བཀའ་དྲིན་ཅན་གྱི་ཨ་མ།


མི་གཉིས་མཐུད་གསུམ་མཐུད་རྐྱབ་རུང་ དྲིན་ལན་འབྱོར་མ་ཚུགས་པའི་དྲིན་ཅན་ཨ་མ་ཟླ་བའ་དི་ གཏན་རྐྱང་ཕམ་དང་བུ་གཞི་སྦེ་གཅིག་ཁར་སྡོད་ནི་ཡོད་པ་ཅིན་སེམས་དགའ་བས། ཨིན་རུང་སྐྱེས་བའི་མཐའ་མ་མི་འཆི་གང་ཡང་མེད།།ཟེར་གསུངས་ཏེ་ཡོད་དོ་བཟུམ་སྦེ་ དུས་ནམ་ཅིག་གི་ཚེ་ རང་ཡང་དེའི་ལམ་བདའ་སྟེ་འགྱོ་དགོཔ་ལས་ གཏན་རྐྱང་མཉམ་གཅིག་སྡོད་ནིའི་རང་དབང་མི་ནུག ཨིན་རུང་ད་རིས་ནངས་པ་བརྡ་དོན་འཕྲུལ་རིགས་ཡར་རྒྱས་དང་བསྟུན་ཏེ་ དྲིན་ཅན་ཨ་མའིསྐུ་པར་ཁྲ་ལམ་ལམ་སྦེ་མཇལ་ནི་ཡོད་ནི་འདི་གིས་ ཧེ་མ་ག་དེ་སྦེ་སྡོད་ཅི་ག་སེམས་ཁར་ཤར་ཏེ་ དགའ་བའི་ལྕངམོ་ལུ་སྐྱོ་བའི་མིག་ཆུ་བླུགས་ཏེ་ འབྲས་བུ་སངས་རྒྱས་ཀྱི་གོ་འཕང་འཐོབ་པར་ཐེ་ཚོམ་མེད་འོང་ཟེར་མནོཝ་མས།

IMG_20151103_211451

ང་བཅས་ར་འབྲུགཔ་མང་ཤོས་ཀྱིས་ ལུས་སེམས་སྐྱེས་པའི་དྲིན་ཅན་མ་ལུ་ ཨའི་ཟེར་ཞུ་དོ་ཡོདཔ་ཨིན་རུང་ ང་རང་དྲནམ་ཚོརཝ་ཅིག་ལས་ར་ ཨའི་ལུ་ཨ་མ་ཟེར་ཞུཝ་ཨིནམ་ལས་ དེ་ནང་ཡང་ཨ་མ་ཟེར་ར་བྲིས་ཏེ་ཡོད། ང་བཅས་ཀྱི་བཟའ་ཚང་ནང་ ཕམ་མང་ཤོས་ར་བླམ་ཆོསཔ་ཨིནམ་ལས་བརྟེན་ཏེ་ ཨ་མ་མོ་ར་ན་ཅུངམོ་སྦེ་སྡོད་པའི་བསྒང་ལས་ ནང་པའི་ཆོས་ཀྱི་འབྲི་ལྷག་ཤེས་ཡོན་ལྷབ་ཡོདཔ་མ་ཚད་ སྐྱེས་ལོ་༡༦དེམ་ཅིག་ལས་ཨ་ཎེམ་ནང་འཛུལ་ཏེ་ ཨ་ཎེ་སློབ་དཔོནམོ་དཔལ་སྒྲོན་གྱི་ཕྱག་ཞུས་ཏེ་  ཆོས་སྤྱོད་ཀྱི་རིམ་པ་ཚུ་ རིམ་པར་བཞིན་དུ་བློར་བཟུང་ཡོདཔ་ཨིན་པས།
དེ་ལས་སློབ་དཔོནམོ་དཔལ་སྒྲོན་ལུ་ སྟབས་བདེཝ་ཅིག་བྱུངམ་ལས་བརྟེན་ སྐྱེས་ལོ་༡༩ལུ་ ཐིམ་ཕུག་ཐ་བྲག་དགོན་པ་ལས་བྱོག་སྟེ་ སློབ་དཔོན་མོའི་ཕྱག་ཞུས་ཏེ་ ཆོས་གྲོགས་ཅིག་དང་མཉམ་གཅིག་ ལ་བརྒལ་ལུང་སྤུབས་ཏེ་ཀུར་སྟོད་ལུ་སོང་ནུག དེ་བསྒང་ཤར་ཕྱོགས་ཁ་ཐུག་ལུ་ སྣུམ་འཁོར་ལམ་མེདཔ་ལས་ བཀབ་གོ་ལ་དང་རྒྱགས་སྐྱེས་ཚུ་ རང་གི་སྒལ་པར་འབག་སྟེ་ རྐང་སྟོང་སྦེ་དཀའཝ་སྤྱད་དེ་ ཉིམ་འཛུལ་ས་ལས་ ཉིམ་ཤར་སར་ ཀུར་སྟོད་དུང་དཀར་ལུ་ལྷོད་ནུག

ཨ་ཎེ་སློབ་དཔོནམོ་དཔལ་སྒྲོན་དང་ དེ་སྐབས་བྱང་ཆུབ་གླིང་ལུ་བཞུགས་ཡོད་མི་ བླམ་བསོད་ནམས་བཟང་པོ་སྐུ་ཉེ་ཨིནམ་ལས་ ག་ཅིའི་ཐད་ལས་འབད་རུང་སྟབས་བདེ་ཏོག་ཏོ་སྦེ་སྡོད་པའི་སྐབས་ མཁས་དབང་ལམ་དཔོན་བགྲེསཔ་སངས་རྒྱས་རྡོ་རྗེ་མཆོག་ཡང་ སྐུ་མཚམས་སྦེ་བཞུགས་ཡོདཔ་ལས་ ཞབས་སར་བཅར་ཏེ་ ཕྱག་ཆེན་གྱི་ཁྲིད་ལུང་ཞུ་ཡོདཔ་ཨིན་པས།
ཨང་རྒས་དཀོན་མཆོག་བཟངམོ་འདི་ ནུབ་ཕྱོགས་ལུ་ ཇོ་མོ་སྐད་གྲགས་ཅན་ཅིག་འབད་ནི་འདི་གིས་ སྤུངས་ཐང་་ཁ་དང་དབང་འདུས་ཀྱི་ལུང་ཕྱོགས་ནང་ སྦྱིན་བདག་མང་རབས་ཡོད་མི་ཚུའི་རྐྱེན་སེལ་གྱི་དོན་ལུ་ ཇོམོ་གསོལ་སྲོལ་ཡོདཔ་བཟུམ་སྦེ་ ཉི་ཟེར་སྒང་ལུ་ཇོམོ་གསོལ་བའི་ཡོན་སྦེ་ སྐྱབས་རྗེ་ཉི་ཟེར་སྤྲུལ་སྐུ་འཕྲིན་ལས་ལྷུན་གྲུབ་མཆོག་གི་ཞབས་ལས་ བ་ཐངམ་ཅིག་གནང་ཡོད་མི་དེ་ རྟ་ལོག་ལུ་འཁྱིད་དེ་གསོ་རུང་ དེའི་རྟིང་ཤུལ་བདའ་གཟའ་རྒྱུགས་ཏེ་ དྲིན་ཅན་ཨ་མ་ཟླ་བ་སྐྱེས་ལོ་༢༡ལུ་ གཟེར་ནད་ཕོག་སྟེ་ གཟུགས་སྟོབས་ཉམས་པའི་སྐབས་ ཨང་རྒས་ཀྱིས་ཐབས་རིམ་འགྲོ་ག་དེ་ཅིག་འབད་རུང་ རྩ་ལས་དྲག་ནི་མེད་རུང་ དེ་སྐབས་རྟ་ལོག་ཁྱིམ་སྦོམ་ནང་བཞུགས་ཡོད་མི་ ལམ་བགྲེས་སངས་རྒྱས་རྡོ་རྗེ་མཆོག་གིས་བཅོ་ཁ་གནངམ་ད་ དུམ་གྲ་ཅིག་བདེ་ཏོག་ཏོ་སོང་ནུག

དཀྱིལ་ཆོག་ཕྱག་ལེན་གར་ཐིག་དབྱངས་གསུམ་དང་ སྒོམ་ཉམས་ལེན་མཁས་དྲགས་ མཁས་དབང་ལམ་བགྲེས་སངས་རྒྱས་རྡོ་རྗེ་མཆོག་ གྲྭ་ཚང་ལས་སྐུ་ཟུར་ཏེ་ ཁོ་རའི་འཁྲུངས་ཡུལ་ སྟོདཔ་སྟོང་བཅུ་ཁར་བཞུགས་པའི་སྐབས་ དང་པ་སྔོན་གྱི་ལས་འབྲས་རྒྱ་ཆེ་ གཉིས་པ་ཨ་མའི་འབད་གཞག་ཐུགས་ཁར་བབ་སྟེ་ ཡུན་མ་རིང་པར་ སྤང་དཀར་པོ་གླིང་ཀ་ན་ ང་བཅས་ཀྱི་མཚམས་ཁང་ནང་ལུ་བཞུགས་པའི་སྐབས་ ཨ་མ་གིས་ལུས་ངག་ཡིད་གསུམ་ཕུལ་ཏེ་ ཕྱག་ཕྱིད་ཞབས་ཏོག་ཅི་ལྕོགས་གང་ལྕོགས་ཞུ། མཁས་དབང་ལམ་བགྲེས་སངས་རྒྱས་རྡོ་རྗེ་མཆོག་གིས་ཡང་ སེམས་ཀྱི་གནས་ལུགས་ཀྱི་བརྡ་སྤྲོད་གནང་ནུག
ཨ་མ་མོ་ར་དམ་པའི་ཆོས་ཡང་དག་ཅིག་འབད་མ་ཚུགས་རུང་ བུད་མེད་ཤེས་རབ་རང་བཞིན་ལ། ཟེར་གསུངས་ཏེ་ཡོད་དོ་བཟུམ་སྦེ་ མོ་གིས་ཐབས་ཤེས་ལུ་བརྟེན་ མཁས་དབང་ལམ་དཔོན་སངས་རྒྱས་རྡོ་རྗེ་མཆོག་ སྤང་དཀར་པོ་བཞུགས་ཡོད་ནི་འདི་གིས་ ལུང་ཕྱོགས་ཁག་ལས་ དད་དམ་ཅན་གྱི་བླ་སློབ་མང་རབས་ཅིག་ ཞབས་སར་ཆོས་ཞུ་བར་བཅར་མི་ཚུ་གིས་ ཤུལ་ལས་བསྟན་འགྲོ་ལུ་ཕན་ཐོགས་བྱུང་ནུག།
ངེའི་ཨ་མ་ཟླ་བ་དེ་ མི་སྡེའི་ནང་ལུ་ ལྕོགས་གྲུབ་ཅན་དང་ ག་ཅི་ར་འབད་རུང་འཇོན་དྲགས་ཅིག་སྦེ་ཆ་བཞག་མི་དེ་ཡང་  ཁྱིམ་མཚེས་ཀྱི་ཨ་ལོ་གསར་སྐྱེས་ཚུ་གི་དོན་ལུ་ འབུམ་ཆུང་ལྷག ཟློག་ཚེ་སྒྲུབ་བསག ཉིན་མ་འདི་ཕར་བཞག་ ཕྱི་རུ་ཉལ་ཚར་རུང་ ལོང་སྟེ་ནདཔ་ཚུའི་དོན་ལུ་མོ་བཏབ་སྟེ་ གདོན་བཅོས་ཡང་ མོ་རང་གིས་ར་བསྐྱེལ་ཏེ་ གཞན་ཕན་བྱང་ཆུབ་ཀྱི་སེམས་བསྐྱེད་དང་ལྡན་མི་ཅིག་ཨིན། བླ་སློབ་མང་རབས་ཀྱི་ཕྱག་ལས་བརྒྱུད་པའི་བྱིན་རླབས་དམ་རྫས་དང་ རིལབུ་ཚུ་ཕན་སེམས་བསྐྱེད་དེ་བྱིན་མི་འདི་གིས་ དེ་འཕྲལ་ལས་ནད་ལས་དྲགཔ་ལས་ ག་ར་གིས་བརྩི་མཐོང་བསྐྱེདཔ་ཨིན།

ད་རེས་ནངས་པ་བཟུམ་སྦེ་ དེ་བསྒང་རྟ་ལོག་གཡུས་ཚན་ནང་ལུ་ རླུང་མ་མེ་ཁུར་ཨོ་ཏོག་ཏོ་སྦེ་བཟོ་ཤེས་མི་གངམ་མེད་པའི་སྐབས་ མེ་ཁུར་བཟོ་མི་ལག་སྦྱང་ཆེ་ཤོས་ཅིག་ ངེའི་ཨ་མ་ཨིནམ་ལས་ ལོ་མཆོད་རན་པའི་བསྒང་ལས་ གཞན་གྱི་སེམས་བསད་མ་ཧུམ་པར་ དལ་ཁོམ་མེད་པར་ག་དྲགས་སྦེ་སྡོདཔ་ཨིན། 
ངེའི་ཨ་མ་འདི་ ཡོན་ཏན་སྣ་ཁག་ཚང་མི་ཅིག་ཨིནམ་ད། དེའི་གྲས་ལས་སྐྱ་བཏོག་ནི་དང་ ཚེམས་རྐྱབ་ནི་ལག་སྦྱང་ཡོདཔ་ལས་ གཡུས་ཁའི་ཁྱིམ་མཚེས་མང་ཤོས་ཅིག་ སྐྱ་བཏོག་པར་འོང་སྲོལ་ཡོད། མོ་རང་ལུ་ནཝ་ཚཝ་བྱུང་སྟེ་ མ་པ་ལས་ར་ཡར་ལོང་མ་ཚུགསནི་མ་ཤེས་ དེ་མིན་པ་ཅིན་ ཡུདཔ་ཐེངས་ཅིག་ཡང་དལཝ་སྦེ་སྡོད་ནི་མེད་པ་ ཁྱིམ་གྱི་ནང་ན་དང་ཕྱི་བསྐོར་ གཞན་འདི་ལོས་ ཁབ་བུད་སོང་རུང་མིག་གིས་མཐོངམ་སྦེ་ ཕྱག་བརྡར་རྐྱབ་སྟེ་ ཧིང་སངས་ས་སྦེ་སྡོད་དགོ་མི་ཅིག་ཨིན།

དེ་བསྒང་ང་རང་སྐྱེས་ལོ་༨དེ་ཅིག་སྦེ་སྡོད་པའི་བསྒང་ ད་རིས་ནངས་པ་བཟུམ་སྦེ་ གྱིབ་ཀྱིས་བཟོ་བའི་ཕྱགས་སྙིགས་དབོགས་ས་མ་འཐོན་རུང་ ཆུ་དབོགས་སའི་གྱི་དམ་གྲས་ཏེ་ ཕྱགས་སྙིགས་དབོགས་སུ་བཟོ་ཡོད་མི་འདི་ལུ་ ཁྱིམ་མཚེས་ཆ་ཁྱབ་ཧ་ལས་ཏེ་ ག་ར་གིས་དཔྱེ་བཞག་ས་ཅིག་དང་ ཆ་བཞག་ས་ཅིག་ཨིན།
ཨ་མ་ཟླ་བ་ལུ་ ཚེ་འདི་ཕྱི་གཉིས་ཀྱི་ལམ་སྟོན་གནང་མི་ མཁས་དབང་ལམ་དཔོན་སངས་རྒྱས་རྡོ་རྗེའི་བཀའ་དྲིན་ལས་ ཚེ་སྟོད་ལུ་ མི་ཚེ་འཚོ་སྐྱོང་གི་དོན་ལུ་དཀའཝ་གནམ་མེད་ས་མེད་མ་སྤྱད་རུང་ ཚེ་སྨད་ལུ་ བཟའ་ཚང་ནང་ལུ་ གྲོགས་རམ་དང་རྒྱབ་སྐྱོར་འབད་མི་འདི་ཨིན་ཟེརཝ་ཅིག་ག་ཡང་མེདཔ་ལས་ བཟའ་འཐུང་དང་བཀབ་གོ་ལ་མོ་རང་གིས་འཚོལ་མཁོ་འཐབ་དགོ་ནི་འདི་གིས་ ཟ་ཆས་དང་ཉེ་བར་མཁོའི་ཅ་ཆས་ཀྱི་རིགས་ཚུ་ སྐོར་ཆ་མཁས་དྲགས་ཀྱི་གྲས་ཁར་བརྩིསཝ་ཨིན། ཁྱིམ་ནང་ལུ་ཅ་ལ་བཞག་ཐངས་ཚུ་ཡང་ ག་མནོ་གུ་མནོ་སྦེ་ག་ཐོབ་སར་མིན་པར་ ཐོབ་ཐངས་དང་འཁྲིལ་དགོ་པའི་ཁར་ ཧེ་མ་ག་ཏེ་བཞག་སར་ ཀྲིག་ཀྲི་སྦེ་བཞག་དགོ་མི་ཅིག་ཨིན་ཟེར་ཞུ་ནི་ཨིན།།