི་དེ་ ཐོས་པའི་ཤེས་རབ་ཉུང་པའི་སྐྱོན་ཨིན་མི་དེ་ཡང་ ལུང་ལས། གང་ཞིག་ཤ་ཁྲག་ལོངས་སྤྱོད་ནི། །ཁམས་གསུམ་ཕུང་བར་བྱེད་པའི་ཟས། །ཐར་པའི་སྲོག་རྩ་གཅོད་པའི་མཚོན། །བྱང་ཆུབ་ས་བོན་བསྲེག་པའི་མེ། །དལ་འབྱོར་མཐོ་རིས་འཇོམས་པའི་ཐོག །སུས་ཀྱང་ཟ་བར་མི་རུང་ན། །རྒྱལ་བའི་བསྟན་ལ་རབ་བཞུགས་པའི། །སྐྱབས་གསུམ་འཛིན་པའི་དགེ་བསྙེན་ནས། །དགེ་ཚུལ་དགེ་སློང་ཁྲུམས་ལྡན་པས། །བཟའ་བར་ནམ་ཡང་མ་གནང་ངོ་། །བྱང་ཆུབ་སེམས་དཔའི་ལམ་ཞུགས་པས། །ཕ་མར་གྱུར་པའི་སེམས་ཅན་ཤ །ཟོས་པའི་ཉེས་དམིགས་རྒྱ་ཆེར་འགྱུར།།ཟེར་སྔོན་བྱོན་རྒྱལ་བ་གོང་མ་ཚུ་གིས་ ཤ་ཁྲག་དུག་ཟས་བཟུམ་སྤངས་དགོཔ་སྦེ་གསུངས་ཏེ་ཡོད། ད་རེས་རིག་གསར་གྱི་ལམ་ལུགས་ལས་ཡང་ ཨེ་ཤི་ཡ་དང་ ཡུ་རོབ་ དེ་ལས་ ཨེ་མི་རེ་ཀ་རྒྱལ་ཁབ་ཀྱི་ གསོ་བའི་མཁས་མཆོག་ཚུ་གིས་འབད་རུང་ འཛམ་གླིང་ཚ་དྲོད་ཡར་འཕར་དང་ འབྱུང་བཞི་འཁྲུགས་པའི་རྐྱེན་ངན་ཚུ་མར་ཕབ་འབད་དགོ་པ་ཅིན་ ཤ་ཟ་ནི་སྤང་དགོ་པའི་སྐོར་ལས་ བརྡ་བརྒྱུད་ནང་ཁྱབ་བསྒྲགས་འབད་བཞིན་ཡོད། དེ་མ་ཚད་ཇ་པཱན་དང་ ཨིན་ཌོ་ནེ་ཤི་ཡ་ ཐའི་ལེནཌ་རྒྱལ་ཁབ་ཚུ་ནང་ རྒྱ་མཚོའི་རྦ་རླབས་ཀྱི་གནོད་པ་ལུ་བརྟེན་ མི་ས་ཡ་ལས་བཅད་དེ་ཤི་རྐྱེན་བྱུང་མི་ཚུ་ གཙོ་བོ་ར་ ཉམས་དགའ་བའི་ཞོར་ཁར་ ཆུ་ནང་གི་སྲོག་ཆགས་གྱངས་ཁ་མ་ཆོདཔ་ཅིག་ བསད་ཟ་བའི་རྣམ་སྨིན་གྱིས་ཨིནམ་སྦེ་ཡིད་ཆེས་བསྐྱེདཔ་ཨིན་པས།
མ་གཞི་དམ་པའི་ཆོས་ཟེར་མི་དེ་ སེམས་ཅན་ལུ་གནོདཔ་བཀལ་ནི་སྤང་མི་ཅིག་ཨིནམ་སྦེ སྟོན་པ་སངས་རྒྱས་ཀྱིས་གསུངས་པའི་ཚུལ་ བསྟན་བཅོས་བཞི་བརྒྱ་པ་ལས་ཡང་། མདོར་ན་ཆོས་ནི་མི་འཚེ་བ། །དེ་བཞིན་གཤེགས་པ་ཉིད་ཀྱིས་གསུངས། །ཟེར་ཡོདཔ་ཨིན། སེམས་ཅན་ལུ་སྡི་ཆེ་སྙིང་རྗེ་ག་ནི་ཡང་མེད་པར་ཤ་ཟ་བ་ཅིན་ ཆོས་ལྡན་རྒྱལ་ཁབ་ནང་སྐྱེས་རུང་ ནང་གི་སེམས་འདི་ གཅན་གཟན་སྟག་དང་གཟིག་ དེ་ལས་ཤ་ཟ་སྲིན་པོ་བཟུམ་ཨིནམ་སྦེ་ རྒྱུད་དགོངས་པ་ཟངས་ཐལ་ལས་ ཨོ་རྒྱན་རིན་པོ་ཆེ་གིས་གསུངས་ཏེ་ཡོད།
དེ་སྦེ་ཨིན་རུང་ ཤ་ནི་སྙིང་རྗེ་ཅན་གྱིས་ཟ། །ཆང་ནི་དམ་ཚིག་ཅན་གྱིས་འཐུང་། །ཟེར་གསུངས་མི་འདི་ དམིགས་པ་མེད་པའི་སྙིང་རྗེ་ཚུ་ རང་གི་སེམས་ལུ་བརྟན་པ་ཐོབ་པའི་ཁར་ ཤ་དང་ཆང་ཨིན་ཟེར་བའི་རྣམ་རྟོག་གི་འདུ་ཤེས་ནུབ་ཞིནམ་ལས་ བདུད་རྩིའི་ངོ་བོར་མཐོང་བའི་ཡེ་ཤེས་ཀྱི་རྟོགས་པ་རྒྱུད་ལུ་འཁྲུངས་ཡོད་པ་ཅིན་ ཤ་ཆང་ལུ་ལོངས་སྤྱོད་ཆོག་པའི་གནང་བ་སངས་རྒྱས་ཀྱིས་གནང་སྟེ་ཡོདཔ་ཨིན། ཤ་ཟ་ནི་སྤངས་དཔ་འདྲཝ་ཅིག་འབད་བ་ཅིན་ སྡོམ་པ་དང་ཚུལ་ཁྲིམས་ཡང་འདི་ཨིན་ཟེར་ སྤྱོད་འཇུག་ནང་ལུ་ ག་ནེ་བ་གསལ་ཏོག་ཏོ་སྦེ་གསུངས་ཏེ་ཡོདཔ་ཨིན་པས།
སེམས་ཅན་ལུ་གནོད་པ་སྤངས་བའི་དགེ་བ་ལུ་བརྟེན་ གནས་སྐབས་མཐོ་རིས་ལྷ་དང་མིའི་གོ་འཕང་དང་། མཐར་ཐུག་སངས་རྒྱས་ཀྱི་གོ་འཕང་ཡང་འཐོབ་ནི་ཡོད་པའི་ཁར་ ཐམས་ཅད་མཁྱེན་པའི་བྱང་ཆུབ་ཀྱི་ལམ་སྣ་ཡང་ཟིན་ཚུགསཔ་སྦེ་ རྗེ་བཙུན་མི་ལ་རས་པ་གིས། ཤ་ཁྲག་ཟས་སུ་མ་བཟའ་ན། །མཐོ་རིས་ཐར་པ་ཐོབ་པ་ཡིན། །འགྲོ་ལ་འཚེ་བ་སྤངས་པ་ན། །བྱང་ཆུབ་ལམ་སྣ་མྱུར་དུ་ཟིན། །ཟེར་གསུངས་ཡོདཔ་ལས་ ང་བཅས་ར་ག་ར་གིས་ ཤ་ཟ་བ་ཅིན་སྡིག་པ་ལྕི་དྲགས་དང་ ཤ་མ་ཟ་བ་ཅིན་ ཕན་པ་ཚད་མེདཔ་ཅིག་ཡོད་མི་ལུ་ཐུགས་བཞེད་གནང་སྟེ་ རབ་བྱུང་པ་ཅིན་ཤ་རྩ་ལས་ར་མི་བཞེས་ནིའི་དམ་བཅའ་དང་། འབྲིང་ཚེས་བཟང་དུས་བཟང་གི་སྐབས་ལུ་ཤ་སྤང་། དེ་མིན་རུང་ ག་དེ་ཉུང་ཉུ་སྦེ་བཞེས་ནི་གི་ཐབས་ལམ་བཏོན་གནང་ཟེར་ཞུ་ནི་ཨིན།
དང་ཕུའི་ལུགས་སྲོལ། ད་རེས་ཀྱི་ལོ་རྒྱུས། 