གདོང་ཤོག


རྫོང་ཁ་གོང་འཕེལ་ལྷན་ཚོགས་ཀྱིས་ ལོ་ལྟར་འགོ་འདྲེན་འཐབ་སྲོལ་ཡོད་པའི་ སྤྱི་ལོ་༢༠༡༨ལོའི་ རྒྱལ་ཡོངས་དཔེ་དེབ་རྩོམ་སྒྲིག་འགྲན་བསྡུར་ནང་གྲས་ཁར་གཏོགས་ཅི། མ་གཞི་ང་གིས་ དེ་བཟུམ་གྱི་འགྲན་བསྡུར་ནང་ལས་ཨང་དང་པ་འཐོན་ནིའི་ལྕོགས་གྲུབ་མེད་དེ་འབད་རུང་ ག་ཅི་ར་འབད་རུང་གོམས་འདྲིས་ཚུད་དགོཔ་ལས་བརྟེན་ སྤགས་མེད་རུང་སྤུ་གིས་བརྒྱན།།སོ་མེད་རུང་མཛརཝ་རྨུར།།ཟེར་བའི་དཔྱེ་དང་འདྲཝ་སྦེ་ གྲས་ཁར་གཏོགས་ཚུགས་མི་ལུ་དགའ་ཚོར་ཡོད།

DSC_1648

ང་བཅས་རའི་སླབ་སྲོལ་ལས་ ཕནམ་ཐམ་ཅད་ཆོས། རྨ་ཁར་ཕནམ་ཅིག་ཡོདན།།རོ་ཁྱིའི་ཚི་ལུ་ཨིན་རུང་དབུར།།ཟེར་དོ་བཟུམ་སྦེ་ རང་གིས་ཤེས་མི་འདི་ གཞན་ལུ་སྤེལ་ཚུགས་པ་ཅིན་ ཕན་པ་བསམ་པ་ཙམ་གྱིས་ཀྱང་།།སངས་རྒྱས་ཆོས་ལས་ཁྱད་པར་འཕགས།།ཟེར་གསུངས་ཏེ་ཡོད་མི་དང་མཐུནམ་ཨིན་པས།

DSC_1649

འགོ་ཁྲིདཔ་ཨམ་སྲུ་གིས་འབད་ཚུགསཔ།


སྤྱི་ལོ་༢༠༡༡ལུ་ ས་གནས་གཞུང་གི་བཙག་འཐུའི་སྐབས་ རྒཔོ་ཨམ་སྲུ་བརྒྱ་ཆ་༠.༥༠ ལས་མེདཔ་མི་དེ་ ཉུང་དྲགས་ཅིག་ཨིན་མི་དེ་ཡང་ རྒཔོ་བཙག་འཐུའི་དོན་ལུ་ ཐོ་བཀོད་འབད་མི་ཨམ་སྲུ་༢༢ཀྱི་གྲས་ལས་ ཕུད་རྡོག་༡མ་གཏོགས་བཙག་འཐུ་མ་གྲུབ་རུང་ ས་གནས་གཞུང་གི་བཙག་འཐུ་གོ་རིམ་༢པའི་སྐབས་ ཨམ་སྲུ་༢རྒཔོ་སྦེ་བཙག་འཐུ་གྲུབ་མི་འདི་རྩིས་ཏེ་ དམང་མི་དང་ཚོགས་པའི་གྲས་ལུ་ ཨམ་སྲུ་བསྡོམས་༡༧༣བཙག་འཐུ་གྲུབ་ཡོདཔ་ཨིན་པས།

ཞིབ་འཚོལ་གྱི་སྙན་ཞུ་ཅིག་དང་འཁྲིལཝ་ད་ ངོས་ལེན་འབད་མི་༡,༥༣༦ ལས་ བརྒྱ་ཆ་༥༠ གིས་ བཙགས་འཐུའི་སྐབས་ བཅའ་མར་བཏོགས་མི་ཨམ་སྲུ་ཚུ་ལུ་ གཙོ་བོ་ར་ ཤེས་ཡོན་དང་ སྦྱོང་བརྡར་ དེ་ལས་ཁ་སྐད་ལག་ལེན་རིག་རྩལ་ཚུ་ནང་ དཀའ་ངལ་སྦོམ་ཡོདཔ་སྦེ་བརྩིས་དོ་ཡོདཔ་མ་ཚད་ ནུབ་ཕྱོགས་རྒེད་འོག་༨ཀྱི་ནང་ རྒཔོ་ཨམ་སྲུ་བཀལ་ནི་ལུ་ཐེ་ཚོམ་ཡོད་མི་དེ་ཡང་ ལོ་བསྟར་སྤུངས་ཐང་སྒྲོམ་མཆོད་སྐབས་ ཝང་ཚོ་ཆེན་བརྒྱད་ཀྱི་རྒཔོ་ཚུ་གིས་ དགེ་སློང་གི་ཆས་སྒྲིག་སྟེ་ དཔའ་གཟར་པའི་འགོ་འཁྲིདཔ་འབདཝ་ད་ བཏུབ་མ་བཏུབ་དང་ ག་དེ་སྦེ་འབད་ཚུགས་ག་ཟེར་ དེ་བསྒང་གི་མནོ་ལུགས་ཁ་སྒྱུར་ནི་འདི་ལཱ་ཁག་བཏང་དོ་ཡོདཔ་ཨིན་པས།

ཨིན་རུང་ ཐིམ་ཕུག་རྫོང་ཁག་ཅང་རྒེད་འོག་གི་དམང་མི་བསོད་ནམས་བཟངམོ་གིས་ ཝང་ཚོ་ཆེན་བརྒྱད་ཀྱི་གྲས་ལས་ རྒ་ཚབ་སྦེ་དཔའ་གཟར་པའི་འགོ་འདྲེན་འཐབ་མི་ ཨམ་སྲུ་འགོ་དང་པ་ཨིན་པས། ཧེ་མ་འབད་བ་ཅིན་ ཨམ་སྲུ་གིས་རྒཔོ་འབད་དེ་དཔའ་གཟརཔ་རྐྱབ་ནི་འདི་ རྩ་ལས་ར་མ་བཏུབ་སྦེ་སླབ་ཡོདཔ་ཨིན་རུང་ དམང་མི་བསོད་ནམས་བཟངམོ་གིས་ སྤུངས་ཐང་སྒྲོམ་མཆོད་སྐབས་ ཅང་ཚོ་ཁག་གིས་འབད་དགོཔ་བཅའ་དགོ་པའི་རིགས་ཚུ་ ཧེ་མ་བཟུམ་སྦེ་ར་འཐུས་ཤོར་ག་ནེ་ཡང་མེད་པར་ཕྱག་ཞུས་ཡོདཔ་མ་ཚད་ མོ་རའི་རྨགཔ་ཤེས་རབ་ཀྱིས་ཡང་ དགེ་སློང་གི་ཆས་བསྒྲིགས་ཏེ་ རྫོང་ནང་དང་ སྒར་ཁར་སྒྲིག་རྒྱུག་མི་འདི་གིས་ ད་ལས་ཕར་ཨམ་སྲུ་ཚུ་གིས་ རྒཔོ་འབད་ཚུགས་ནི་ལུ་བློ་སྟོབས་བསྐྱེད་བཅུག་ནི་རྐྱངམ་ཅིག་མིན་པར་ མི་མང་གིས་ཡང་རྒྱབ་སྐྱོར་འབད་ནིའི་ལམ་ཅིག་ཨིན་པས།

 

རྫོང་ཁ་ལེགས་བཅོས་ཚོགས་ཆུང་།


banner1

བརྡ་བརྒྱུད་ཀྱི་འགན་ཁག་འདི་ མིང་མང་ལུ་ གནས་ཚུལ་དང་ གོ་བརྡ་སྤེལ་མི་ཅིག་ཨིནམ་མ་གཏོགས་ སྐད་ཡིག་དར་ཁྱབ་ལུ་གཙོ་བོར་བཏོན་མི་ཅིག་མིན་རུང་ རྒྱལ་ཡོངས་ཁ་སྐད་རྫོང་ཁའི་མིང་ཚིག་ཕོག་ལམ་འཁྲིལ་ཏེ་ རྫོད་སྒྲ་དག་ཏོག་ཏོ་སྦེ་སླབ་མ་ཚུགས་པ་ཅིན་ གོ་བ་བརྡ་ལོག་དང་ གནས་ཚུལ་ཕྱི་འགྱུར་འགྱོ་ནིའི་ཉེན་ཁ་ཡོདཔ་མ་ཚད་ རྒྱལ་ཁབ་རང་བཙན་གྱི་ངོ་རྟགས་དང་ མི་མང་གི་བདེ་སྐྱིད་དང་ལམ་སྲོལ་ཡལ་ནིའི་ཉེན་ཁ་ཡོདཔ་སྦོམ་ཡོདཔ་ལས་ འབྲུག་རྒྱང་བསྒྲགས་ཀྱིས་ ཉིན་བསྟར་གྱི་གནས་ཚུལ་དང་ལས་རིམ། ཁྱབ་བསྒྲགས་ཀྱི་རིགས་ཚུ་སྟོན་པའི་སྐབས་ རྫོང་ཁའི་ཡིག་སྡེབ་ཚུ་བརྡ་སྦྱོར་དང་མཐུནམ་སྦེ་ རྫོང་ཁ་སྐད་ཡིག་གི་མིང་ཚིག་རྙིངམ་ཚུ་ག་དེ་མང་མ་དང་ ཧེ་མ་སླབ་སྲོལ་ཡོད་པའི་རྗོད་སྒྲ་ག་ཨིན་མི་འདི་ སྐྱོན་མེདཔ་སྦེ་སླབ་ཚུགས་ནིའི་ལཱ་སྐོར་འགྲིག་མི་འདི་གིས་ ད་ལྟོ་མི་མང་གིས་གནས་ཚུལ་འཇམ་ཏོང་ཏོ་སྦེ་ཧ་གོ་ཚུགས་ནི་དང་ རྟིང་མ་བུ་གཞིའི་བདོག་གཏད་ཡིག་ཐོག་ལུ་བཀོད་ཚུགས་ནི་སྐབས་གཅིག་ལུ་དོན་གཉིས་ཀྱི་འཆར་གཞི་བརྩམས་མི་འདི་གིས་ རྒྱལ་ཡོངས་སྐད་ཡིག་གཅིག་མཚུངས་སྦེ་དར་ཁྱབ་གཏང་ནི་ལུ་ཕན་ཐོགས་འབྱུངམ་མིག་གིས་མཐོང་སར་ཨིན་པས་ཟེར་ཞུ་ནི་ཨིན།།

ཝི་ཅེཊ་ཐོག་ལུ་རྫོང་ཁ་སླབ་ཐངས་སྡེ་ཚན་བཟོ་ཡོདཔ།


ང་བཅས་རའི་འབྲུག་རྒྱལ་ཁབ་ནང་ཡང་ རྒྱལ་ཡོངས་སྐད་ཡིག་རྫོང་ཁ་འདི་ ཁ་ལས་སླབ་ནི་དང་ ཡིག་ཐོག་ལུ་འབྲི་ནི་གཉིས་ཆ་ར་སྟབས་བདེ་ཏོག་ཏོ་སྦེ་ཡོད་རུང་ ད་ལྟོའི་གནས་སྟངས་ལུ་ཆ་དཔག་ལྟཝ་ད་ རྒྱལ་ཡོངས་སྐད་ཡིག་ལུ་ དང་འདོད་བསྐྱེད་མི་གངམ་མེདཔ་མ་ཚད་ འདིའི་ནང་ལས་ཡང་མིང་ཚིག་རྙིངམ་གཡོག་བཀོལ་མི་འདི་ གནམ་ཉིན་མའི་སྐརམ་བཟུམ་ཅིག་ལས་བརྒལ་ཏེ་མི་འདུག

རྫོང་ཁ་སླབ་ཐངས་ཀྱི་སྡེ་ཚན་བཟོ་དགོ་མི་དེ་ཡང་ རྒྱལ་ཁབ་རང་བཙན་ལུ་ སྤྱིར་རྒྱལ་ཡོངས་སྐད་ཡིག་གཅིག་མཚུངས་སྦེ་དར་ཁྱབ་གཏང་ནི་དང་། དེའི་ནང་ལས་ཡང་སླབ་ངོ་བདེ་ཏོག་དང་ ཉན་དགོ་མནོ་སི་སི་སྦེ་ཡོད་པའི་ རྫོང་ཁའི་ངག་གཤིས་རྒྱབ་ཁར་ལུས་མི་ཚུ་ གདོང་ཁར་བཏོན་ཏེ་དར་ཁྱབ་གཏང་ནི་ལུ་གཙོ་བོར་བཏོནམ་ཨིནམ་ལས་ ཕོག་ལམ་དང་མ་འཁྲིལ་བའི་རྫོང་ཁའི་མིང་ཚིག་བདེ་ཏོག་ཏོ་མེད་མི དེ་ལས་སྤྱིར་བཏང་མི་མང་གིས་འཇམ་ཏོང་ཏོ་སྦེ་ཧ་གོ་མ་ཚུགས་པའི་མིང་ཚིག་ཚུ་ དང་ཕུ་ག་དེ་སྦེ་སླབ་དོཝ་ཨིན་ན་ཞིབ་འཚོལ་ཐོག་བསྟུན་གྲོས་རྐྱབ་སྟེ་ ག་ར་གིས་ཧ་གོ་ཚུགས་པའི་ཐབས་ལམ་བཏོན་ནི། དེ་ལས་རྫོང་ཁ་ཕྱེད་དག་ཀོ་དག་སྦེ་སླབ་མི་ཚུ་རྗོད་སྒྲ་དག་ཆ་བཏོན་ཏེ་སླབ་ཚུགསཔ་བཟོ་ནིའི་དོན་ལུ་ གནམ་ལོ་མེ་སྤྲེལ་ཟླ་༤པའི་ཚེས་༡༩ སྤྱི་ཚེས་༢༥/༥/༢༠༡༦རེས་གཟའ་ཕུར་བུ་ དྲོ་པ་ཆུ་ཚོད་༨ལུ་ རྫོང་ཁ་སླབ་ཐངས་སྡེ་ཚན་འདི་བཟོ་ཡོདཔ་ཨིན་པས། ག་དེམ་ཅིག་སྦེ་ལས་ཀྱི་རླུང་འཕུར་ དུས་ཀྱི་ཆརཔ་བབ་སྟེ་ རྫོང་ཁ་སླབ་ཐངས་སྡེ་ཚན་ཀྱི་ཡོངས་འབྲེལ་འཆར་སྒོ་གཟིགས་ནིའི་ཐུགས་བཞེད་གནང་པ་ཅིན་ འོག་ལུ་བཀོད་དེ་ཡོད་མི་འདི་གུ་ཨེབ་སྟེ་གཟིགས་གནང་ལགས།

https://dzkha.wordpress.com

མིག་དཔེ་སྟོན།


འབྲུག་རྒྱལ་ཁབ་ནང་ དེ་བསྒང་དང་ཕྱདཔ་ད་ ད་རིས་ནངས་པ་བརྡ་བརྒྱུད་གོང་འཕེལ་ལས་བརྟེན་ཏེ་ རྩེད་རིགས་འགྲན་བསྡུར། ཚོང་འབྲེལ་འགྲེམ་སྟོན། སྒྲོམ་མཆོད་ཚེས་བཅུ། དབང་ལུང་ཁྲིད་གསུམ་འགོ་འདྲེན་འཐབ་པའི་སྐབས་ མི་གནམ་མེད་ས་མེད་འཛོམས་པའི་ནམ་དུས་ལུ་ སྡོད་སའི་ས་ཁོངས་དང་ བཞེས་སྒོ་ གཟབ་སྤྲོས་རྡིག་ཧིང་གི་སྐོར་ལས་ལོ་རྒྱུས་སླབ་ཨིན་པས། སླབ་སྲོལ་ལུ་ཨ་བ་གངམ་ད་དོང་འཚོལ་ཟེར་སླབ་དོ་བཟུམ་སྦེ་ འདོག་གིས་ར་ཆབ་གསང་གངམ་དང་ གསང་སྤྱོད་འཚོལ་ནི་འདི་ལུགས་སྲོལ་ཅིག་ཨིན་རུང་ འབད་ཟེར་སླབ་མི་ག་ཡང་མེད་པར་རང་གི་སེམས་ཀྱིས་ཚོར་འཁོལ་ཏེ་ མི་མང་གི་ཆབ་གསང་བཟོ་སྟེ་ མཐའ་འཁོར་ཧིང་སངས་ས་གཙང་སྦྲ་དང་ལྡནམ་སྦེ་བཞག་ནི་ལུ་བརྩོན་ཤུགས་བསྐྱེད་མི་ མི་སྡེ་ལུ་ཞབས་ཏོག་ཞུ་མི་ མིག་དཔེ་སྟོན་མི་ཅིག་སྤ་སངས་ཚེ་རིང་ཨིན་པས།

དུས་ཅི་སྤྱི་ལོ་༢༠༡༧ལོའི་ཐིམ་ཕུག་ལྷ་མོའི་སྒྲོམ་མཆོད་སྐབས་ ལྟདམོ་མཇལ་མི་ཆ་ཁྱབ་ ལཱ་ཁག་སྦེ་རྫོང་གི་ཕྱི་ཁར་ཆབ་གསང་འགྱོ་མི་དགོ་པར་ དགེ་འདུན་ཆབ་གསང་ནང་ལུ་ འཕྱག་བརྡར་དང་མཐུན་རྐྱེན་ཚུ་མ་ལང་ལངམ་སྦེ་བཙུགས་ཡོདཔ་མ་ཚད་ ཆབ་གསང་འཚོལཝ་འཇམ་ནིའི་དོན་ལུ་ རྫོང་གི་རྡོ་གཅལ་ནང་བརྡ་བྱང་ཧོང་སྟེ་ཡོད་ནི་འདི་གིས་ སྤྱིར་བཏང་ལྟདམོ་མཇལ་མི་དང་ འདིའི་ནང་ལས་རྒན་ཤོས་ཚུ་ལུ་ཨ་རྟག་དང་མ་འདྲའི་སྟབས་བདེ་ཧིང་དང་ཕན་ཐོགས་བྱུང་ནུག

ཡོངས་གྲགས་འཐོན་དགོ་མནོ་མི་སྤ་སངས།


རང་གི་མིང་ངོ་མ་ཚངIMG_0753མ་སྦེ་སླབ་ནི་འདི་བ་ བསྡུས་མིང་དར་ཁྱབ་བཏང་དགོ་པའི་གནད་དོན་མ་འདྲཝ་སྦེ་ཁུངས་བཀལ་ནི་ཡོད་རུང་ མང་ཤོས་ཅིག་ར་རང་གི་འཆམ་མཐུནམ་དང་ གཞན་གྱིས་ངོ་ཤེསཔ་འཇམ་ནིའི་དོན་ལུ་མ་གཏོགས་ གནད་དོན་ལོགས་སུ་སྦེ་ཁུངས་བཀལ་ནི་མེདཔ་ཨིན་པས།

མིང་ངོ་མ་སྤ་སངས་ཚེ་རིང་ཟེར་ཨིན་རུང་ ཡོངས་གྲགས་ལུ་སྤ་སུ་ཟེར་མི་ཕོ་རྒྱས་འདི་གིས་ མི་སྡེའི་ནང་སྟབས་མ་བདེཝ་བྱུང་ཡོད་མི་ཚུ་ ན་འཐན་སྦེ་དབྱེ་བ་དཔྱད་དེ་ སྤྱིར་བཏང་མི་མང་གིས་མཁྱེན་ཐབས་ལུ་ མི་སྡེ་བརྡ་བརྒྱུད་ཐོག་ལུ་བྲིས་ཏེ་ཁྱབ་སྤེལ་གཏང་མི་ཅིག་ཨིན།

ཁོ་གིས་སྤ་སུ་ཉིན་དེབ་ཟེར་བའི་ཡོངས་འབྲེལ་བཟོ་བཀོད་འབད་དེ་ཡོད་མིའི་ནང་ལུ་ གནད་དོན་མང་རབས་ཅིག་གི་སྐོར་ལས་བྲིས་ཏེ་ཡོདཔ་མ་ཚད་ འདིའི་ནང་ལས་ ཁྲོམ་དང་མི་མང་འཛོམས་སའི་ས་ཁོངས་ནང་ གནས་སྐབས་ཅིག་དང་ གཏན་རྐྱང་གི་ཆབ་གསང་བཟོ་སྟེ་ ཆབ་གསང་གཏངམ་དང་སེམས་སྐྱིད་ཏོང་ཏོ་ ཧིང་སངས་ས་སྦེ་བཞག་ནི་ལུ་བརྩོན་ཤུགས་བསྐྱེད་མི་འདི་ མི་སྡེའི་མིག་དཔེ་བཟང་པོ་ཅིག་ཨིན་པས།

ཁ་གསལ་དོན་ལུ་གཟིགས།

 

འགྱུར་བ།


མིའི་སེམས་འགྱུར་མི་འདི་གཙོ་བོ་ར་ གཞི་རྟེན་མཐུན་རྐྱེན་གོང་འཕེལ་ལས་བརྟེན་ཏེ་ཨིན་རུང་ ཧེ་མ་གི་ས་ཁོངས་དང་སྡོད་ཐངས་བཅའ་ཐངས་ཚུ་མཐོངམ་ད་ ཧེང་སྐལ་ར་འཁྲུལ་སྣང་ལངམ་ཨིན་པས།

སྐུ་འཕྲེང་རིམ་བྱོན།


20170406_155230-1

སྤྱི་ལོ་༢༠༡༦ལོར་ སངས་རྒྱས་ཀུན་འདུས་ཨོ་རྒྱན་རིན་པོ་ཆེའི་འཁྲུངས་ལོ་དང་ རྒྱལ་ཁབ་འདིའི་སྐྱབས་མགོན་ཞབས་དྲུང་ངག་དབང་རྣམ་རྒྱལ་མཆོག་འབྲུག་ལུ་བྱོན་ཏེ་ མི་ལོ་༤༠༠འཁོར་བའི་དུས་དྲན་བརྩི་སྲུང་ཞུ་ནི་དང་། དེ་ལས་འབྲུག་མི་ཡོངས་ཀྱི་བསོད་ནམས་གཅིག་མཐུན་གྱི་འབྲས་ལུ་ གནམ་བསྐོས་ལྷ་ཡི་རིགས་སྲས་མི་དབང་རྒྱལ་སྲས་འཇིགས་མེད་རྣམ་རྒྱལ་དབང་ཕྱུག་མཆོག་སྐུ་འཁྲུངས་པའི་དུས་སྟོན་བརྩི་སྲུང་ལུ་ཆེད་དུ་དམིགས་ཏེ་ ཞབས་དྲུང་རིན་པོ་ཆེའི་འཁྲུངས་རབས་ཕུན་སུམ་ཚོགས་པ་དང་ སྐུ་ཕྲེང་རིམ་བྱོན་གྱི་རྟོགས་བརྫོད་སྟབས་གཅིག་སྦེ་བྲིས་ཡོད་མི་འདི་གིས་ སྤྱིར་བཏང་མི་མང་ལུ་ཕན་ཐོགས་འབྱུང་མ་ཚུགས་རུང་ རེ་རེ་གཉིས་གཉིས་ལུ་ཕན་ཐོགས་འབྱུང་པའི་རེ་བ་ཡོད།

 

ཡོངས་འབྲེལ་ལུ་དང་འདོད་ཉུང་སུ།


index

འབྲུག་མི་མང་ཤོས་ཀྱིས་ ཨིང་སྐད་ཀྱི་ཡོངས་འབྲེལ་བཟོ་ནི་དང་ལྷག་ནི་ལུ་ དང་འདོད་གནམ་མེད་ས་མེད་ཡོད་རུང་ རྒྱལ་ཡོངས་སྐད་ཡིག་རྫོང་ཁའི་ཐོག་ལུ་ཡོངས་འབྲེལ་བཟོ་མི་ ཉིན་མའི་སྐར་མ་བཟུམ་ཅིག་ལས་མེདཔ་མ་ཚད་ རྫོང་ཁའི་ཡོངས་འབྲེལ་ལྷག་ནི་ལུ་དགའ་ཚོར་བསྐྱེད་མི་ཡང་ཉུང་སུ་ཅིག་ལས་བརྒལ་ཏེ་འདུག 

གཞུང་སྒེར་གྱི་རྫོང་ཁའི་ཡོངས་འབྲེལ་དུམ་གྲ་རེ་ཡོད་མི་ཚུ་ཡང་ ཨིང་སྐད་ཀྱི་ཡོངས་འབྲེལ་དང་ཕྱདཔ་ད་ དུས་ཚོད་ལུ་ དུས་མཐུན་བཟོ་སྲོལ་མེད་ནི་འདི་གིས་ ཡོངས་འབྲེལ་བལྟ་ནི་ལུ་དང་འདོད་ཡོད་རུང་ དེ་གིས་ཧེང་སྐལ་ར་སྒྱིད་ཐག་སྐྱུར་སུ་འཚམས་ཅིག་འགྱོཝ་མས། ཨིན་རུང་རྒྱལ་ཁབ་ཡར་རྒྱས་ཀྱི་འགྲོས་དང་བསྟུན་ཏེ་ ད་ལྟོ་བ་དྲགསཔ་སྦེ་རྫོང་ཁའི་ཡོངས་འབྲེལ་བཟོ་མི་གཅིག་ཤུལ་གཉིས་ཤུལ་དང་ ལྷག་ནི་ལུ་དང་འདོད་བསྐྱེད་མི་ཡར་འཕར་འགྱོ་བའི་རེ་བ་སྦོམ་ཡོད།

domstatsང་གིས་ལྟ་བ་ཅིན་ཐབས་ཤེས་དྲག་ཤོས་འདི་ར་ འབྲེལ་ཡོད་ལས་ཁུངས་དང་ལས་སྡེ་ཚུ་གིས་ རྫོང་ཁའི་ཡོངས་འབྲེལ་བཟོ་མི་ཚུ་ ངོས་འཛིན་གནང་སྟེ་ དམིགས་བསལ་གྱི་དགའ་ཚོར་བསྐྱེད་ནིའི་ལམ་ལུགས་ཅིག་བཟོ་ཚུགས་པ་ཅིན་ རྫོང་ཁའི་ཡོངས་འབྲེལ་བཟོ་མི་མང་སུ་འཐོན་ནི་རྐྱངམ་ཅིག་མིན་པར་ རྒྱལ་ཡོངས་སྐད་ཡིག་དར་ཁྱབ་གཏང་ནི་ལུ་ཕན་ཐོགས་འབྱུང་ཚུགས་ནི་ཨིན་པས།སླབ་སྲོལ་ལས་ མནོ་བའི་ཤིང་ཁར་བསམ་པའི་བྱ་འཁོར།། ཟེར་དོ་བཟུམ་སྦེ་ རྫོང་ཁ་གོང་འཕེལ་ལྷན་ཚོགས་ཀྱི་ཞལ་འཛོམས་ནང་ ང་གིས་གྲོས་འཆར་ཕུལ་མི་ནང་ ད་རིས་ནངས་པ་ རྫོང་ཁའི་ཡོངས་འབྲེལ་འཆར་སྒོ་བཟོ་ཡོད་མི་ཚུ་དང་ འདིའི་ནང་ལས་ཡང་ ངོ་རྐྱང་གིས་ ཡོངས་འབྲེལ་འཆར་སྒོ་བཟོ་མི་ཚུ་ རྫོང་ཁ་གོང་འཕེལ་ལྷན་ཚོགས་ཀྱིས་ངོས་འཛིན་གནང་སྟེ་

གཟེངས་བསྟོད་གནང་ཚུགས་པ་ཅིན་ ལས་ཀྱིས་ར་ རྫོང་ཁའི་ཡོངས་འབྲེལ་འཆར་སྒོ་བཟོ་མི་མང་སུ་འཐོན་ཏེ་ རྒྱལ་རབས་དང་ཆོས་བྱུང་ སྲུང་གི་རིགས་ཚུ་ག་ཅི་ར་དགོ་རུང་ དེ་འཕྲོས་ལས་འཇམ་ཏོང་ཏོ་སྦེ་ ཡོངས་འབྲེལ་ཐོག་ལས་འཐོབ་ཚུགས་ནི་ཨིནམ་ལས་ ཐབས་ལམ་དྲག་ཤོས་ཅིག་ཨིནམ་སྦེ་ཆ་བཞག་ཅི་ཟེར་ཞུ་ནི་ཨིན།།

བརྡ་བརྒྱུད་ཀྱི་རང་དབང་།


kkསྤྱི་ལོ་༢༠༡༢ལུ་ རྒྱལ་སྤྱི་བརྡ་བརྒྱུད་རང་དབང་གི་ཉིནམ་བརྩི་སྲུང་འབད་བའི་སྐབས་ འབྲུག་རྒྱལ་ཁབ་འདི་ སཱག་རྒྱལ་ཁབ་༩ གི་གྲས་ལས་ བརྡ་བརྒྱུད་ཀྱི་ དབང་རང་ཡོད་པའི་རྒྱལ་ཁབ་ ཨང་དང་པ་ཐོན་ཡོདཔ་ད་ འབྲུག་གི་འོག་ལས་ར་ མཱལ་དིབསི་དང་ བང་ལ་དེཤ་ རྒྱ་གར་ ཨཱཕ་ག་ནིས་ཏཱན་ པ་ཀིས་ཏཱན་ དེ་ལས་ ཤྲི་ལངྐ་རྒྱལ་ཁབ་ཚུ་ཨིན་པས།
དེའི་སྐོར་ལས་འཛམ་གླིང་རྒྱལ་ཁབ་༡༧༩ ནང་ བརྡ་བརྒྱུད་རང་དབང་ཡོད་མེད་ཀྱི་སྐོར་ལས་ སྙན་ཞུ་ཅིག་འབད་མིའི་ནང་ བཀོད་དེ་ཡོདཔ་ད་ སྤྱིར་བཏང་འཛམ་གླིང་རྒྱལ་ཁབ་ཚུ་ལས་འབད་བ་ཅིན་ འབྲུག་གིས་ ཨང་༧༠ པ་ཐོན་མི་དེ་ སྤྱི་ལོ་༢༠༡༠ དང་ཕྱདཔ་ད་ ཨང་རིམ་༦ གིས་ མར་བབས་སོང་ཡོདཔ་ད་ ལོ་དེ་ནང་ འབྲུག་གིས་ ཨང་༦༤ པ་ ཐོན་ཡོདཔ་ཨིན་པས། སཱག་ལུང་ཕྱོགས་ཀྱི་ རྒྱལ་ཁབ་ཚུ་ལས་འབད་བ་ཅིན་ མཱལ་དིབསི་གིས་ཨང་༧༣ པ་ཐོན་ཡོདཔ་ད་ དེའི་འོག་ལས་ བང་ལ་ཌེཤ་གིས་ཨང་༡༢༩ པ་དང་ རྒྱ་གར་གྱིས་ཨང་༡༣༡ པ་ ཨཱཕ་ག་ནིས་ཏཱན་གྱིས་༡༥༠ པ་ཀིས་ཏཱན་གྱིས་༡༥༡ དེ་ལས་ ཤྲི་ལངྐ་གིས་ཨང་༡༦༣ པ་ ཐོན་ཡོདཔ་ཨིན་པས། འཛམ་གླིང་ནང་ བརྡ་བརྒྱུད་རང་དབང་གི་ཨང་དང་པ་དེ་ ཕིན་ལེན་རྒྱལ་ཁབ་ཐོན་ཡོདཔ་ད་ བརྡ་བརྒྱུད་རང་དབང་མེད་མི་དེ་ ཨི་རི་ཊི་རྒྱལ་ཁབ་ཨིན་རུང་ བརྡ་བརྒྱུད་ནང་ལཱ་འབད་མིའི་ ཚེ་སྲོག་ལུ་གནོད་ཉེན་ཡོད་པའི་རྒྱལ་ཁབ་དེ་པ་ཀིས་ཏཱན་ཨིན་པས།
ད་རུང་ ཨེ་མི་རི་ཀའི་གཞུང་མིན་ཚོགས་པ་ཅིག་གིས་ དམངས་གཙོའི་གཞུང་དང་ འགྲོ་བ་མིའི་དབང་ཆའི་སྐོར་ལས་ བརྟག་ཞིབ་སྙན་ཞུ་འབད་མི་དང་འཁྲིལཝ་ད་ འབྲུག་འདི་ ཨང་༡༢༧ པ་ཨིནམ་ད་ ཨེ་ཤི་ཡ་ལུང་ཕྱོགས་ཀྱི་    རྒྱལ་ཁབ་༤༠གི་གྲས་ལས་འབད་བ་ཅིན་འབྲུག་གིས་ཨང་༢༦པ་ཐོན་ཡོདཔ་ཨིན་པས།
བརྡ་བརྒྱུད་ཀྱི་རང་དབང་དེ་ ཁག་གསུམ་ལུ་དབྱེ་སྟེ་ བརྟག་ཞིབ་འབད་བའི་སྐབས་ རང་དབང་ཅན་ནང་ རྒྱལ་ཁབ་༦༦ཚུད་ཡོདཔ་ད་ རང་དབང་ཆ་ཤས་ཅན་ནང་ རྒྱལ་ཁབ་༧༢ དེ་ལས་རང་དབང་མེད་པའི་སྡེ་ཚན་ནང་ རྒྱལ་ཁབ་༥༩ཚུད་ཡོད་མི་ལས་  འབྲུག་འདི་རང་དབང་ཤ་ཆས་ཀྱི་གྲས་ཁར་ཨིན་པས།

dd

འཛམ་གླིང་ནང་ བརྡ་བརྒྱུད་ཀྱི་རང་དབང་རྩ་ལས་མེད་མི་ རྒྱལ་ཁབ་དེ་ བི་ལ་རུས། ཀིའུ་བ། ཇུ་ནིའི། ཨི་ཊི་རི། ཨི་རཱན། བྱང་ཀོ་རི་ཡ། ཏྲག་མིན་ཊན།  དེ་ལས་ཡུ་བིས་ཀིས་ཊཱན་ཚུ་ཨིན་པས།
རྒྱལ་ཁབ་ཀྱི་ བརྡ་བརྒྱུད་ལས་ཁང་ཚུ་དང་ ལཱ་འབད་མི་ཚུ་གིས་འབད་བ་ཅིན་ རྒྱལ་ཁབ་གཞན་ཚུ་གི་ གནས་ཚད་ལུ་བལྟ་བ་ཅིན་ འབྲུག་གི་བརྡ་བརྒྱུདཔ་ཚུ་ལུ་ ཚེ་སྲོག་དང་འབྲེལ་བའི་ཉེན་ཁ་མེདཔ་ལས་ ལཱ་འབད་རུང་ བྱ་སྟབས་བདེ་ཏོག་ཏོ་འདུག་ཟེར་ཨིན་པས། ཁོང་གིས་འབད་བ་ཅིན་ ད་རེས་དཀའ་ངལ་ངོ་མ་ར་ གཞུང་གི་འགོ་དཔོན་ཚུ་གིས་ གནས་ཚུལ་དང་ཡིག་ཆ་ཚུ་ བྱིན་མ་བཏུབ་མི་དེ་ཨིན་རུང་ དེ་ཚུ་ཡང་ འགྲོས་ཀྱིས་སྦེ་ བསལ་ཚུགས་པའི་རེ་བ་བསྐྱེད་དོ་ཟེར་ སྤྱི་ཟླ་༥ པའི་ཚེས་༣ ལུ་ རྒྱལ་ཁབ་ནང་ འཛམ་གླིང་བརྡ་བརྒྱུད་རང་དབང་གི་ཉིནམ་བརྩི་སྲུང་འབད་བའི་སྐབས་སླབ་ཡོདཔ་ཨིན་པས།

1408711192_a83c4ae94eའཛམ་གླིང་སྤྱི་ཚོགས་ཀྱི་ ཡོངས་ཁྱབ་དྲུང་ཆེན་ བང་ཀི་མཱུན་གྱིས་འབད་རུང་ བརྡ་བརྒྱུད་དེ་ འཛམ་གླིང་གི་མི་ཚུ་ལུ་ བརྡ་དོན་དང་འབྲེལ་བའི་ གནད་དོན་སྤྲོད་མི་ཨིནམ་ལས་ ཁག་ཆེ་ཤོས་ཅིག་ཨིནམ་མ་ཚད་ རྒྱལ་ཁབ་ཀྱི་ངན་ལྷད་དང་ གཞུང་གི་སྲིད་བྱུས་ངན་པ་ དེ་ལས་ སྤྱིར་བཏང་བྱ་ངན་ཚུའི་སྐོར་ལས་ སྙན་ཞུ་འབད་མི་དེ་ བརྡ་བརྒྱུད་ཨིནམ་ལས་ ཁོང་ལུ་ མི་ཚུ་གིས་ ག་དེ་དྲག་དྲག་ རྒྱབ་སྐྱོར་འབད་དགོ་ཟེར་ ཨིན་པའི་གནས་ཚུལ།  འབྲུག་རྒྱལ་ཁབ་ནང་ ཚོགས་ཁང་མཐོ་ཤོས་ཅིག་ཨིན་མི་རྒྱལ་ཡོངས་ཚོགས་འདུ་ནང་ སྤྱི་ལོ་༢༠༡༥ལུ་བརྡ་བརྒྱུད་ཀྱི་དལ་དབང་སྐོར་ལས་གསུང་གྲོས་གནང་མི་དེ་གིས་ འབྲུག་བཟུམ་མའི་རྒྱལ་ཁབ་ནང་ དམངས་གཙོའི་རིང་ལུགས་ཀྱི་གཞི་འགྱམ་སྒྲིང་སྒྲིང་བཙུགས་པའི་ནམ་དུས་ལུ་    བརྡ་བརྒྱུད་ག་དེམ་ཅིག་ཁག་ཆེཝ་ཨིན་ནའི་གསལ་སྟོན་བྱུང་ཡི། དེ་མ་ཚད་ བརྡ་བརྒྱུད་ཀྱི་སྐོར་ལས་ གསུང་གྲོས་གནངམ་ད་ སྤྱི་ཚོགས་ཀྱིས་ བརྡ་བརྒྱུད་ལུ་ བརྩི་མཐོང་ག་དེམ་ཅིག་ཡོདཔ་ཨིན་ན་ཡང་ མངོན་གསལ་བྱུང་ཡོདཔ་བཞིན་དུ་ འདི་བཟུམ་མའི་ངོས་འཛིན་གནངམ་ད་ བརྡ་བརྒྱུདཔ་ཚུ་    དཔའ་ཉམས་བསྐྱེད་དགོ་པའི་གཞི་ཅིག་ཡང་ཨིན་མས།
མ་གཞི་ད་རེས་ནངས་པ་ རྒྱལ་ཁབ་ནང་ བརྡ་བརྒྱུད་ཀྱི་གྲས་ལས་ དམིགས་བསལ་གྱི་གསར་ཤོག་ཚུ་ ཡུན་བརྟན་གནས་མ་ཚུགས་པའི་ དཀའ་ངལ་བྱུང་སྟེ་ཡོདཔ་མ་ཚད་ བརྡ་བརྒྱུད་ཀྱི་དལ་དབང་གི་ཐད་ལུ་ལྷོདཔ་ད་ བརྡ་བརྒྱུདཔ་ཚུ་གིས་གནས་ཚུལ་བསྡུ་ལེན་འབད་ནི་ལུ་དཀའ་ངལ་བྱུང་བཞིན་ཡོད། ཨིན་རུང་སྤྱི་ལོ་༢༠༡༥ལོའི་ འཛམ་གླིང་བརྡ་བརྒྱུད་དལ་དབང་གི་ ཐོ་བཀོད་ཚད་གཞི་དང་འཁྲིལཝ་ད་ འཛམ་གླིང་རྒྱལ་ཁབ་༡༨༠ལས་ འབྲུག་རྒྱལ་ཁབ་འདི་ ཨང་གྲངས་༩༤པའི་ནང་ཚུད་མི་ལུ་ལྟ་བ་ཅིན་ དལ་དབང་ལེགས་ཤོམ་ཡོད་པའི་ བརྡ་མཚོན་ཨིན་པའི་ཁར་ འདས་པའི་ལོ་ནང་གནས་རིམ་ཨང་༡༠༤པའི་ནང་ ཚུད་མི་དང་ཕྱདཔ་ད་ ཨང་གྲངས་༡༠ཡར་འཕར་སོང་ཡོདཔ་ལས་ རྒྱལ་ཁབ་ཀྱི་དོན་ལུ་གནས་ཚུལ་ལེགས་ཤོམ་ཅིག་ཨིན་མས། དེ་གི་ནང་དོན་ཉིད་ལས་ སཱག་ལུང་ཕྱོགས་རྒྱལ་ཁབ་ཚུ་དང་ཕྱདཔ་ད་ འབྲུག་གི་གནས་རིམ་དེ་དྲག་ཤོས་ཅིག་ཨིནམ་ལས་   ཚ་གྱང་ལང་དགོཔ་ཅིག་མིན་འདུག་ཟེར་མནོཝ་མས།    ཨིན་རུང་རྒྱལ་ཡོངས་ཚོགས་འདུ་ནང་ གཞུང་སྐྱོང་དང་ ལྡོག་ཕྱོགས་ཚོགས་པའི་བར་ན་ གསུང་གྲོས་གནང་ཐང་ལུ་བལྟ་བ་ཅིན་ བརྡ་བརྒྱུད་ལས་ཁང་ཚུ་ནང་ལས་ བརྡ་བརྒྱུདཔ་ཉམས་མྱོང་ཅན་ཚུ་ཐོན་འགྱོ་མི་དེ་ གཞུང་གི་ཁ་ཐུག་ལས་ བརྡ་བརྒྱུད་ཀྱི་དལ་དབང་ལུ་ལགཔ་རྐྱབ་སྟེ་ བཀག་ཆ་རྐྱབ་དོ་བཟུམ་མའི་དོགས་སྣང་ཡོདཔ་བཟུམ་བརྡ་སྟོན་བྱུང་ཡི། མ་གཞི་བརྡ་བརྒྱུད་ཀྱི་འགན་ཁུར་འདི་ གཞུང་སྐྱོང་དང་ སྲིད་དོན་པ་ཚུ་ དགག་བཤེར་དང་ཚད་མཉམ་ཐོག་བཞག་ནི་ལུ་ གཙོ་རིམ་བཟུང་སྟེ་ གཞུང་གི་ཁ་ཐུག་ལས་ ནོར་བ་དང་འཐུས་ཤོར་བྱུང་མི་ཚུ་གསལ་བཀོད་དང་ འདི་བཟུམ་སྦེ་ མཐར་འཁྱོལ་བྱུང་མི་ཚུ་ ལེགས་བསྟོད་དང་བཅསཔ་སྦེ་    གནས་ཚུལ་ཁྱབ་སྤེལ་འབད་བཞིན་དུ་ཡོདཔ་ཨིན་རུང་ སྲིད་ཀྱི་ཕྱོགས་བཟུང་སྟེ་ བརྡ་བརྒྱུདཔ་ཚུའི་གཡོག་གི་ཉེན་སྲུང་ལུ་ཐོ་ཕོག་ནིའི་ཉེན་ཁ་ཡོད་རུང་ དེའི་བདེན་རྫུན་ཕྱེ་ནི་འདི་ བརྡ་བརྒྱུད་སྤྱོད་མི་ཚུ་ལུ་འགན་ཁག་ཕོགཔ་ཨིན་པས་ཟེར་ཞུ་ནི་ཨིན།

ཁྱིམ་གྱི་བཟོ་བཀོད།


sང་བཅས་རའི་རྒྱལ་ཁབ་ནང་ ཁྱིམ་གྱི་རིགས་ག་ཅི་ར་ཨིན་རུང་ རང་ལུགས་ཀྱི་བཟོ་བཀོད་ལུགས་ལུགས་གཞི་དང་ རྒྱུ་ཆས་ཀྱི་རིགས་ཚུ་ཡང་ རྒྱལ་ཁབ་ནང་འཁོད་ལས་འཐོན་པའི་ཅ་ཆས་ཚུ་ལག་ལེན་འཐབ་སྟེ་རྐྱབ་མ་གཏོགས་ ཕྱི་རྒྱབ་ཁབ་ལས་རྒྱུ་ཆས་ནང་འདྲེན་འཐབ་སྟེ་ ཁྱིམ་རྐྱབ་སྲོལ་མེདཔ་ཨིན།

ཁྱིམ་གྱི་འོག་ཐོག་ལུ་ ནོར་བཏགས་ས་དང་ ཐོག་ཁར་ཐབ་ཚང་དང་བར་ཀ་སྦྲགས་ཏེ་ཨིན་རུང་ བར་ན་རྣམ་དག་སྒོ་གསུམ་བཙུགས་ཏེ་ཡོདཔ་ཨིན། ཁང་མིག་གཅིག་མཆོད་བཤམ་དང་ ཁང་མིག་ཆུང་སུ་ཅིག་གཉེར་ཚང་བཞག་ས་ཨིནམ་མ་ཚད་ བར་ན་ཟུར་ཅིག་ཁར་བངམ་བཙུགས་ཏེ་ རྒྱུ་བཞག་ས་ཨིན། ཁྱིམ་གྱི་རྒྱབ་ཁ་ལས་གཡོག་ཅུང་བཏགས་ཏེ་ཡོད་མི་འདི་ ཆབ་གསང་སྦེ་ལག་ལེན་འཐབ་ཨིན།

imagesd

རྒྱལ་ཁབ་ཡར་རྒྱས་ཀྱི་འགྲོས་དང་བསྟུན་ཏེ་ བར་སྐབས་ཅིག་ལས་ གསོ་བའི་ལམ་སྟོན་དང་འཁྲིལ་ཏེ་ ཆབ་གསང་ཁྱིམ་གྱི་ཕྱི་ཁར་ལོགས་སུ་རྐྱབ་ཞིན་ན་ལས་ མཐའ་འཁོར་གཙང་སྦྲ་དང་གཟུགས་ཁམས་འཕྲོད་བསྟེན་ལུ་ཕན་ཐོགས་བྱུང་སྟེ་ཡོདཔ་ཨིན།

images

དེ་ལས་རིམ་གྱིས་འབྱོར་པ་ལྡན་མི་ཚུ་གིས་ རྩིས་ས་གིས་ཆབ་གསང་ཁྱིམ་གྱི་ཟུར་ཁར་སྦྱར་ཏེ་བཟོཝ་མ་ཚད་ ཆུ་མཛོད་ཆབ་གསང་གི་ཐོག་ཁར་བཀལ་ཏེ་ ཧིང་སངས་ས་སྦེ་ག་ནེ་བ་དགའ་ཏོག་ཏོ་དང་སྟབས་བདེ་ཏོག་ཏོ་སོང་ཡོདཔ་ཨིན།

ད་རིས་ནངས་པ་ཁྲོམ་ཁར་རྩིས་ས་དང་ལྕགས་བཙུགས་ཏེ་སྒྲིང་ཁྱིམ་ཐོག་༦ལས་ལྷག་སྟེ་རྐྱབ་སྲོལ་དར་ཁྱབ་སོང་སྟེ་ཡོདཔ་ཨིན།

ལྷོ་ཀོ་རི་ཡ་རྒྱལ་ཁབ་ནང་ཡང་ ཧེ་མ་གི་དུས་ལུ་ རང་ལུགས་བཟོ་བཀོད་ལྡན་པའི་ཁྱིམ་ཚུ་གིས་གང་སྟེ་img_20151121_064601
ཡོད་རུང་ བར་སྐབས་ཅིག་ལས་ མཐོ་ཚད་གཅིག་བ་གཅིག་རྔམ་པའི་ཁྱིམ་ཚུ་རྐྱབ་ནི་འགོ་བཙུགས་ནུག

ད་རིས་ནངས་པ་ལྷོ་ཀོ་རི་ཡ་གི་རྒྱལ་ས་ལྟེ་བ་ལུ་ ད་རིས་ནངས་པ་རྐྱབ་སྟེ་ཡོད་སྒྲིང་ཁྱིམ་འདི་ བཟོ་བཀོད་གསརཔ་ཅིག་ཨིནམ་ལས་ མི་ག་ར་འ་ནེ་ཁྱིམ་འདི་བལྟ་བར་འོངམ་ཨིན་པས།

ལྷ་ལྡིང་ལུ་གནས་སྐོར་སོང་ཡོདཔ།


སྤ་རོ་ལུང་ཕྱོགས་ནང་ ཕྱག་མཆོད་ཀྱི་ཡུལ་དང་ བསོད་ནམས་བསག་པའི་རྟེན་ གནས་དང་དགོན་སྡེ་མང་རབས་ཅིག་ཡོད་པའི་གྲས་ རྒྱལ་ཁབ་ནང་ལུ་ རྙིང་ཤོས་ཅིག་ཨིན་མི་ ལྷ་ལྡིང་དགོན་པའི་ནང་རྟེན་ཇོ་བོ་མི་བསྐྱོད་རྡོ་རྗེ་དང་ རྒྱལ་བ་རིགས་ལྔ། སྟོན་པ་ཛིཀྴིམ། སྤྱན་རས་གཟིགས་བགེགས་ཐར་བྱེད། ཆོས་སྐུ་རྡོ་རྗེ་འཆང་ཚུ་ བོད་ས་སྐྱ་ལུ་བཞེངས་ཏེ་ཡོད་མི་འདི་ མདུན་གྱི་གནམ་མཁའ་ལས་མར་འཕུར་ཏེ་ ལྷ་འདི་ནང་ལུ་བྱོན་ཡོདཔ་ལས་ ལྷ་ལྡིང་ཟེར་ཡོངས་གྲགས་སོང་ནུག།

 

 

དེ་ལས་ཡུན་མ་འགྱངས་པ་ ས་སྐྱ་པན་ཆེན་བྱོན་ཏེ་རབ་གནས་གནང་བའི་སྐབས་ལུ་ རྟེན་གྱི་གཙོ་བོ་ཇོ་བོ་མི་བསྐྱོད་རྡོ་རྗེའི་ཞལ་ལས་ དད་མོས་བསྐྱེད་དེ་ནཱ་འོང་མི་ཚུ་ ངན་སོང་གསུམ་ལུ་དང་ དམྱལ་བར་སྐྱེ་མི་དགོ་ཟེར་གསུང་བྱོན་ཡོདཔ་ལས་ ལྷ་ཁང་དེ་བྱིན་རླབས་ཅན་ཨིན་པས།

རང་ལུགས་གནམ་ལོ་ མེ་སྤྲེལ་རང་ཟླ་༢པའི་ཚེས་༢༦ལུ་ བརྩི་མཐོང་ཚོགས་པ་གིས་འགོ་འདྲེན་འཐབ་སྟེ་ གནས་བགྲེས་ཀུན་བཟང་ཚོགས་འགོཔ་སྦེ་ཞུས་ཏེ་ མི་འཁྲུགསཔ་སྟོང་མཆོད་གནང་བའི་སྐབས་ ང་བཅས་བཟའ་ཚང་ཚུ་ཡང་གྲས་ཁར་གཏོགས་པའི་སྐབས་ དྲིན་ཆེ་བ་ཕམ་གཉིས་ཀྱིས་གཙོས་པའི་མཁའ་ཁྱབ་ཀྱི་འགྲོ་བ་རིགས་དྲུག་ཡོད་ཚད་གཅིགཔོ་ ཁམས་གསུམ་འཁོར་བའི་གནས་རིགས་ལས་གྲོལ་ཏེ་ མཐོ་རིས་ལྷ་དང་མིའི་བདེ་བ་དང་ ཐར་པ་སངས་རྒྱས་ཀྱི་གོ་འཕང་འཐོབ་བཅུག་ཟེར་བའི་སྨོན་ལམ་བཏབ་སྟེ་ བསམ་པ་རྫོགས་ཅི་ཟེར་ཞུ་ནི་ཨིན།།

 

 

 

 

 

 

 

 

 

 

 

 

 

 

 

 

དགོན་ཚེ་ཕུག་གི་གནས་བཤད་བསྡུས་པ།

 

སྤུ་ན་ཁ་ལས་ མགར་ས་ཁ་ཐུག་ སྣུམ་འཁོར་གཞུང་ལམ་བདའ་སྟེ་ ཀི་ལོ་མི་ཊར་༢༥དེ་ཅིག་གི་ས་ཁར་ དགོན་ཤར་རི་ཟམ་པ་ལས་ སོ་ནམས་ཞིང་ལམ་བདའ་སྟེ་ ཀི་ལོ་མི་ཊར་༡༠དེམ་ཅིག་འགྱོཝ་ད་ ཚེ་ཕུག་གནས་ནང་ལྷོདཔ་ཨིན་པས། རྐང་སྟོང་སྦེ་འགྱོ་བ་ཅིན་ དུས་ཡུན་ཆུ་ཚོད་༣དེ་ཅིག་འགོར་དོ་ཡོདཔ་ཨིན་པས།

ཚེ་བུམ།

སྤུ་ན་ཁ་ རྫོང་ཁག་ དགོན་ཚེ་ཕུག་ལུ་ དུས་རབས་༨པའི་ནང་ ཨོ་རྒྱན་གུ་རུ་རིན་པོ་ཆེ་གིས་ཞབས་ཀྱིས་བཅགས་ཏེ་ ས་གནས་ཀྱི་བདུད་དང་ དམ་སྲིན་དྲེགས་པ་ཅན་ཚུ་ དམ་ལུ་བཏགས་གནང་པའི་ཤུལ་ལས་ ཟླཝ་༡གི་རིང་ རྡོ་རྗེ་ལྟ་བུའི་ཏིང་ངེ་འཛིན་ལུ་ ཚེའི་སྒྲུབ་པ་གནང་བཞུགས་པའི་སྐབས་ མགོན་པོ་ཚེ་དཔག་མེད་ཀྱི་ཞལ་གཟིགས་ཏེ་ ཚེ་ལ་དབང་བའི་རིག་འཛིན་གྱི་བཀའ་དབང་ཞུས་ཏེ་ ཚེའི་དངོས་གྲུབ་ཐོབ་པའི་བརྡ་མཚོན་ལུ་ ཚེ་བུམ་དེ་ བྱག་ཕུག་རིང་ཚད་ཁྱིམ་ཐོག་༤དེ་ཅིག་གི་ནང་ན གཏེར་ལུ་སྦ་གནང་ཞིནམ་ལས་ གནས་ཀྱི་མིང་ཚེ་ཕུག་ཟེར་བཏགས་གནང་ཡོདཔ་ཨིན་པས།

ནེ་པཱལ་རྒྱལ་ ཁབ་ནང་ཡོད་པའི་ གུ་རུ་རིན་པོ་ཆེའི་སྦས་གནས་ བྲག་ཕུག་མ་ར་ཏི་ཀ་ལས་ ཚེའི་དངོས་གྲུབ་ཞུ་ནིའི་གོ་སྐབས་མ་འཐོབ་རུང་ སྤུ་ན་ཁ་ དགོན་ཚེ་ཕུག་ལུ་ཡོད་པའི་ གུ་རུ་རིན་པོ་ཆེའི་ཚེ་བུམ་ལས་ དངོས་གྲུབ་ཞུ་བ་ཅིན་ བྱིན་རླབས་ལུ་ཁྱད་པར་མེད་མི་དེ་ཡང་ ཨོ་རྒྱན་གུ་རུ་རིན་པོ་ཆེ་གིས་ བྲག་ཕུག་མ་ར་ཏི་ཀ་ལུ་ཡང་ ཚེའི་སྒྲུབ་པ་གནང་སྟེ་ མགོན་པོ་ཚེ་དཔག་མེད་ཀྱི་ ཞལ་གཟིགས་པའི་གནས་ཨིནམ་ལས་བརྟེན་ཏེ་ཨིན་པས།

ཚེ་ཆུ།
ཚེ་བུམ་གྱི་གནས་རྡོ་ལས་ ཚེ་ཆུ་ཟེར་ གུ་རུ་རིན་པོ་ཆེ་མཆོག་ ཐུགས་དམ་གནང་བཞུགས་པའི་སྐབས་ མགོན་པོ་ཚེ་དཔག་མེད་ཀྱི་ཞལ་གཟིགས་ཏེ་ ཚེའི་གྲུབ་པ་ཐོབ་པའི་རྟགས་ སྒྲུག་ཕུག་འོག་ལས་ ཚེ་ཆུ་བཏོན་གནང་མི་སྒྲུབ་ཆུ་དེ་ ད་རེས་ནངས་པ་ བྱག་ཕུག་ནང་ལས་འཐེན་ཏེ་     འཐུང་ཆུ་ཀ་ལི་བཟུམ་སྦེ་བཟོ་སྟེ་ཡོད་ས་ལས་   བྱིན་རླབས་ཞུ་དོ་ཡོདཔ་ཨིན་པས།
ཨོ་ཨཱ་ཧཱུ་རང་བྱོན།
གུ་རུ་འཕུར་བྱོན་སའི་རྡོ་གི་གུ་ སངས་རྒྱས་ཀྱི་སྐུའི་ས་བོན་ཨོྂམ་དང་ གསུང་གི་ས་བོན་ཨཱ་ དེ་ལས་ ཐུགས་ཀྱི་ས་བོན་ཧཱུྂ་གསུམ་ རྡོ་གུ་ག་ནེ་བ་ཡ་མཚན་ཆེ་ཏོག་ཏོ་སྦེ་མཇལ་ནི་ཡོདཔ་ད། ཨོྂ་ཨཱ་ཧཱུྂ་ རྡོ་གནགཔ་གུ་ལུ་ ཚོས་གཞི་ དཀརཔ་སྦེ་མཇལ་ཚུགས་དོ་ཡོདཔ་ཨིན་པས། གུ་རུའི་སྒྲུབ་ཕུག་གཡས་ཁ་ཐུག་ལུ་  མཁའ་འགྲོ་ཡེ་ཤེས་མཚོ་རྒྱལ་གྱི་སྒྲུབ་ཕུག་ཡང་མཇལ་ནི་ཡོདཔ་ཨིན་པས།
སྒྲོལ་མ་༢༡གི་གནས་རྡོ།
བྱག་ཕུག་གུ་ རྡོ་སྦོམ་ཅིག་ཡོད་མིའི་ནང་ན་ སྒྲོལ་མ་༢༡གི་ གནས་རྡོ་མཇལ་ནི་ཡོདཔ་ད། དེ་ཡང་རིང་ཚད་ཕིཊི་༡ལྷགཔ་ཅིག་འབད་མི་གནས་རྡོ་ལས་     མ་འོངས་པའི་ནང་ སྒྲོལ་མ་༢༡འབྱོན་འོང་ཟེར་ཨིན་པས།

འབྲུག་པ་དཀར་བརྒྱུད་པའི་བླ་ཆེན་ཚུ་དང་འབྲེལ་གནད་སྦོམ་ཡོདཔ།
ད་རུང་སྤྱི་ལོ་༡༢༢༥ལུ་ སྒྲུབ་ཕུག་དེ་ནང་ ཕ་ཇོ་འབྲུག་སྒོམ་ཞིག་པོ་གིས་ ཟླཝ་༡གི་རིང་ ཐུགས་དམ་གནང་བཞུགས་པའི་སྐབས་ མཁའ་འགྲོ་ཡེ་ཤེས་མཚོ་རྒྱལ་གྱི་ཞལ་གཟིགས་ཏེ་ མཁའ་འགྲོ་སྙིང་ཐིག་གི་གདམས་ངག་གསན་གནང་བའི་སྐོར་ གནས་ཡིག་ནང་འཁོད་དེ་འདུག།

དུས་རབས་༡༤ པའི་ནང་ གཏེར་ཆེན་རྡོ་རྗེ་གླིང་པ་གིས་ ཕུརཔ་དང་ གཞན་གཏེར་ལེ་ཤ་ཅིག་བཞེས་ཡོད་པའི་ལོ་རྒྱུས་ཡོདཔ་མ་ཚད། ད་རུང་རབ་འབྱུང་༩པའི་ནང་ རྒྱལ་བ་རྒོད་ཚང་པའི་བུ་སློབ་ རྒྱལ་མཚན་དཔལ་བཟང་བྱོན་ཏེ་ བྱག་ཕུག་གི་གཡོན་ཁ་ཐུག་ལུ་ གདན་ས་བཅགས་ཏེ་ ལྷ་ཆུང་ཀུ་ཅིག་བཞེངས་གནང་ནུག་ཟེར་ཨིནམ་ད་ རྒོད་ཚང་པ་དེ་ འགྲོ་བའི་མགོན་པོ་གཙང་པ་རྒྱ་རས་ཀྱི་བུ་སློབ་ཅིག་ཨིན་པས། ཨིན་རུང་བར་སྐབས་ཅིག་ལས་ བླམ་ཤངས་ཀྱི་བརྒྱུད་འཛིན་ཚུ་གིས་བདག་འཛིན་འཐབ་སྟེ་ འབའ་རའི་ཆོས་ལུགས་དར་ཞིང་རྒྱས་ཏེ་འབད་རུང་ སྤྱི་ལོ་༡༦༣༤ལུ་ དཔལ་ལྡན་འབྲུག་པའི་བསྟན་པའི་བདག་པོ་ ཞབས་དྲུང་ངག་དབང་རྣམ་རྒྱལ་མཆོག་གིས་རྩིས་བཞེས་ཏེ་ སྒྲུབ་ཕུག་ནང་ལུ་ཐུགས་དམ་གནང་པའི་སྐབས་ གུ་རུ་རིན་པོ་ཆེ་གི་ཞལ་གཟིགས་ཏེ་ སྤུངས་ཐང་བདེ་བ་ཆེན་པའི་ཕོ་བྲང་བཞེངས་ནིའི་ལུང་བསྟན་གནང་ནུག
སྤྱི་ལོ་༡༩༥༨ ལུ་ རྒྱལ་ཡུམ་ཞིང་གཤེགས་ ཨ་ཞེ་ཕུན་ཚོགས་ཆོས་སྒྲོན་གྱིས་ གནས་དེ་ཁར་ ཟླཝ་༡གི་རིང་ ཚེ་སྒྲུབ་གནང་བའི་ཤུལ་ལུ་ དགོན་པ་དེ་ རྒྱ་སྐྱེད་གནང་ཡོདཔ་ད། སྤྱི་ལོ་༡༩༦༠ལུ་ ཞིང་གཤེགས་དམ་པ་ སྐྱབས་རྗེ་ དགེ་འདུན་རིན་ཆེན་མཆོག་གིས་ཡང་ ཐུགས་དམ་གནང་སྟེ་བཞུགས་པའི་སྐབས་     ཞབས་དྲུང་དག་སྣང་མའི་ཕྱག་དཔེ་ཕྱོགས་བསྒྲིགས་མཛད་པའི་ལོ་རྒྱུས་ཡོདཔ་ཨིན་པས།
ཞབས་རྗེས།
དགོན་ཚེ་ཕུག་དགོན་པའི་འོག་ལུ་ རྡོ་སྦོམ་ཅིག་གུ་ ཨྱོན་གུ་རུ་རིན་པོ་ཆེའི་ ཞབས་རྗེས་དྲུག་ལྷགཔ་ཅིག་ མཇལ་ཚུགས་དོ་ཡོདཔ་ད་ ཞབས་རྗེས་དེ་ཡང་ ཨྱོན་གུ་རུ་རིན་པོ་ཆེ་གིས་ དགོན་ཚེ་ཕུག་ལས་ དགོན་ཚེ་ཆུ་བྲག་ཟེར་ མགར་སར་འགྱོ་སའི་ལམ་ཁར་ཡོད་པའི་ གནས་དེ་ནང་ འཕུར་བྱོན་པའི་སྐབས་ མ་འོངས་པའི་ཕྱག་མཆོད་ཀྱི་རྟེན་སྦེ་ རྡོ་གུ་ཞབས་རྗེས་གསལ་ཏོག་ཏོ་སྦེ་བཞག་གནང་ནུག

ནང་རྟེན།
དགོན་ཚེ་ཕུག་དགོན་པའི་ནང་རྟེན་ རྩ་ཅན་དེ་ གུ་རུ་གསུང་བྱོན་མིའི་སྐུ་འདྲ་ཨིནམ་བཞིན་དུ་ སྐུ་འདྲ་དེ་ སྤྱི་ལོ་༡༦༨༩ལུ་ སྡེ་སྲིད་༤པ་ རྒྱལ་སྲས་བསྟན་འཛིན་རབ་རྒྱས་ཀྱིས་ ཐིམ་ཕུག་རྟ་མགོ་ལུ་ཡོད་པའི་ ཇོ་བོའི་སྐུ་འདྲ་བཞེངས་ནིའི་དོན་ལུ་ ནེ་པཱལ་ལས་ འཇིམ་བཟོ་མཁས་མཆོག་པཉྩ་དྷེ་ཝ་འབྲུག་ལུ་ཞུས་ཏེ་ སྤུ་ན་ཁ་ཐང་རྫོང་ནང་སྦེ་ ཇོ་བོ་དང་ ད་རེས་དགོན་ཚེ་ཕུག་ལུ་བཞུགས་ཏེ་ཡོད་པའི་ གུ་རུའི་སྐུ་འདྲ་བཞེངས་ཏེ་ གུ་རུ་དེ་ བུམ་ཐང་སྐུ་རྗེས་ལྷ་ཁང་ནང་ལུ་ཞུ་ནི་སྦེ་ ཞལ་བུམ་ཐང་ཁ་ཐུག་ལུ་བཞག་པའི་སྐབས་ དགོན་ཚེ་ཕུག་ཁ་ཐུག་འགོར་བཞུགས་ཏེ་འབད་རུང་ མི་ཚུ་གིས་ སྐུ་འདྲའི་ཞལ་ལོག་སྤུ་ན་ཁར་འགོར་བའི་སྐབས་ སྐུ་འདྲ་གིས་ ངེའི་ལུང་བསྟན་དེ་ དགོན་ཚེ་ཕུག་ལུ་ཡོད་ཟེར་གསུང་བྱོན་པའི་ཤུལ་ལས་ གུ་རུ་གསུང་བྱོན་མ་ཟེར་ཞུ་ཡོདཔ་ཨིན་པས། དེའི་ནང་གཟུངས་ཡང་ བླ་ཆེན་དམ་པ་ཚུ་གི་ཕྱག་ལུ་ཡོད་པའི་     སྐུ་གསུང་ཐུགས་ཀྱི་རིང་བསྲེལ་ཚུ་ཕུལ་ཡོདཔ་ཨིན་པས།
རིང་ཚད་ ཕིཊི་༤དེ་ཅིག་འབད་མི་སྐུ་འདྲ་དེ་ རྒྱུ་གསེར་ཟངས་ཀྱིས་བཞེངས་མི་གུ་ལུ་ གསེར་སྒྲོན་ཡོདཔ་ད་ སྤྱིར་བཏང་གུ་རུའི་སྐུ་འདྲ་བཟུམ་སྦེ་མིན་པར་ དབུ་ལུ་རིགས་ལྔ་བཞེས་ཏེ་ཡོདཔ་ཨིན་པས།

ཨོ་རྒྱན་རིན་ པོ་ཆེའི་གཡས་གཡོན་ཚེ་དཔག་མེད་དང་ ཞབས་དྲུང་རིན་པོ་ཆེའི་སྐུ་འདྲ་མཇལ་ནི་ཡོདཔ་མ་ཚད་ གཡོན་ལུ་ཚེ་ལྷ་རྣམ་གསུམ་བཞུགས་ཏེ་ཡོད་མི་དེ་ སྤྱི་ལོ་༢༠༠༤ལུ་ རྒྱལ་ཡུམ་ཚེ་རིང་པངྨོ་དབང་ཕྱུག་མཆོག་གིས་ཕུལ་གནང་ཡོདཔ་ཨིན་པས་ཟེར་ཞུ་ནི་ ཨིན།

བསྡུ་སྒྲིགཔ་ རྟ་ལོགཔ་སངས་རྒྱས་བསྟན་འཛིན།

 

དཔལ་འབྱོར་གྱི་གནས་ཚད།


རྒྱལ་ཁབ་གོང་འཕེལ་གྱི་འགྱུར་བ་དང་བསྟུན་ རྫོང་ཁག་༢༠དང་ལྷག་པར་དུ་ རྒྱལ་ས་ཐིམ་ཕུག་ལུ་ སྒྲིང་ཁྱིམ་སྟོང་ཕྲག་ལས་ལྷག་སྟེ་རྐྱབ་མི་ཚུ་དང་། ཚོང་འབྲེལ་འཐབ་མི་ཚུ་ལུ་སྐྱིན་འགྲུལ་བྱིན་མི་འདི་གིས་ དངུལ་ཁང་ཚུ་ནང་མ་དངུལ་མེད་མི་ལུ་བརྟེན་ རྒྱལ་གཞུང་དངུལ་ལས་དབང་འཛིན་གྱིས་སྐྱིན་འགྲུལ་མཚམས་འཇོག་འབད་ཡོདཔ་སྦེ་གཞུང་ འབྲེལ་གནས་ཚུལ་ནང་བཀོད་ནུག།
རྒྱལ་ཁབ་ནང་ལུ་ རུ་པི་འདི་སྔོན་མ་བཟུམ་སྦེ་མ་ཐོབ་པའི་དཀའ་ངལ་ཡོད་པའི་གནད་དོན་ཐོག་ལུ་ སྤྱི་ལོ་༢༠༡༢ལོར་ འབྲུག་ཚོང་དང་བཟོ་གྲྭ་ཚོགས་སྡེ་གིས་  ལས་སྡེ་ཚོགས་པ་དང་ དངུལ་ཁང་ཚུ་དང་ཅིག་ཁར་ མཉམ་འབྲེལ་འབད་དེ་ ཞིབ་དཔྱད་ཅིག་འབད་མི་སྙན་ཞུ་དང་འཁྲིལ་པ་ཅིན་ ད་རེས་རྒྱལ་ཁབ་ནང་ སྒེར་སྡེ་གི་ལས་འགུལ་འགོ་འདྲེན་འཐབ་པའི་བསྒང་ཡོད་མི་དང་ ལས་འགུལ་འགོ་འདྲེན་འཐབ་ནི་སྦེ་ཡོད་མི་ཚུ་རྩིས་ཏེ་ དངུལ་ཀྲམ་ས་ཡ་སྟོང་ཕྲག་༤དེ་ཅིག་གི་ མ་དངུལ་དགོ་པའི་ ལས་འགུལ་འདི་ཚུ་ཡོདཔ་སྦེ་མཐོང་ནུག ཨིན་རུང་ མ་དངུལ་མེད་ནི་འདི་གིས་ ལས་འགུལ་མང་ཤོས་ཅིག་ར་ འགོ་བཙུགས་མ་ཚུགས་པར་ལུས་ཏེ་ཡོདཔ་མ་ཚད་ ལས་འགུལ་ལ་ལོ་ཅིག་ མཇུག་བསྡུ་མ་ཚུགས་པར་ལུས་ཏེ་ཡོདཔ་ཨིན་པས། འབྲུག་ཚོང་དང་བཟོ་གྲྭ་ཚོགས་སྡེ་གི་སྲིད་འཛིན་གྱིས་སླབ་མི་ནང་ རུ་པི་མ་ལང་པའི་དཀའ་ངལ་ཡོད་མི་དང་ དངུལ་ཁང་ཚུ་ནང་ལུ་ དངུལ་ཚབ་སྤྲོད་མ་ཚུགས་མི་ཚུ་གི་ཐད་ལུ་ ངོས་ལེན་འབད་དགོ་ཟེར་ཨིན་མས།རྒྱལ་གཞུང་དངུལ་ལས་དབང་འཛིན་གྱི་རྩིས་ཐོ་དང་ འཁྲིལཝ་ད་ རྒྱལ་ཁབ་ཀྱི་དཔལ་འབྱོར་གནས་ཚད་ནང་ དངུལ་ཚབ་སྤྲོད་མ་ཚུགས་པའི་དཀའ་ངལ་མེདཔ་སྦེ་ཨིན་རུང་ སྤྱི་ལོ་༢༠༡༢་སྤྱི་ཟླ་༣པའི་ནང་ལས་ར་ དངུལ་འབྲེལ་ལས་ཁང་ཚུ་གིས་ སྐྱིན་འགྲུལ་མ་བྱིན་མི་ལུ་བལྟ་བ་ཅིན་ དངུལ་ཚབ་སྤྲོད་ནི་གི་ནང་ དཀའ་ངལ་ཡོདཔ་བཟུམ་སྦེ་ར་མཐོངམ་མས་ཟེར་ཨིན་མས།
རྒྱལ་ཁབ་ནང་ལུ་ རུ་པི་མ་ལང་པའི་དཀའ་ངལ་ཐོན་མི་འདི་བསལ་ཐབས་ལུ་ འབྲུག་ཚོང་དང་བཟོ་གྲྭ་ཚོགས་སྡེ་གི་ཁ་ཐུག་ལས་ གཞུང་ལུ་ ངོས་ལེན་གྱི་ཞུ་བ་ ཁག་བཅུ་ཐམས་སྦེ་ཕུལ་ཏེ་ཡོདཔ་ད་ ངོས་ལེན་གྱི་ཞུ་བ་ཚུ་ཡང་ ཕྱི་ལས་སྐྱིན་འགྲུལ་ལེན་ནི་གི་ལམ་སྟོན་དང་ ཡུན་རིངམོ་སྦེ་ དངུལ་གསོག་འཇོག་འབད་ནི་གི་ལམ་སྟོན་ཚུ་ བསྐྱར་ཞིབ་འབད་ནི་དང་ ཚོང་སྡེ་གསརཔ་འགོ་བཙུགས་ནི་དང་ ཕྱི་ཡི་མ་རྩ་གཞི་བཙུགས་ཀྱི་ དངུལ་ཁང་སྒོ་ཕྱེ་ནི་གི་ལམ་ལུགས་ཚུ་ གོ་ཡངས་དྲག་བཟོ་དགོ་པའི་སྙན་ཞུ་ཕུལ་མི་ལུ་ འབྲུག་ཕུན་སུམ་ཚོགས་པའི་གཞུང་གིས་ འབྲུག་ཚོང་དང་བཟོ་གྲྭ་ཚོགས་སྡེ་གི་ཁ་ཐུག་ལས་ འདི་བཟུམ་གྱི་ངོས་ལེན་གྱི་ཞུ་བ་ཕུལ་མི་འདི་ ལེགས་ཤོམ་ཨིན་ཏེ་ར་འབད་རུང་ ངོས་ལེན་འདི་ཚུ་ ཡིད་ཆེས་ཏོག་ཏོ་ཅིག་མིན་འདུག་ཟེར་བཀོད་མི་དེ་ཡང་ གཞུང་དང་ རྒྱལ་གཞུང་དངུལ་ལས་དབང་འཛིན་ དེ་ལས་སྒེར་སྡེ་དང་ དངུལ་ཁང་ཚུ་གི་ཁ་ཐུག་ལས་ ཐབས་ཤེས་ག་དེ་དྲག་དྲག་བཏོན་ཏེ་ར་ཡོད་རུང་ དེ་བཟུམ་གྱི་དཀའ་ངལ་འདི་ཐོན་ནི་ཨིནམ་མ་ཚད། ཚོང་འབྲེལ་དོན་ལས་ དངུལ་ཁང་ཚུ་བརྒྱུད་དེ་ ཕྱི་ལས་སྐྱིན་འགྲུལ་ལེན་ནི་འདི་ འོས་འབབ་མེད་ཟེར་ཨིནམ་དང་ འདི་ཡང་ དངུལ་ཁང་ཚུ་གིས་ ཕྱི་ཡི་དངུལ་སྐྱིན་འགྲུལ་ལེན་ཞིནམ་ལས་ ང་བཅས་རའི་དངུལ་ནང་སྦེ་ སྐྱིན་འགྲུལ་བྱིན་ད་པ་ཅིན་ དངུལ་ཚབ་སྤྲོད་ནི་གི་ནང་ སྟབས་མ་བདེཝ་ཐོན་འོང་ཟེར་ཨིན་མས།

འབྲུག་ལུ་མི་སྡེའི་བརྡ་བརྒྱུད་ཀྱི་གནས་སྟངས།


འབྲུག་ལུ་དུས་ཡུན་ཐུང་ཀུ་ཅིག་གི་ནང་ བརྡ་དོན་འཕྲུལ་རིག་ཡར་རྒྱས་འགྱོ་བའི་ནམ་དུས་ལུ་ ཡོངས་འབྲེལ་གྱི་ཞབས་ཏོག་ལག་ལེན་འཐབ་དོ་ཡོད་མི་ མི་སྡེའི་ཡོངས་འབྲེལ་གདོན་དེབ་ཕེསི་བུག་ཟེར་མི་དེ་ ད་རེས་ནངས་པར་ ན་གཞོན་སློབ་ཕྲུག་ཚུ་ལས་འགོ་བཙུགས་ ཆེ་མཐོ་ཚུན་ག་ར་གིས་ལག་ལེན་འཐབ་དོ་ཡོད་རུང་། རང་སོའི་སྐོར་ལས་བརྡ་དོན་བཙུགས་དགོཔ་ཡོད་མི་ཚུ་ དེ་ནང་ཉེན་སྲུང་དང་ལྡནམ་སྦེ་མིན་འདུག་ཟེར་ ཞིབ་འཚོལ་སྙན་ཞུ་ཅིག་ནངལུ་བཀོད་ནུག།
imagesགདོང་དེབ་འདི་གིས་ མི་མང་གི་དོན་ལུ་མ་ཤེསཔ་ལྷབ་ནི་དང་ རང་གི་ཤེས་མི་དང་སྦྱང་བ་ཡོད་མི་དེ་ གཞན་ལུ་གོ་བརྡ་སྤེལ་ནི་དང་། ཆུང་ཀུ་བསྒང་གི་ཆ་རོགས་དང་བརྩེ་གདུང་དག་སྣང་ལྷག་པར་བསྐྱེད་ནི། དེ་ལས་ཆ་རོགས་གསརཔ་ཕྱད་ནི་ཐབས་ལམ་བཟང་པོ་ཅིག་ཨིན་པས།ཨིན་རུང་ཡོངས་འབྲེལ་ཞབས་ཏོག་དེ་ལག་ལེན་འཐབ་པའི་སྐབས་ལུ་ ན་གཞོན་མང་ཤོས་ཅིག་གིས་ སྔོན་མ་ལས་ངོ་ཤེས་འདྲིས་ཤེས་མེད་མི་ཚུ་དང་གཅིག་ཁར་ ཆ་རོགས་བཟོ་དོ་ཡོདཔ་ལས་ སྒེར་གྱི་བརྡ་དོན་ཚུ་ ཉེན་སྲུང་མེདཔ་འགྱོ་མི་དེ་ཡང་ གནད་དོན་དེ་ལས་བརྟེན་ཏེ་ཨིན་པས།

ཡོང་འབྲེལ་ཨིན་ཊར་ནེཊ་ཚུ་ནང་ལས་ བརྡ་དོན་འཚོལ་ཞིབ་དང་ བརྡ་དོན་འཕྲུལ་རིག་ཚུ་ལུ་བརྟེན་པའི་ འཛམ་གླིང་གི་གནས་སྟངས་ག་དེ་སྦེ་འགྱུར་བ་འགྱོ་དོ་ཡོདཔ་ཨིན་ན་ཚུ་གི་སྐོར་ལས་འཇམ་ཏོང་ཏོ་སྦེ་ཤེས་ཚུགས་རུང་ དེ་དང་བསྟུན་པའི་མ་དགོ་པའི་རིག་པ་ཚུ་ཡང་སྦྱང་ཚུགསཔ་ཨིན་པས།
བརྡ་བརྒྱུད་དེ་ཚུ་གི་ཐོག་ལས་ མི་མང་ལུ་ བརྡ་དོན་གནས་ཚུལ་འདྲ་མིན་སྣ་ཚོགས་ཁྱབ་སྤེལ་འབདཝ་བཞིན་དུ་ འདི་དང་གཅིག་ཁར་ བརྡ་བརྒྱུདཔ་ལ་ལུ་ཅིག་གིས་ ཕྱོགས་གཅིག་གི་ གནས་ཚུལ་གསལ་བཀོད་འབད་མི་དེ་གིས་ མི་སྡེའི་ནང་ སྟབས་མ་བདེཝ་བཟོ་བ་གིས་མ་ཚད་ ལ་ལུ་ཅིག་ལུ་མ་ཉེས་ཁ་གཡོགས་བཀལ་བའི་ལོ་རྒྱུས་ཐོན་པའི་ཤུལ་ལུ་ ལ་ལུ་ཅིག་གིས་ མི་སྡེའི་བརྡ་བརྒྱུད་དེ་ གཞུང་ལས་དམ་འཛིན་ག་ནི་ཡང་མེད་པར་ ལག་ལེན་འཐབ་བཅུག་མི་གིས་ མི་སྡེའི་ནང་ལས་ཡང་དམིགས་བསལ་དུ་ ན་གཞོན་ཚུ་ལུ་ངན་བསྐུལ་འབད་བའི་སྐོར་ གསལ་བཀོད་འབད་ཡོད་རུང་། འབྲུག་གི་རྩ་ཁྲིམས་ཆེན་མོ་ནང་ལུ་ འབྲུག་པའི་མི་སེར་ཅིག་ལུ་ཁ་སླབ་དང་ བསམ་འཆར་གསལ་སྟོན་འབད་ནི་གི་ཐོབ་དབང་ཡོད་རུང་། དེ་དང་བསྟུན་པའི་འགན་ཁུར་ཡང་འབག་དགོཔ་ཁག་ཆེཝ་ཨིན་པས། ག་འཆརཔ་ཟེར་བ་ཅིན་ རང་སོའི་ཐོབ་དབང་གུ་ཁུངས་བཀལ་ཏེ་ གཞན་ལུ་སྐྱོན་བརྗོད་འབད་ནི་དང་ ཁ་གཏང་ནི་ མ་བདེན་པའི་ལོ་རྒྱུས་ཁྱབ་སྤེལ་འབད་ནི་འདི་ ཁྲིམས་འགལ་ཨིན་ཟེར་ཞུ་ནི།
ད་རེས་ནངས་པ་ མི་སྡེའི་བརྡ་བརྒྱུད་ཡོངས་གྲགས་ཅན་ཅིག་ཨིན་མི་ བྷུ་ཊཱན་ནོ་མིགསི་དང་ ཕེསི་བུག སོ་ཤཱལ་ཌེ་མོ་ཀེ་རེ་སི་ ཨཔ་འབྲུག་པ་ལ་གི་ཡོངས་འབྲེལ་ཚུ་ནང་ སྲིད་དོན་ཚོགས་པ་ཅིག་ལུ་ དམའ་ཕབ་དང་ སྲིད་ཚོགས་གཞན་མི་དེ་ལུ་ བསྟོད་པ་རྐྱབ་པའི་གནས་སྟངས་འདི་ འགྲོས་ཀྱིས་སྦེ་ཡལ་དོ་ཡོད་རུང་ གཞན་གནད་དོན་གསརཔ་འཐོན་སྲིད་ནི་ཨིན་པས། སྤྱིར་བཏང་ཡོངས་འབྲེལ་ལུ་བརྟེན་ཏེ་ འབད་དགོ་པའི་ལཱ་ཚུ་འབད་མ་ཚུགས་པ་ དུས་ཡུན་མང་ཤོས་ཅིག་ དེ་ལུ་ཡེངས་ཏེ་དུས་ཚོད་རྫོགས་དོ་ཡོདཔ་ལས་ འཚམས་ཤེསན་མཁས་པའི་རྟགས་ཟེར་སླབ་དོ་བཟུམ་སྦེ་ རང་གི་སྤྱོད་ལམ་རང་གིས་བལྟ་དགོཔ་དེ་ཁག་ཆེ་བས་ཟེར་ཞུ་ནི་ཨིན།

ཅང་ང་ཇི་ཇིའི་སྡོད་ཁྱིམ་ཐོབ་ལམ་དྭངས་གསལ་མེདཔ།


རྒྱལ་ས་ཐིམ་ཕུག་ལུ་ མི་རློབས་འཕྱེལ་མི་འདི་གིས་ སྡོད་ཁྱིམ་མ་ཐོབ་པའི་དཀའ་ངལ་སེལ་ཐབས་དང་ གཞུང་གཡོགཔ་གོ་གནས་ཆུང་ཤོས་དང་ འོང་འབབ་ཆུང་རིམ་ཚུའི་མཐའ་དོན་ལུ་ རྒྱལ་ས་ཐིམ་ཕུག་ལྕང་ཇི་ཇི་ལུ་ སྡོད་ཁྱིམ་ཚུ་རྐྱབ་ཡོདཔ་ཨིན། ཨིན་རུང་ འདི་ནང་ལུ་སྡོད་མི་མང་ཤོས་ཅིག་རང་ གཞུང་གཡོགཔ་གོ་གནས་སྦོམ་ཚུ་དང་ འོང་འབབ་སྦོམ་སྦེ་ཐོབ་མི་ཚུ་སྡོད་དོ་ཡོདཔ་ཨིན་མས།གཞན་དལ་གཞི་ ལྕང་ཇི་ཇི་གི་སྡོད་ཁྱིམ་ཚུ་ ཕོ་མོ་གཉིས་རུབ་སྟེ་ སྡེ་རིམ་༨ པའི་དངུལ་ཕོག་ཐོབ་མི་ཚུ་ལུ་རྐྱངམ་ཅིག་ཐོབ་ཚུགས་ནི་ཨིན་མས།
དེ་ཚུ་ཡང་ག་དེ་སྦེ་ཧ་གོ་ཚུགསཔ་ཨིན་ན་ཟེར་བ་ཅིན་
༡ ལྕང་ཇི་ཇི་སྡོད་ཁྱིམ་གྱི་སྣུམ་འཁོར་བཞག་སའི་ས་ཁོངས་ནང་ ཨ་རྟག་རང་ གོང་ཚད་མཐོ་བའི་སྣུམ་འཁོར་ཚུ་བཞགཔ་ཨིན་པས།
༢ ལྕང་ཇི་ཇི་གི་སྡོད་ཁྱིམ་ནང་སྡོད་མི་ཚུ་གིས་ ཁང་གླ་མཐོ་སུ་ཅིག་སྦེ་ གཞན་མི་ལུ་སྡོད་བཅུག་དོ་ཡོདཔ་ཨིན་མས།༣ སྡོད་ཁྱིམ་ཚུ་ནང་ སྤྱི་ལོ་༢༠༠༣ ལས་ ཕོ་མོ་བཟང་ཚང་གཉིས་བསྡོམས་ཏེ་ སྡེ་རིམ་༨ པའི་དངུལ་ཕོགས་ཐོབ་མི་ཚུ་ལུ་གོ་སྐབས་གནང་ཡོད་རུང་   ཁོང་གི་འོང་འབབ་འདི་ ཧེ་མ་སྡོད་པའི་སྐབས་དང་ ད་ལྟོ་གི་བར་ན་ ཡར་སེང་སོང་ཡོདཔ་ལས་ སྡོད་ཁྱིམ་སྤོ་དགོཔ་བཟུམ་ཅིག་ཡོདཔ་ཨིན་མས།
༤  ལ་ལུ་ཅིག་ བློན་པོ་ཚུ་དང་ཆེ་མཐོའི་འགོ་དཔོན་ཚུ་གི་བཀའ་ཤོག་གནང་སྟེ་སྡོད་ཁྱིམ་ཚུ་ཐོབ་ཡོདཔ་ཨིན་མས།
༥ ངོ་ཤེས་འདྲིས་ཤེས་ཡོད་མི་ཚུ་ལུ་ གོ་སྐབས་དང་པ་ཐོབ་དོ་ཡོདཔ།

༦ ལས་འཛིན་གྱི་ལས་བྱེདཔ་ཚུ་ལུ་ཐོབ་ལམ་མེདཔ།

གོང་གི་གནད་ དོན་ཚུའི་ཐོག་ལུ་ རྒྱལ་ཡོངས་ཁྱོམ་བཟོ་གོང་འཕེལ་ལས་འཛིན་གྱི་ ཞིབ་དཔྱད་འབད་ཡོད་རུང་ གྲུབ་འབྲས་དེ་ཨིན་ཟེརཝ་ཅིག་མེདཔ་ལས་ འདི་ནང་ལུ་སྡོད་ནི་ཐོབ་མི་ཚུ་སེམས་དགའ་སྟེ་འབད་རུང་ གོ་སྐབས་མ་ཐོབ་མི་ཚུ་དབུགས་གམ་སྟེ་དེ་སྦེ་རང་སྡོད་དགོ་ནི་ཨིན་རུང་ རྒྱལ་ཡོངས་ཁྱིམ་བཟོ་གོང་འཕེལ་ལས་འཛིན་གྱི་ འཛིན་སྐྱོང་ལམ་ལུགས་ལེགས་བཅོས་འབད་དགོཔ་འདི་ དུས་ཚོད་ཕྱིསན་མ་གཏོགས་མི་ཧག་ནི་ཨིན་པས།

 

 

ཁྱིམ་གྱི་རབ་གནས་འབད་དགོཔ།


ད་རིས་ནངས་ པ་འབྲུག་ལུ་ དཔལ་འབྱོར་གྱི་གནས་སྟངས་ཡར་རྒྱས་འགྱོ་བའི་ནམ་དུས་ལུ་ རྒྱལ་ས་ཐིམ་ཕུག་ལུ་ གསར་སྒྲུབ་འབད་མི་སྡོད་ཁྱིམ་ལ་ལུ་ཅིག་གི་ཇོ་བདག་གིས་ དང་པ་མ་དངུལ་ཐོབ་ནིའི་རེ་འདོད་དང་ གཉིས་པ་རང་གི་སྔར་སྲོལ་ལམ་ལུགས་ལུ་ཡིད་ཆེས་མེད་པར་ ཁྱིམ་གྲུབ་ཚརཝ་ཅིག་ ལྷབ་བསངས་ཅིག་ར་མ་གཏང་པར་ འཕྲང་ཕྲ་ར་ ཁང་གླ་སྡོད་མི་བཙུགས་མི་འདི་གིས་ ཡུདཔ་ཅིག་ལས་ཁང་གླ་སྡོད་མི་ཚུ་ལུ་ ན་ཚ་དང་ཤི་ཆད་བྱུང་དོ་ཡོདཔ་ག་ར་གིས་མཁྱེན་གསལ་ཆེ། རྒྱུ་མཚན་དེ་ལུ་ཁྱིམ་གསརཔོ་བསྒྲུབས་ཅིག་ འདྲེ་སྲིན་ཚུ་གིས་མ་དབང་པའི་སྔོན་མ་ལས་ རང་གི་འབྱོར་པ་དང་འཁྲིལ་ཏེ་ རབ་གནས་རྒྱས་བསྡུས་འབྲིང་གསུམ་འབད་ཚུགས་པ་ཅིན་ ཁྱིམ་གྱི་ཇོ་བདག་དང་ ཁང་གླ་ནང་བཞུགས་མི་ག་ར་ལུ་ བྱ་བ་ལམ་འགྲོས་ལེགས་ཤོམ་འབྱུང་འོང་།

གོ་གནས་དང་བསྟུན་བཀབ་ནེའི་བཅའ་ཁྲིམས་དགོཔ།


ཞབས་དྲུང་རིན་པོ་ཆེའི་ལམ་སྟོན་དང་ སྡེ་སྲིད་དབུ་མཛད་ཆེན་མོའི་ཐུགས་རྣམ་པར་བཀྲ་བའི་ཕྱག་ཤུལ་ལུ་ སྡེ་སྲིད་དང་ལྷན་རྒྱས་ཚུ་ གཞུང་གྲྭ་ཚང་ནང་ལས་བསྐོས་སྲོལ་ཡོད་ནི་འདི་གིས་ ན་བཟའི་ཐོབ་ལམ་ཚུ་ ཆོས་ཀྱི་ཁ་ཐུག་ལས་རིགས་བསྒྲེས་ཏེ་བཟོ་ཡོད་རུང་ བར་སྐབས་ཅིག་ལས་  དཔའ་རྟགས་དང་ བཀབ་ནེ་ཚུ་ དྲགོས་ཀྱི་གོ་གནས་ཐོབ་པའི་སྐབས་ལུ་རྐྱངམ་གཅིག་ ལག་ལེན་འཐབ་ཆོགཔ་མ་ཚད་ འདི་བཟུམ་ལག་ལེན་འཐབ་མི་ གྱངས་ཁ་ཆོདཔ་ཅིག་ལས་བརྒལ་མེད་པའི་ཁར་ གོ་གནས་ཅན་ཚུ་ལུ་ མི་མང་ལས་གུས་ཞབས་དང་ བརྩི་མཐོང་སྦོམ་ཡོདཔ་ཨིན་པས། དེ་མ་ཚད་ གཞུང་འབྲེལ་གྱི་ཐོག་ལས་འབད་བ་ཅིན་ གོ་གནས་ཀྱི་མིང་དང་སྦྲགས་ཏེ་ངོ་རྐྱང་གི་མིང་ དཔྱེ་འབད་བ་ཅིན་ སྤུ་ན་གཉེར་ཆེན་ཤར་སྤྲུགས། དར་དཀར་དཔོན་སློབ་རྡོ་དཔྱལཝ། གཞུང་མགྲོན་གཉེར་སྤོབ་ཐལ། ཐིམ་ཕུག་རྫོང་དཔོན་ཀུན་བཟང་འཕྲིན་ལས་ཟེར་ཞུ་སྲོལ་ཡོདཔ་ཨིན་རུང་ ཕྱི་ཁར་མཇལ་བ་ཅིན་ གུས་ཞབས་ཀྱི་དོན་ལུ་དྲགོས་ཟེར་ཞུ་རུང་སྐྱོན་མེདཔ་ཨིན་པས། ཨིན་རུང་ད་རིས་ནངས་པ་ཡར་རྒྱས་འགྱོ་བའི་ བསྒང་ཡོད་མི་ འབྲུག་བཟུམ་མའི་ རྒྱལ་ཁབ་ནང་ གོ་གནས་དང་མིང་གཏམ་བ་ཁག་ཆེཝ་སྦེ་འགན་ཁུར་འབག་དགོཔ་ཨིན་པས།
གཅིག་ལས་ལྟ་བ་ཅིན་ གོ་ས་གོ་གནས་དང་ བཀབ་ནེ་ཐོབ་ལམ་གྱི་སྐོར་ལས་ཚ་གྱང་ལང་དགོཔ་ཅིག་མེད་རུང་ སྲིད་ཀྱི་ལམ་ལུགས་འགོ་བཙུགས་ཞིནམ་ལས་ ལོ་ངོ་༥གི་བར་ན་ཚར་རེ་བཙག་འཐུ་འབདཝ་ད་ ཡུདཔ་ཅིག་ལས་འབྲུག་ལུ་ བཀབ་ནེ་ལི་ཝང་དང་ཧོནམོ་བཀབ་མི་དང་ དཀརཔོ་བཀབ་མི་ཧ་ལམ་འདྲན་འདྲ་འགྱོ་ནི་ཨིནམ་མ་ཚད་ བརྩི་མཐོང་ཡང་ཆུང་ཀུ་འཚམས་ཅིག་སྦེ་ལུས་ནི་ཨིན་པས།
ཨིན་རུང་ཕྱོགས་གཅིག་ལས་མནོ་བསམ་གཏང་པ་ཅིན་ འབྲུག་རྒྱལ་ཁབ་འདི་ དམངས་གཙོའི་རིང་ལུགས་ནང་ སྤྱི་ཚོགས་ཀྱི་ འཐུས་མི་ཚུ་ལུ་ གནས་ཡུན་ལོ་༥ གི་དོན་ལས་ བཀབ་ནེ་ཧོནམ་དང་ དཔའ་རྟགས་གནང་མི་དེ་ རྒྱལ་ཁབ་དང་ མི་སེར་གྱི་མཐའ་དོན་ལུ་ འགན་ཁུར་ཐེབས་འབག་དགོཔ་ཡོད་པའི་ ངོས་འཛིན་ལུ་ཨིན་མས། དེ་འབདཝ་ད་ལོ་ངོ་༥་གི་གནས་ཡུན་ཚང་ཞིནམ་ལས་ ལོག་བཙག་འཐུ་གྲུབ་ན་མ་གཏོགས་ དེ་མིན་ བཀབ་ནེ་དང་དཔའ་རྟགས་ཚུ་ འཕྲོ་མཐུད་དེ་ ལག་ལེན་འཐབ་ནི་གི་ འོས་འབབ་མེདཔ་བཞིན་དུ་ འཐུས་མི་བགྲེསཔ་ཚུ་གིས་ཡང་ ལག་ལེན་མི་ནི་མ་རུངམ་ཅིག་ཨིན་རུང་ གཞུང་ལས་བཅའ་ཁྲིམས་ཅིག་མེད་ནི་འདི་གིས་ བློན་པོ་བགྲེསཔ་དང་ དྲགོས་བགྲེསཔ་ བློ་གྲོས་ཚོགས་སྡེའི་ འཐུས་མི་བགྲེསཔ་ དྲང་དཔོན་བགྲེསཔ་ རྫོང་རབ་བགྲེསཔ་ཚུ་གིས་ སྔར་ག་ཨིནམ་སྦེ་ བཀབ་ནེ་ཚུ་ བཀབ་མི་ལུ་བརྟེན་ གོ་གནས་ཐོག་ཡོད་མི་དང་ དགོངས་ཞུ་འབད་ཚར་མི་ཚུ་ ངོ་ཕྱེ་མ་ཚུགས་པར་ ལཱ་ཁག་བཏངམ་ཨིན་མས།
འདི་འབདཝ་ལས་ རབ་བྱུང་པ་ཅིན་ བཀབ་ནེ་བཀབ་ཆོག་མི་ཆོག་གི་ ལམ་ལུགས་གཅིག་མཚུངས་བཟོ་དགོཔ་དུས་ཚོད་རན་ཆི་ནུག།

 

གཞུང་སྒྲ་དར་ཁྱབ་ལུ་རེ་འདོད་བསྐྱེད་མི།


ཡོངས་གྲགས་ལུ་ཨཔ་ཟློ་དཔལ་ཟེར་སླབ་ཨིན་རུང་ མིང་ངོ་མ་ཟླཝ་དཔལ་འབྱོར་ཟེར་མི་འདི་ རྫོང་ཁག་སྤུངས་ཐང་ཁ་ རྒེད་འོག་རྟ་ལོག་ སྐྱེས་གཡུས་རྟ་ལོག་ལས་ཨིན་པས། ཁོ་ར་ན་ཚོད་ཆུང་ཀུ་སྦེ་སྡོད་པའི་བསྒང་ལས་ ནང་པའི་ཆོས་ལུ་དད་འདོད་ཅི་དང་མ་འདྲཝ་ཅིག་ཡོད་ནི་འདི་གིས་ ཕམ་སྤུན་ཆ་ཚུ་གིས་ཡང་ གཞུང་དགེ་འདུན་གྲྭ་ཚང་ནང་མཚན་འཛིན་བཀོད་ཏེ་ དགེ་སློང་ནང་ལུ་བཙུགས་ནུག དེ་བསྒང་སྣུམ་འཁོར་ལམ་མེད་པའི་སྐབས་ལུ་  རྟ་ལོགཔ་ཚུ་གིས་ སྤུངས་ཐང་ཁ་མོ་ཆུ་ཕར་ཁ་ལས་ ཡུ་མགུ་བརྒྱུད་དེ་འགྱོ་དགོཔ་ལས་ ཨཔ་ཟླ་དཔལ་གྱིས་ཆ་རོགས་ཚུ་དང་ཅིག་ཁར་ཁུར་ཆ་ཐེག་ཙག་འབག་སྟེ་འགྱོ་བའི་སྐབས་ལུ་ སྒྲ་སྙན་དཀྲོག་ནི་ལུ་སག་ལངས་ཏེ་ ངལ་མ་འཚོ་རུང་འུ་སྡུགཔ་ཡང་མ་ཚོར་བར་ རྟ་ལོག་ལུ་ལྷོདཔ་ཅིག་ ཚར་ངེར་བཏོན་ཏེ་ སྤང་དཀར་པོ་ལུ་སོང་ཞིན་ན་ མཚམས་ཀརྨ་ལས་སྒྲ་སྙན་ཞུ་སྟེ་ མཚམས་ཁང་གི་སྟེང་གུ་  ནམ་ཕྱིས་ཕྱིས་ར་སྒྲ་སྙན་ལྷབ་སྟེ་སྡོད་དོ་ཡོདཔ་ཨིན་པས། དེ་ལས་སྤུངས་ཐིམ་དགེ་འདུན་གྲྭ་ཚང་ནང་ ལོ་ངོ་མང་རབས་ཅིག་སྒྲིག་རྒྱུགས་ཏེ་སྡོད་རུང་ སྔོན་གྱི་ལས་དང་འཕྲལ་གྱི་རྐྱེན་ལུ་བརྟེན་ སྐྱེས་ལོ་༢༣ལུ་ དགེ་སློང་ནང་ལས་དགོངསམ་ཞུས་ཏེ་ སྤ་རོ་འབུམ་བྲག་ལུ་ དཀྱིལ་འཁོར་སློབ་དཔོན་གྱི་ཞབས་སར་བཅར་ཏེ་ དཀྱིལ་འཁོར་དང་ལྷ་བྲིས་ཀྱི་སློབ་སྦྱོང་འབད་སྡོད་ནུག དེ་ལས་བར་སྐབས་ཅིག་ལས་ རྒྱལ་ཡུམ་སྐུ་བགྲེས་ཨ་ཞེ་སྐལ་བཟང་གིས་འགོ་འདྲེན་མཛད་དེ་ ལྷ་བྲིསཔ་སྡེ་ཚན་ཅིག་ཡོད་མི་ཚུ་གི་སློབ་དཔོན་སྦེ་ ལོ་ངོ་༡༡ལྷག་ཅིག་ཕྱག་ཞུ་བའི་སྐབས་ལུ་ གོངམ་ལུ་ཞབས་ཏོག་དང་ ཁོ་རང་དང་འདྲ་མཉམ་ལུ་ཕྱག་བཞག་བརྩེ་གདུང་ཆེདྲགས་ ཞབས་ཁྲ་འཐེན་ཏེ་མི་མང་སྤྲོ་བ་བྱུང་བཅུག་མི་ཡོངས་གྲགས་ཅན་ཅིག་ཨིན་པས།mmexport1455468835593

སྤྱིར་བཏང་མཐོང་བ་རྒྱུད་པའི་ལག་ལེན་དང་ལྷག་པར་དུ་ གཞུང་སྒྲ་འཐེན་ནི་ལུ་དང་འདོད་ཅན་ཅིག་ཨིནམ་མ་ཚད་ སྙན་ཆ་སྒྲ་སྙན། པྱི་ཝང་། གླིངམ་འཕུ་ནི་ཚུ་ཁུངས་དག་ཏོག་ཏོ་སྦེ་ཤེསཔ་ཨིན་པས། སྤྱི་ལོ་༡༩༩༩ལུ་ རྒྱལ་ཁབ་འདིའི་སྐྱབས་མགོན། མགུ་གཏད་ཀྱི་གོང་མ། བཀའ་དྲིན་ཅན་གྱི་བདག་ཉིད། དྲིན་ཅན་གྱི་ཕ་མ། དཔལ་མི་དབང་འབྲུག་རྒྱལ་༤པ་དཔལ་འཇིགས་མེད་སེང་གེ་དབང་ཕྱུག་མཆོག་གིས་ཆབ་སྲིད་བསྐྱངས་ཏེ་ མི་ལོ་༢༥འཁོར་བའི་དུས་སྟོན་ལུ་ མི་དབང་ཞབས་ལས་ རྒྱལ་ཁབ་ནང་གཞུང་སྒྲ་དར་ཁྱབ་བཏང་མི་ ཨཔ་ཟླ་དཔལ་ལུ་ འབྲུག་ཐུགས་སྲས་ཀྱི་རྟགས་མ་གནང་ཡི། hdImg_e3f3714bbc2fff5baec7494396c5f393ཨཔ་ཟླ་དཔལ་ཁོ་ར་ ལོ་དང་ན་ཚོད་གཞོནམ་སྦེ་སྡོད་པའི་བསྒང་ལས་ རྟ་ལོག་ལུ་འཆམ་རྐྱབ་མིའི་གྲས་ཁར་འཛུལ་ཏེ་ ལོ་ངོ་མང་རབས་ཅིག་གི་རིང་ཅི་ལྕོགས་གང་ལྕོགས་སྦེ་ཕྱག་ཞུ་བའི་ཤུལ་ལུ་ འཆམ་དཔོན་སྦེ་ལོ་ངོ་མང་རབས་ཅིག་ཕྱག་ཞུ་ཡོད་པའི་ཁར་ རྟ་ལོག་གི་ཞབས་ཁྲ་མིང་ཅན་ཚུ་ ཚིག་དང་གདངས་མི་ཉམས་རྒྱུན་སྐྱོང་དང་ དར་ཁྱབ་གཏང་ཐབས་ལུ་བློས་ཕོག་ཡིད་ཕོག་གི་སྒོ་ལས་ ཞབས་ཁྲའི་སྤྱི་ཁྱབ་སྦེ་ཕྱུག་ཞུ་ཡོད་པའི་གྲུབ་འབྲས་ ད་རེས་ཁོ་ར་དགོངམ་ཞུས་ཏེ་འབད་རུང་ རྟ་ལོག་གི་ཞབས་ཁྲ་ཚུ་སྔར་ལས་དར་ཞིང་རྒྱས་ཏེ་ཡོད་མི་འདི་ ཁོའི་ལམ་སྟོན་དང་ཨུ་ཚུགས་ལུ་བརྟེན་ཏེ་ཨིན་པས།ཨཔ་ཟླ་དཔལ་གྱིས་སྦེ་བ་ཅིན་ ཁོའི་མི་ཚེའི་རིང་ལུ་ ག་དེམ་ཅིག་སྦེ་ཁ་དབང་ཁ་ཤུགས་དང་དབང་ཚད་ཡོད་མི་ཅིག་ཨིན་པ་ཅིན་ ཞབས་ཁྲ་དང་གཞུང་སྒྲ་འབོད་སྒྲ་ལྷབ་ས་ལྟེ་བཅིག་གཞི་བཙུགས་འབད་ཞིནམ་ལས་ ན་གཞོན་བུ་དང་བུམོ་ཚུ་ལུ་སློབ་སྟོན་མ་བཏུབ་བཏུབ་སྦེ་བྱིན་ཏེ་ རང་ལུགས་འབྲུག་པའི་ཞབས་ཁྲ་འདི་ ད་ལྟོ་བ་ལྷགཔ་སྦེ་ཡར་རྒྱས་གཏང་སྟེ་ མ་འོང་ཡུན་རིང་གནས་ཐབས་ལུ་གཙོ་བོར་བཏོན་ད་པ་ཅིན་ ཤི་རུང་འབུང་ཆོད་ནི་ཨིན་པས་ཟེར་མིག་ལྟེམ་ལྟེམ་གང་སྟེ་བཤདཔ་ཨིན་པས།
གནམ་ལོ་ཤིང་ཕོ་སྟག་ལོ་ རང་ཟླ་༣པའི་ཚེས་༡༥ སྤྱི་ཚེས་༡༤་༥་༢༠༡༤རེས་གཟའ་ཕུརབ་ དྲོ་པ་ཆུ་ཚོད་༡༡ལུ་ འབྲུག་རྒྱང་བསྒྲགས་ལས་འཛིན་གྱི་ཡིག་ཚང་ནང་སྦེ་ ཨ་ཞང་ཟླ་དཔལ་ཁོ་རང་གིས་དངོས་སུ་གསུངས་མི་འདི་ འགྱུར་བཅོས་ག་ནེ་ཡང་མེད་པར་ ང་གིས་ཡིག་ཐོག་ལུ་བཀོད་བཀོདཔ་ཨིན་ནོ།

 

 

སྔར་སྲོལ་བདག་འཛིན་འཐབ་དགོཔ།


རྒྱལ་ཁབ་ཡར་རྒྱས་ཀྱི་འགྱུར་བ་དང་བསྟུན་ འབྲུག་པའི་ན་གཞོན་ཚུ་གིས་ ཕྱིའི་རྒྱལ་ཁབ་ཀྱི་ཁ་སྐད་དང་ལམ་སྲོལ་ལུ་ དང་འདོད་བསྐྱེད་མི་ལོ་གཅིག་བ་ལོ་གཅིག་ཡར་འཕར་འགྱོ་བཞིན་ཡོད་མི་དེ་ཚ་གྱང་ལང་དགོ་པའི་གཞི་ཅིག་ཨིན་མས། དེ་ཡང་ག་འཆརཔ་ཟེར་བ་ཅིན་ ད་རེས་ནངས་པ་ན་གཞོན་ཚུ་གིས་མ་ཚད་པ་ ཐ་ན་རྒན་ཤོས་ཚུ་གིས་ཡང་ ཕྱི་རྒྱལ་ཁབ་ཀྱི་ཁ་སྐད་དང་ལམ་སྲོལ་ཚུ་ལུ་ བརྩི་མཐོང་སྦོམ་སྦེ་ར་བསྐྱེད་སར་མཐོངམ་མས། ང་བཅས་རའི་ དཔལ་ལྡན་འབྲུག་པའི་རྒྱལ་ཁབ་ཀྱི་ལམ་སྲོལ་བཟང་པོ་དེ་ སྒྲིང་སྒྲིང་སྦེ་བདག་འཛིན་འཐབ་མ་ཚུགས་པ་ཅིན་ འབྲུག་གི་ངོ་རྟགས་འབྱང་ནིའི་ཉེན་ཁ་སྦོམ་ཡོདཔ་ཨིནམ་ག་ར་གིས་མཁྱེན་སར་ཨིན། དེ་འབད་ནི་འདི་གིས་ འབྲུག་མི་རེ་རེ་བཞིན་དུ་གིས་ ལམ་སྲོལ་བདག་འཛིན་འཐབ་ནི་ལུ་  བརྩོན་ཤུགས་བསྐྱེད་དགོ་པའི་ཁར་ འགན་འཁྲི་འབག་དགོ་པའི་དུས་ཚོད་མ་རན་ག་ཟེར་མནོཝ་མས།
རྒྱལ་ས་ཐིམ་ཕུག་ལུ་གཞི་བཙུགས་འབད་དེ་ཡོད་མི་ གྲོང་གསེབ་ཤེས་ཡོན་གཞི་ཚོགས་ཀྱིས་   འབྲུག་གི་སྐད་ཡིག་དང་ལམ་སྲོལ་ཉམས་སྲུང་འབད་ནིའི་དོན་ལུ་ སྤྱི་ལོ་༢༠༡༥ལུ་ ཐིམ་ཕུག་སྡེབ་སྲིད་ སྐད་ཡིག་དང་ལམ་སྲོལ་སློབ་གྲྭའི་སློབ་ཕྲུག་ཚུ་ལུ་ སློབ་གཉེར་གྲོགས་རམ་བྱིན་མི་དེ་  གནད་དོན་སྦོམ་ཡོདཔ་ཨིན་པས། གཞི་ཚོགས་ཀྱིས་ འབྲུག་གི་སྐད་ཡིག་དང་ལམ་སྲོལ་ཉམས་སྲུང་འབད་ནིའི་དོན་ལུ་ མ་དངུལ་མེད་དེ་འབད་རུང་ ཐབས་ཤེས་སྣ་ཚོགས་ཀྱི་ཐོག་ལས་ མ་དངུལ་འཚོལ་ཏེ་ སློབ་ཕྲུག་ཚུ་ལུ་ སློབ་གཉེར་གྲོགས་རམ་བྱིན་མི་དེ་ལུ་ ཡིད་ཆེས་ངལ་རངས་ཡོད་པའི་ཁར་ མིག་དཔེ་བཟང་པོ་ཅིག་ཨིན་མས། ག་ཅི་སྦེ་ཟེར་བ་ཅིན་ ད་ལྟོ་ཚུན་ གཞུང་དང་སྒེར་གྱི་ཐོག་ལས་ སློབ་གཉེར་གྲོགས་རམ་བྱིན་མི་ཚུ་ ཆ་མཉམ་ར་ ཕྱི་ཆོས་ཀྱི་དོན་རྐྱངམ་ཅིག་མ་གཏོགས་ ང་བཅས་རའི་སྐད་ཡིག་དང་ལམ་སྲོལ་   ཉམས་སྲུང་འབད་ནིའི་དོན་ལུ་ དེ་སྦེ་བྱིན་མི་མ་ཐོནམ་ཨིན་པས། སློབ་གཉེར་གྲོགས་རམ་གྱི་ མ་དངུལ་རྒྱབ་སྐྱོར་དེ་ཡང་ ཨེ་མི་རི་ཀ་ལུ་ཡོད་མི་ མོ་ཌིསི་གཞི་ཚོགས་ཀྱིས་འབད་ཡོདཔ་བཞིན་དུ་ གཞི་ཚོགས་དེ་གིས་སློབ་གཉེར་གྲོགས་རམ་འབད་མི་དེ་ ལྷོ་ཨེ་ཤི་ཡ་ལུང་ཕྱོགས་ནང་འགོ་དང་པ་ཨིན་མས། གྲོང་གསེབ་ཤེས་ཡོན་གཞི་ཚོགས་ཀྱིས་འབད་བ་ཅིན་ ད་རེས་ནངས་པ་ རང་གི་སྐད་ཡིག་དང་ལམ་སྲོལ་ལུ་ དང་འདོད་བསྐྱེད་མི་ལེ་ཤ་མེདཔ་ལས་བརྟེན་ སློབ་ཕྲུག་ཨ་ལུ་ཚུ་གིས་ སྤྲོ་བ་བསྐྱེད་བཅུག་ནིའི་དོན་ལུ་དང་ ལྷག་པར་དུ་ ན་གཞོན་ག་ར་ལུ་ཤེས་ཡོན་སྤྲོད་དགོ་ཟེར་མི་ ཤེས་རིག་གི་དམིགས་ཡུལ་འགྲུབ་ཐབས་ལུ་ཨིན་མས། གཞི་ཚོགས་ཀྱིས་ སློབ་གཉེར་གྲོགས་རམ་གྱི་དོན་ལུ་ ཕམ་ཡ་བྲལ་སོང་མིའི་ ཨ་ལུ་ཚུ་དང་ ཟད་འགྲོ་གཏང་མ་ཚུགས་མི་ ཕམ་ཉམ་ཚུ་གི་ ཨ་ལུ་ཚུ་ གདམ་འཐུ་འབད་ནི་ཨིན་པའི་ ཁྱད་ཚད་བཟོ་ཡོད་མི་དེ་ཡང་ ཐབས་བྱུས་དྲག་ཤོས་ཅིག་ཨིན་པས།
གཞི་ཚོགས་ཀྱིས་ ད་ལྟོ་ཚུན་ སློབ་ཕྲུག་ཚུ་ལུ་ ཤེས་རིག་གི་ རྒྱབ་སྐྱོར་འབད་བའི་ཁར་ རྒྱ་གར་དང་ འབྲུག་རྒྱལ་ཁབ་ནང་འཁོད་ཀྱི་ མཐོ་རིམ་སློབ་གྲྭ་ཚུ་ནང་ ཤེས་ཡོན་སྦྱང་མི་སློབ་ཕྲུག་ཚུ་ལུ་སློབ་གཉེར་གྲོགས་རམ་འབད་དེ་ཡོདཔ་ཨིན། ད་ལས་ཕར་སྒེར་གྱི་གཞི་ཚོགས་གཞན་ཚུ་གིས་འབད་རུང་ ང་བཅས་རའི་ རྒྱལ་ཡོངས་སྐད་ཡིག་དང་ལམ་སྲོལ་ མི་ཉམས་གོང་འཕེལ་གཏང་ནིའི་དོན་ལུ་ སློབ་གཉེར་གྱི་གྲོགས་རམ་ཚུ་བྱིན་པ་ཅིན་ ཉམ་ཆུང་ལུ་ཕན་ཐོགས་འབྱུང་ནི་རྐྱངམ་ཅིག་མིན་པ་ སྔར་སྲོལ་ལམ་ལུགས་བདག་འཛིན་འཐབ་ནི་ལུ་ ཐབས་ལམ་དྲག་ཤོས་ཅིག་ཨིནམ་ལས་ གཞུང་མིན་ལས་སྡེ་དང་སྦྱིན་བདག་འབྱོར་པ་ཅན་ཚུ་གི་མཁྱེན་ཚུགས་ནིའི་དོན་ལུ་    བརྡ་བརྒྱུད་ནང་དར་ཁྱབ་གཏང་དགོཔ་ཁག་ཆེ་བས་ཟེར་ཞུ་ནི་ཨིན།

ཞིབ་འཚོལ་འབད་ཐངས།


འཛམ་གླིང་རྒྱལ་ཁབ་ནང་ ཞིབ་འཇུགཔ་མང་ཤོས་ཅིག་གིས་ གནད་དོན་ག་ཅིའི་སྐོར་ལས་ཨིན་རུང་ ཞིབ་འཚོལ་གྱི་གཞི་རྟེན་རྒྱབ་ཁུངས་ ཨིང་སྐད་ནང་ལས་བཏོན་དོ་ཡོདཔ་ཨིན་རུང་ ལ་ལུ་ཅིག་གིས་ རང་སོའི་རྒྱལ་ཡོངས་སྐད་ཡིག་གི་ཐོག་ལས་ ཞིབ་འཚོལ་འབད་མི་ཡང་ཡོདཔ་ཨིན་པས།
འབྲུག་རྒྱལ་ཁབ་ནང་ལུ་ དང་ཕུ་འབད་བ་ཅིན་ ཞིབ་འཚོལ་གྱི་རྒྱབ་རྟེན་ ཆོས་འབྱུང་། རྒྱལ་རབས། རྣམ་ཐར་ཚུ་ཨིན་རུང་ བར་སྐབས་ཅིག་ལས་ མཁས་མཆོག་ཚུ་གིས་ གཞི་དེ་ཚུ་ལུ་བཞག་སྟེ་ ཞིབ་འཇུག་མཐིལ་ཕྱིན་འབད་དེ་རྩོམ་སྒྲིག་འབད་ཡོད་པའི་ཀི་དེབ་ཚུ་བཏོན་ནི་འགོ་བཙུགས་ནུག
བར་སྐབས་ཅིག་ལས་ འཛམ་གླིང་ནང་བརྡ་དོན་འཕྲུལ་རིགས་ཡར་རྒྱས་འགྱོ་བའི་དུས་དང་བསྟུན་ཏེ་ གནད་དོན་ག་ཅི་ར་འབད་རུང་ ཡོངས་འབྲེལ་གྱི་ཐོག་ལས་ཐོབ་ཚུགས་ནི་འདི་གིས་ ཞིབ་འཚོལ་གྱི་ཐབས་ལམ་འཇམ་ཤོས་ཨིན་པས། ཨིན་རུང་ཡོངས་འབྲེལ་མང་ཤོས་ར་ ཨིང་སྐད་ནང་བཟོ་སྟེ་ཡོད་ནི་འདི་གིས་ ཨིང་སྐད་ཀྱི་ཤེས་ཡོན་མེད་མི་ཚུ་གིས་ གནད་དོན་ཆ་ཚང་སྦེ་ཧ་མ་གོ་མ་ཚུགས་པར་ ཞིབ་འཚོལ་འབད་ནི་ལུ་དཀའ་ངལ་བྱུངམ་ཨིན་པས། གཞན་དལ་གཞིར་ ཡོངས་འབྲེལ་ནང་ལུ་ རྒྱལ་ཡོངས་སྐད་ཡིག་ཐོག་ལས་ གནད་དོན་ག་ཅི་ར་འབད་རུང་འཐོབ་ཚུགས་པའི་ཐབས་ལམ་ཅིག་བཏོན་ཚུགས་པ་ཅིན་ དང་པ་ཨིང་སྐད་ཀྱི་ཤེས་ཡོན་མེད་མི་ཚུ་གིས་ ཞིབ་འཚོལ་འབད་ནི་ལུ་དཀའ་ངལ་མི་འབྱུང་ནི་དང་། གཉིས་པ་རྒྱལ་ཁམས་ཀྱི་ཆོས་དང་ལམ་སྲོལ་དང་འབྲེལ་བའི་གནད་དོན་ཚུ་ གནད་དོན་མ་འཛོལ་བར་ གོ་བརྡ་འཕྲོད་ཚུགས་ནི། གསུམ་པ་རྒྱལ་ཡོངས་སྐད་ཡིག་སྐད་ཡིག་གོང་འཕེལ་དང་ དར་ཁྱབ་གཏང་ཚུགས་པའི་ཐབས་ལམ་དྲག་ཤོས་ཅིག་ཨིན་པས། ཨིང་སྐད་ཀྱི་ཡོངས་འབྲེལ་མང་ཤོས་ནང་ར་ འབྲུག་དང་འབྲེལ་བའི་གནད་དོན་རེ་རེ་གཉིས་གཉིས་ རྫོང་ཁའི་མིང་ཚིག་ཨིང་སྐད་ནང་ལུ་ཕྱི་འགྱུར་སྦེ་ཚུད་དེ་ཡོད་ནི་འདི་གིས་ གོ་བ་འཛོལ་ཏེ་ལེན་ནིའི་ཉེན་ཁ་སྦོམ་འདུག
ད་ལྟོའི་གནས་སྟངས་ལུ་ལྟཝ་ད་ རྫོང་ཁའི་ཡོངས་འབྲེལ་དག་པ་ཅིག་བཟོ་སྟེ་ཡོད་མི་ཚུའི་ནང་ ཐུགས་འཆར་བཀོད་མི་གངམ་མ་ཐོན་མི་འདི་ གནད་དོན་ག་ཅི་ལས་བརྟེན་ཏེ་ཨིན་ན་ཧ་གོ་མ་ཚུགས་ཟེར་ཞུ་ནི་ཨིན།

མི་སེར་དང་ཕྱད་ནིའི་ལས་རིམ་འདི་མཐར་འཁྱོལ་བྱུང་ནུག་ག


གཞུང་གིས་ སྤྱི་ལོ་༢༠༡༣ ཟླ་༨ པའི་ནང་ འགོ་བཙུགས་མི་ མི་སེར་ཚུ་དང་གཅིག་ཁར་ འཕྱད་ནི་གི་ལས་རིམ་དེ་ གཙོ་བོ་ར་མི་སེར་ཉམས་ཆུང་མགུ་འཐོན་མ་ཚུགས་མི་ཆ་ཁྱབ་ཀྱི་དོན་ལུ་ འཆར་གཞི་ལེགས་ཤོམ་ཅིག་ཨིནམ་སྦེ་གསལ་བཤད་གནང་ཡོདཔ་མ་ཚད་ མི་སེར་དམངས་གཙོ་ཚོགས་པ་གིས་ ཞལ་འཛོམས་ཐེངས་༨༢ འགོ་འདྲེན་འཐབ་ཡོད་མི་དེ་ནང་ མི་༡,༠༠༠ ལྷགཔ་ཅིག་ འོང་ཡོད་མི་ལས་ བརྒྱ་ཆ་༦༠ ལུ་ དཀའ་ངལ་སེལ་དགོཔ་ཡོད་མི་ལུ་བརྟེན་ འབྲེལ་ཡོད་ཡིག་ཚང་ཚུ་ལུ་ སེལ་གནང་དགོ་པའི་ ཡི་གུ་བཏང་ཡོདཔ་བཞིན་དུ་ བརྒྱ་ཆ་༤༠ དེ་ སྐྱིད་སྡུག་དང་འབྲེལ་བའི་ གནད་དོན་ཨིནམ་ལས་ ཐག་བཅད་མ་ཚུགས་པས། དེ་མ་ཚད་ མི་༡,༠༠༠ ལྷགཔ་ཅིག་དང་ ཕྱད་མིའི་ནང་ལས་༣༠༩ རྐྱངམ་གཅིག་ གཞུང་སྐྱོང་ཚོགས་པའི་ རྒྱབ་སྐྱོར་འབད་མི་ཚུ་འོང་ཡོདཔ་ཨིན་པས།
གནད་དོན་གཙོ་བོ་ར་ གཞུང་གིས་ མི་སེར་དང་འཕྱད་ནིའི་ལས་རིམ་འགོ་བཙུགས་མི་དེ་ གཙོ་བོ་ར་ མི་སེར་ཚུ་ལུ་ བློན་ཆེན་དང་ བློན་པོ་ཚུ་དང་ གོ་ཡངས་ཐོག་འབྲེལ་བ་འཐབ་ནི་གི་གོ་སྐབས་བྱིན་ནི་དང་ གཞུང་གི་མཛད་རིམ་ཚུ་གི་སྐོར་ བསམ་འཆར་བརྗེ་སོར་དང་ བསམ་ལན་འབད་ཐབས་ལུ་ཨིན་པས།
ཨིན་རུང་བར་སྐབས་ཅིག་ལས་ ལས་རིམ་འདི་བཤོལ་བཞག་ཡོདཔ་ལས་ མི་སེར་ལུ་ཕན་ཐོགས་འདུག་ཟེར་མི་ལུ་ཐེ་ཚོམ་ཆགས་པའི་གཞི་ཅིག་ཨིན་པས་ཟེར་ཞུ་ནི་ཨིན།།

 

ཐིམ་ཕུག་དང་བར་པའི་ས་གི་མགྱོགས་ལམ།


640px-Thimphu_from_the_south_080907ལོ་ངོ་མང་རབས་ཅིག་འཆར་གཞི་བརྩམས་པའི་ཤུལ་ལུ་ སྤྱི་ལོ་༡༩༩༩ ལུ་ ཐིམ་ཕུག་དང་བར་པའི་ས་གི་མགྱོགས་ལམ་གྲུབ་ཡོད་ནི་འདི་གིས་    སྣུམ་འཁོར་གཏང་ནི་ལུ་སྟབས་བདེ་ཏོག་ཏོ་སོང་ཡོད་རུང་ རེ་ཚེ་སྐབས་སྣུམ་འཁོར་ཤུགས་ཚད་བཀག་མ་ཚུགས་པར་ཐུག་རྐྱེན་བྱུང་མི་བཀག་ཐབས་ལུ་ སྣུམ་འཁོར་ཤུགས་ཚད་ཕབ་ནིའི་འབུར་བཏོན་བམ་པར་བཟོ་ཡོད་མི་འདི་   ཚན་རིག་དང་མཐུན་པའི་བཟོ་བཀོད་མེདཔ་ཨིན་པས། སྣུམ་འཁོར་བཏང་མི་ མང་ཤོས་ཅིག་གིས་ གཞུང་ལམ་བདའ་སྟེ་ སྣུམ་འཁོར་གཏང་ནི་དེ་ ཉེན་སྲུང་མིན་འདུག་ཟེར་ཨིནམ་ད་ ཧེ་མ་མགྱོགས་ལམ་སྦུག་བདའ་སྟེ་ ལྕགས་ཀྱི་རཝ་རྐྱབ་ཡོད་མི་དེ་ ཤུབས་བཀོག་བའི་ཤུལ་ལུ་ མི་ཚུ་གིས་ག་ལྷོད་སྦེ་ འཁོར་ལམ་སྐེདཔ་བཏོགས་འགྱོཝ་མས་ཟེར་ ལམ་རྐེད་པར་བཏོག་འགྱོ་ས་བཟོ་ཡོད་རུང་ མི་ཚུ་གིས་སྣང་མེད་སྦེ་ལམ་རྐེད་པར་བཏོགས་ཏེ་འགྱོ་ནི་འདི་གིས་ སྟབས་བདེ་ཏོག་ཏོ་མེད་པའི་སྐོར་ལས་ ལ་ལུ་ཅིག་གིས་འབྲེལ་ཡོད་དབང་འཛིན་ལུ་སྙན་ཞུ་ཕུལ་ཡོད་རུང་ ལམ་འགྲུལ་ཉེན་སྲུང་དང་ སྐྱེལ་འདྲེན་དབང་འཛིན་དང་ ཁྲོམ་སྡེའི་ འགོ་དཔོན་ཚུ་གིས་འཇམ་ཏོང་ཏོ་སྦེ་ལཱ་འབད་ནི་ལུ་ཁ་མི་བཟེད་དོ་ཡོདཔ་ཨིན་པས།

fly over

ཨིན་རུང་ཐིམ་ཕུག་ཁྲོམ་དཔོན་གྱིས་འབད་བ་ཅིན་ རྐང་འགྲུལ་པ་ཚུ་གིས་ ལམ་ལུགས་དང་མ་འཁྲིལ་བ་ཅིན་ ཉེས་བྱ་དངུལ་ཀྲམ་༡༠༠རེ་བཀལ་འོང་ཟེར་ཨིནམ་ད་ ཐིམ་ཕུག་དང་བར་པའི་སའི་མགྱོགས་ལམ་ ཀི་ལོ་མི་ཊར་༦འབད་མི་དེ་    མགྱོགས་ལམ་མེན་པར་ ཁྲོམ་སྡེའི་འཁོར་ལམ་བཀོད་ཁྲམ་ཨིན་ཟེར་ཨིན་པས། ད་རུང་རྒྱ་གར་གྱི་སྲིད་བློན་མཆོག་ རྒྱལ་ཁབ་ནང་གཟིགས་སྐོར་ལུ་མ་བྱོན་པའི་ཧེ་མར་ ལྕགས་ཀྱི་རཝ་ཤུབས་སྟེ་འབུར་བཏོན་བམ་པར་༡༡དང་ ཟེབ་ར་ཀོ་རསི་བཟོ་མི་དེ་ལུ་ དངུལ་ཀྲམ་ས་ཡ་༢དེ་ཅིག་གནས་ཡི་ཟེར་ཨིནམ་ད་ དེ་ཡང་ ལྷན་རྒྱས་གཞུང་ཚོགས་ཀྱི་ དྲུང་ཆེན་དང་ ཁྲོམ་སྡེ་ དེ་ལས་ སྐྱེལ་འདྲེན་དབང་འཛིན་དང་ སྣུམ་འཁོར་བརྡ་སྟོན་སྡེ་ཚན་ཚུ་གི་བར་ན་ ཞལ་འཛོམས་འཚོགས་པའི་ཤུལ་ལུ་ གྲོས་ཐག་བཅད་ཅི་ཟེར་ཨིན་པས། ཐིམ་ཕུག་བར་པའི་ས་གི་མགྱོགས་ལམ་བར་ན་ ལྕགས་ཀྱི་དྲྭ་མིག་གི་ར་བ་བཏོན་བཏང་མི་འདི་གིས་ སྣུམ་འཁོར་བཏང་མི་དང་ འགྲོ་འགྲུལ་འབད་མི་གཉིས་ཆ་ར་ལུ་ ཚ་གྱང་ལང་བཅུག་སྟེ་སྦེ་འདུག མགྱོགས་ལམ་འདི་གི་བར་ནའི་དྲྭ་མིག་ཚུ་ཡང་ སྤྱི་ལོ་༢༠༡༥་སྤྱི་ཟླ་༦་པའི་ནང་ལུ་ རྒྱ་གར་གྱི་སྲིད་བློན་ན་རེན་དར་མོ་དི་བྱོན་པའི་སྐབས་ བཏོན་བཏང་སྟེ་ཡོདཔ་ཨིན། བར་པའི་ས་གི་མགྱོགས་ལམ་བདའ་སྟེ་ སྣུམ་འཁོར་བཏང་མི་ཚུ་གིས་སླབ་མི་ནང་ མགྱོགས་ལམ་གྱི་བར་ན་ལུ་ རཝ་མེད་པའི་བསྒང་ལས་ མི་ཚུ་གིས་སྣུམ་འ་ཁོར་འགྱོ་སྡོད་པའི་བར་ན་རང་ ཧང་སྟོང་མར་ ལམ་སྐེདཔ་བཏོག་སྟེ་འོང་དོ་ཡོདཔ་ལས་ ཉེན་ཁ་ཆེ་བས་ཟེར་ཨིན་རུང་ ཐིམ་ཕུག་ཁྲོམ་དཔོན་ཀུན་ལེགས་རྡོ་རྗེ་གིས་སླབ་མི་ནང་ མགྱོགས་ལམ་བདའ་གི་ལྕགས་ཀྱི་ར་བ་འགོར་ནི་འདི་གིས་ ཧེང་སྐལ་ར་སྣུམ་འཁོར་ཐུག་རྐྱེན་འབྱུང་བཅུག་དོ་ཡོདཔ་ལས་བཏོན་བཏང་ཡི་ཟེར་ཨིན་མས།640px-Thimphu_from_the_south_080907

མི་ཚུ་གིས་སླབ་མི་ནང་ མགྱོགས་ལམ་འདི་བདའ་སྟེ་ ཁྲོམ་སྡེ་གི་ཁ་ཐུག་ལས་ མི་འགྱོ་སའི་ཟམ་བཟོ་བྱིན་རུང་བཏུབ་པས་ཟེར་ཨིན་མས། ཨིན་རུང་འདི་ལུ་ ཁྲོམ་དཔོན་ཀུན་ལེགས་རྡོ་རྗེ་གིས་སླབ་མི་ནང་ འཁོར་ལམ་གྱི་ལྟག་ལས་མི་འགྱོ་སའི་ཟམ་རྐྱབ་ནི་འདི་ ཟད་འགྲོ་འཕྲོ་བརླག་འགྱོ་དོ་ཡོདཔ་ལས་ འདི་བཟུམ་གྱི་མཐུན་རྐྱེན་འདི་ ལམ་འོག་ལུ་བཟོ་ནི་གི་འཆར་གཞི་ཡོད་ཟེར་ཨིན་རུང་ ལག་ལེན་འཐབ་ནི་ལུ་དུས་ཚོད་འགོར་འོང་ཟེར་ཨིན་པས།

ཤའི་ལས་འགུལ།


འབྲུག་རྒྱལ་ཁབ་འདི་ ཡར་རྒྱས་གོང་འཕེལ་མགྱོགས་དྲགས་སྦེ་འགྱོ་བའི་ནམ་དུས་ལུ་ གཞུང་གི་ཁ་ཐུག་ལས་ གོང་འཕེལ་གྱི་གཞི་རྟེན་མཐུན་རྐྱེན་གྱི་རིགས་ཚུ་ ས་གནས་མཐའ་དབུས་མེད་པར་གཞི་བཙུགས་གནང་སྟེ་ཡོདཔ་མ་ཚད། མི་སེར་ཚུ་རང་མགོ་རང་འདྲོང་གི་དོན་ལུ་ ཟ་ཆས་དང་སྐྱ་རྣམ་གྱི་རིགས་ཚུ་ ཕྱི་རྒྱལ་ཁབ་ལས་ནང་འདྲེན་འཐབ་མི་དགོ་པར་ རྒྱལ་ཁབ་ནང་འཁོད་ལས་ལང་ཚུགས་པའི་ཐབས་ལམ་ལེ་ཤ་ར་བཏོན་པའི་གྲས་ལས་ ལོ་ངོ་༥པའི་འཆར་གཞི་༡༡པའི་ནང་ ནང་འཁོད་ཀྱི་ཚོད་བསྲེའི་རིགས་ཚུ་ ག་དེ་མང་མ་ཚོང་འབྲེལ་འཐབ་ནིའི་གཙོ་རིམ་བཟུང་མི་དེ་ དུས་ཚོད་བསྟུན་པའི་འཆར་གཞི་གལ་ཅན་ཅིག་ཨིནམ་ལས་ སོ་ནམས་ལས་ཁུངས་ལུ་བཀའ་དྲིན་དགའ་ཚོར་ཞཝ་དགོཔ་ཨིན་པས།

རྒྱལ་ཁབ་ནང་འཁོད་ལུ་ཤའི་ལས་འགུལ་གཞི་བཙུགས་ཀྱི་གྲ་འགྲིག་འདི་ སྤྱིར་བཏང་ལུ་རྒྱལ་ཁབ་ཀྱི་མིང་དོན་དང་རྩ་ལས་མ་མཐུནམ་ཅིག་ཨིནམ་ལས་ རྒྱལ་ཁབ་གཞན་གྱིས་ཁ་གཏང་ནིའི་གཞི་རྐྱངམ་གཅིག་མིན་པར་ སྔོན་མ་ལས་ལོ་བསྟར་རང་ཟླ་༤དང་༥་པ་གཉིས་ལུ་ ཤ་བཀག་དམ་འབད་སྲོལ་ཡོད་མི་དང་ རྒྱལ་འགལ་འགྱོ་ནི་ཨིན་པས། གཙོ་བོ་ དམར་གསད་ཀྱི་ལཱ་ལུ་བརྟེན་ ཆོས་སྐྱོང་སྲུང་མ་དང་ གནས་བདག་གཞི་བདག་ཚུ་ཐུགས་ཁྲོས་ཏེ་ རྒྱལ་ཁབ་ནང་འབྱུང་བཞིའི་རྐྱེན་ངན་དང་ ནད་ཡམ་མུ་གེ་ ནང་འཁྲུགས་འབྱུང་ནི་གི་ཉེན་ཁ་སྦོམ་ཡོདཔ་ལས་ མི་སེར་རྣམ་རྟོག་ལངས་སེམས་འཁྲུལ་རུང་ འབད་ཐབས་ག་ནེ་ཡང་མེད་པར་ ད་རིས་ནངས་པ་མི་སྡེའི་བརྡ་བརྒྱུད་ནང་ རང་སོའི་བསམ་འཆར་བརྗེ་སོར་འབདཝ་ཨིན་པས།
དེ་སྦེ་མནོ་བསམ་བཏང་སྟེ་སྡོད་པའི་བར་ན་ མནོ་བའི་ཤིང་ཁར་བསམ་པའི་བྱ་འཁོར། ཟེར་དོ་བཟུམ་སྦེ་ གཞུང་གྲྭ་ཚང་དགེ་འདུན་དམངས་ཀྱིས་ ཤའི་ལས་འགུལ་གྱི་འཆར་གཞི་ཆ་མེད་གཏང་དགོ་པའི་རྒྱབ་ཁུངས་གསལ་རི་རི་སྦེ་གནང་ནི་འདི་གིས་ གཞུང་ཡང་ཐབས་ར་མེད་པར་ ཤ་གསད་ཁང་བཙུགས་ནི་མིན་པའི་སྒྲུབ་བྱེད་བཀོད་མི་ག་དེ་སྦེ་ར་ཨིན་རུང་ དོན་མཐརཐུག་ཤ་གསད་ཁང་མ་བཙུག་པ་ཅིན་ ནོར་སེམས་ཅན་མང་རབས་ཅིག་ ཚེ་མ་རྗོགསཔ་ལས་ལྗགས་མི་རྫོགས་ནི་དང་ མི་མང་ཤ་ཟ་སྟེ་རྣམ་སྨིན་མྱོང་མི་དགོ་པའི་ཕན་ཐོགས་སྦོམ་འབྱུང་ཚུགས་ནི་ཨིན་པས།

དེ་ལས་བརྟེན་གཞུང་གྲྭ་ཚང་འཕགས་པའི་དགེ་འདུན་གྱིས་ ཤའི་ལས་འགུལ་བཀག་ཆག་འབད་དགོ་པའི་གྲོས་འབུལ་ཅིག་གཞུང་ལུ་གནང་མི་དེ་ལུ་ཐུགས་བཞེད་ཐེབས་ཅིག་གནང་དགོཔ་འདུག་ཟེར་མནོཝ་མས། ད་རེས་སྤྱི་ཚོགས་༢པའི་ཚོགས་ཐེངས་༥པའི་ནང་ དྲི་བཀོད་ཀྱི་སྐབས་ལུ་ འཐུས་མི་ཚུ་གིས་གཅིག་ཤུལ་གཉིས་ཤུལ་སྦེ་ ཤའི་ལས་འགུལ་གྱི་སྐོར་ལས་དྲི་བ་བཀོད་རུང་ ནང་སྲིད་བློན་པོ་གིས་ དེའི་སྐོར་ལས་སོ་ནམས་ལྷན་ཁག་གི་འཆར་གཞི་བརྩམས་ཏེ་ཡོདཔ་མ་གཏོགས་ ལྷན་རྒྱས་གཞུང་ཚོགས་ནང་གསུང་གྲོས་གནང་གནངམ་མེད་པའི་ལོ་རྒྱུས་གསལ་ཞུ་འབད་མི་ལུ་ འཐུས་མི་ལ་ལུ་གིས་ དམངས་གཙོའི་གཞུང་གི་རིང་ལུགས་ལུ་ནང་ལུ་ དེ་བཟུམ་གྱི་ལས་འགུལ་གཞི་བཙུགས་ཀྱི་སྐོར་རྒྱུས་མེད་པའི་ལོ་རྒྱུས་ཞུ་མི་དེ་ལུ་ ཡིད་མ་ཆེས་བའི་ཁུངས་བཀལ་ཡོད་རུང་ སོ་ནམས་བློན་པོ་གིས་ རྒྱ་གར་ལས་ནང་འདྲེན་འབད་མི་ཤའི་རིགས་ཚུ་ གཙང་སྦྲ་དང་ལྡནམ་སྦེ་ལེགས་བཅོས་འབད་ནི་མ་གཏོགས་ སྲོག་གཅོད་ཀྱི་ལཱ་རྒྱལ་ཁབ་ནང་འཁོད་འབད་ནི་མིན་པའི་སྐོར་ལས་བདེན་ཁུངས་བཀལ་མི་དེ་བདེན་ཚོད་ག་དེ་སྦེ་འོང་ག་ཟེར་མནོཝ་མས། 

 

ཤ་ཟ་བའི་ཉེས་དམིགས།


མི་མང་ཤོས་ཀྱིས་ རང་ཤ་ཟ་དགོ་མནོ་སྟེ་ གཞན་ལུ་ཤ་འ་ནེ་ཅིག་འབག་ཤོག་ཟེར་ མཁོ་མངགས་འབད་མི་དེ་ལུ་ ཤ་ཟ་བའི་ཉེས་པ་རྐྱངམ་གཅིག་མ་གཏོགས་ སྲོག་གཅོད་ཀྱི་རྣམ་སྨིན་མྱོང་མི་དགོ་པའི་མནོ་བསམ་བཏང་མི་དེ་འཛོལ་བ་ཨིན་པས། གཞན་ལུ་རྒྱུད་སྐུལ་འབད་བའི་སྲོག་གཅོད་ཀྱི་ལས་འདི་ རང་གིས་ར་མྱོང་དགོཔ་མ་ཚད་ གཞན་ལུ་གསད་བཅུག་མི་དེ་ སྡིག་པའི་ལས་བགོ་བཤའ་རྐྱབ་སྟེ་ སྡུག་བསྔལ་མྱོང་དགོཔ་ཨིན་པས།

དེ་མ་ཚད་སྤྱིར་བཏང་ཤའི་ཆེད་དུ་ སེམས་ཅན་སྲོག་བཅད་མི་འདི་བ་ ཤ་ཟ་མི་འདི་ཉེས་པ་ཆེ་བའི་ཚུལ་  ལུང་ལས། གསོད་པོ་ནོར་ལ་སྲེད་པ་དག །བསྐལ་བ་འབུམ་དུ་འཚེད་པར་འགྱུར། །ཟ་པོ་ཤ་ལ་སྲེད་པ་དག །བསྐལ་པ་བྱེ་བར་འཚེད་པར་འགྱུར། །ཟེར་གསུངས་ཏེ་ཡོད་དོ་བཟུམ་སྦེ་ སེམས་ཅན་གསད་མི་འདི་ བསྐལ་པ་འབུམ་ཕྲག་གཅིག་གི་རིང་ལུ་ དམྱལ་བའི་བཙོ་སྲེག་གི་སྡུག་བསྔལ་མྱོང་དགོཔ་ད། ཤ་ཟ་མི་ཚུ་ དེ་ལས་ལོག་བལྟབ་ ཚར་བཅུ་ཐམ་གྱིས་ཡུན་རིངམ་སྦེ་བསྐལ་པ་བྱེ་བ་གཅིག་གི་རིང་ལུ་ བཙོ་སྲེག་གི་སྡུག་བསྔལ་མྱོང་དགོཔ་ཡོདཔ་ལས་ ལས་རྣམ་སྨིན་ལྕི་ཡང་གི་ཁྱད་པར་གསུངས་ཡོད་མི་འདི་གིས་ སེམས་ཅན་སྲོག་གཅད་མི་བ་ ཤ་ཟ་མི་ཉེས་པ་ཆེ་དྲགས་ཨིནམ་ཤུགས་ཀྱིས་ཧ་གོ་བས།

ཤ་ཟ་བའི་ཉེས་དམིགས་དང་སྤངས་པའི་ཕན་ཡོན། 

ཤ་ཟ་ནི་དེ་ ཐེག་ཆེན་ཕ་རོལ་ཏུ་ཕྱིན་པ་དང་།  གསང་སྔགས་ཀྱི་སྐབས་ལུ་ཁྱད་མེདཔ་སྦེ་རྩིས་མི་དེ་ ཐོས་པའི་ཤེས་རབ་ཉུང་པའི་སྐྱོན་ཨིན་མི་དེ་ཡང་ ལུང་ལས། གང་ཞིག་ཤ་ཁྲག་ལོངས་སྤྱོད་ནི། །ཁམས་གསུམ་ཕུང་བར་བྱེད་པའི་ཟས། །ཐར་པའི་སྲོག་རྩ་གཅོད་པའི་མཚོན། །བྱང་ཆུབ་ས་བོན་བསྲེག་པའི་མེ། །དལ་འབྱོར་མཐོ་རིས་འཇོམས་པའི་ཐོག །སུས་ཀྱང་ཟ་བར་མི་རུང་ན། །རྒྱལ་བའི་བསྟན་ལ་རབ་བཞུགས་པའི། །སྐྱབས་གསུམ་འཛིན་པའི་དགེ་བསྙེན་ནས། །དགེ་ཚུལ་དགེ་སློང་ཁྲུམས་ལྡན་པས། །བཟའ་བར་ནམ་ཡང་མ་གནང་ངོ་། །བྱང་ཆུབ་སེམས་དཔའི་ལམ་ཞུགས་པས། །ཕ་མར་གྱུར་པའི་སེམས་ཅན་ཤ །ཟོས་པའི་ཉེས་དམིགས་རྒྱ་ཆེར་འགྱུར།།ཟེར་སྔོན་བྱོན་རྒྱལ་བ་གོང་མ་ཚུ་གིས་ ཤ་ཁྲག་དུག་ཟས་བཟུམ་སྤངས་དགོཔ་སྦེ་གསུངས་ཏེ་ཡོད། ད་རེས་རིག་གསར་གྱི་ལམ་ལུགས་ལས་ཡང་ ཨེ་ཤི་ཡ་དང་ ཡུ་རོབ་ དེ་ལས་ ཨེ་མི་རེ་ཀ་རྒྱལ་ཁབ་ཀྱི་ གསོ་བའི་མཁས་མཆོག་ཚུ་གིས་འབད་རུང་ འཛམ་གླིང་ཚ་དྲོད་ཡར་འཕར་དང་ འབྱུང་བཞི་འཁྲུགས་པའི་རྐྱེན་ངན་ཚུ་མར་ཕབ་འབད་དགོ་པ་ཅིན་ ཤ་ཟ་ནི་སྤང་དགོ་པའི་སྐོར་ལས་ བརྡ་བརྒྱུད་ནང་ཁྱབ་བསྒྲགས་འབད་བཞིན་ཡོད། དེ་མ་ཚད་ཇ་པཱན་དང་ ཨིན་ཌོ་ནེ་ཤི་ཡ་ ཐའི་ལེནཌ་རྒྱལ་ཁབ་ཚུ་ནང་ རྒྱ་མཚོའི་རྦ་རླབས་ཀྱི་གནོད་པ་ལུ་བརྟེན་ མི་ས་ཡ་ལས་བཅད་དེ་ཤི་རྐྱེན་བྱུང་མི་ཚུ་ གཙོ་བོ་ར་ ཉམས་དགའ་བའི་ཞོར་ཁར་ ཆུ་ནང་གི་སྲོག་ཆགས་གྱངས་ཁ་མ་ཆོདཔ་ཅིག་ བསད་ཟ་བའི་རྣམ་སྨིན་གྱིས་ཨིནམ་སྦེ་ཡིད་ཆེས་བསྐྱེདཔ་ཨིན་པས།

མ་གཞི་དམ་པའི་ཆོས་ཟེར་མི་དེ་ སེམས་ཅན་ལུ་གནོདཔ་བཀལ་ནི་སྤང་མི་ཅིག་ཨིནམ་སྦེ སྟོན་པ་སངས་རྒྱས་ཀྱིས་གསུངས་པའི་ཚུལ་ བསྟན་བཅོས་བཞི་བརྒྱ་པ་ལས་ཡང་། མདོར་ན་ཆོས་ནི་མི་འཚེ་བ། །དེ་བཞིན་གཤེགས་པ་ཉིད་ཀྱིས་གསུངས། །ཟེར་ཡོདཔ་ཨིན། སེམས་ཅན་ལུ་སྡི་ཆེ་སྙིང་རྗེ་ག་ནི་ཡང་མེད་པར་ཤ་ཟ་བ་ཅིན་ ཆོས་ལྡན་རྒྱལ་ཁབ་ནང་སྐྱེས་རུང་ ནང་གི་སེམས་འདི་ གཅན་གཟན་སྟག་དང་གཟིག་ དེ་ལས་ཤ་ཟ་སྲིན་པོ་བཟུམ་ཨིནམ་སྦེ་ རྒྱུད་དགོངས་པ་ཟངས་ཐལ་ལས་ ཨོ་རྒྱན་རིན་པོ་ཆེ་གིས་གསུངས་ཏེ་ཡོད།

དེ་སྦེ་ཨིན་རུང་ ཤ་ནི་སྙིང་རྗེ་ཅན་གྱིས་ཟ། །ཆང་ནི་དམ་ཚིག་ཅན་གྱིས་འཐུང་། །ཟེར་གསུངས་མི་འདི་ དམིགས་པ་མེད་པའི་སྙིང་རྗེ་ཚུ་ རང་གི་སེམས་ལུ་བརྟན་པ་ཐོབ་པའི་ཁར་ ཤ་དང་ཆང་ཨིན་ཟེར་བའི་རྣམ་རྟོག་གི་འདུ་ཤེས་ནུབ་ཞིནམ་ལས་ བདུད་རྩིའི་ངོ་བོར་མཐོང་བའི་ཡེ་ཤེས་ཀྱི་རྟོགས་པ་རྒྱུད་ལུ་འཁྲུངས་ཡོད་པ་ཅིན་ ཤ་ཆང་ལུ་ལོངས་སྤྱོད་ཆོག་པའི་གནང་བ་སངས་རྒྱས་ཀྱིས་གནང་སྟེ་ཡོདཔ་ཨིན། ཤ་ཟ་ནི་སྤངས་དཔ་འདྲཝ་ཅིག་འབད་བ་ཅིན་ སྡོམ་པ་དང་ཚུལ་ཁྲིམས་ཡང་འདི་ཨིན་ཟེར་ སྤྱོད་འཇུག་ནང་ལུ་ ག་ནེ་བ་གསལ་ཏོག་ཏོ་སྦེ་གསུངས་ཏེ་ཡོདཔ་ཨིན་པས།

སེམས་ཅན་ལུ་གནོད་པ་སྤངས་བའི་དགེ་བ་ལུ་བརྟེན་ གནས་སྐབས་མཐོ་རིས་ལྷ་དང་མིའི་གོ་འཕང་དང་། མཐར་ཐུག་སངས་རྒྱས་ཀྱི་གོ་འཕང་ཡང་འཐོབ་ནི་ཡོད་པའི་ཁར་ ཐམས་ཅད་མཁྱེན་པའི་བྱང་ཆུབ་ཀྱི་ལམ་སྣ་ཡང་ཟིན་ཚུགསཔ་སྦེ་ རྗེ་བཙུན་མི་ལ་རས་པ་གིས། ཤ་ཁྲག་ཟས་སུ་མ་བཟའ་ན། །མཐོ་རིས་ཐར་པ་ཐོབ་པ་ཡིན། །འགྲོ་ལ་འཚེ་བ་སྤངས་པ་ན། །བྱང་ཆུབ་ལམ་སྣ་མྱུར་དུ་ཟིན། །ཟེར་གསུངས་ཡོདཔ་ལས་ ང་བཅས་ར་ག་ར་གིས་ ཤ་ཟ་བ་ཅིན་སྡིག་པ་ལྕི་དྲགས་དང་ ཤ་མ་ཟ་བ་ཅིན་ ཕན་པ་ཚད་མེདཔ་ཅིག་ཡོད་མི་ལུ་ཐུགས་བཞེད་གནང་སྟེ་ རབ་བྱུང་པ་ཅིན་ཤ་རྩ་ལས་ར་མི་བཞེས་ནིའི་དམ་བཅའ་དང་། འབྲིང་ཚེས་བཟང་དུས་བཟང་གི་སྐབས་ལུ་ཤ་སྤང་། དེ་མིན་རུང་ ག་དེ་ཉུང་ཉུ་སྦེ་བཞེས་ནི་གི་ཐབས་ལམ་བཏོན་གནང་ཟེར་ཞུ་ནི་ཨིན།

 

ལོ་བསྟར་བཞིན་དུ་རང་སྲོག་གཅད་མི་ཡར་འཕར་འགྱོ་དོ་ཡོདཔ།


ཁྲིམས་སྲུང་འགག་སྡེའི་ཐོ་བཀོད་དང་འཁྲིལ་བ་ཅིན་ འབྲུག་ལུ་སྤྱི་ལོ་༢༠༡༤ལོར་ མི་གྲངས་༨༤གིས་ རང་སྲོག་བཅད་ཡོད་མི་དང་ཕྱདཔ་ད་ སྤྱི་ལོ་༢༠༡༥སྤྱི་ཟླ་༡པ་ལས་ སྤྱི་ཟླ་༤པའི་ཚེས་༣༠ཚུན་ མི་གྲངས་༢༢ཀྱིས་ རང་སྲོག་བཅད་ཡོད་མི་འདི་ ཚ་གྱང་ཆེ་བའི་གཞི་ཅིག་ཨིན་པས།

མ་གཞི་རང་སྲོད་བཅད་དགོ་པའི་རྒྱུ་རྐྱེན་སོ་སོར་ཡོད་རུང་ ཁྱབ་ཆེ་ཤོས་ཅིག་ བཟའ་ཚང་གི་དཀའ་ངལ་དང་ ཕོ་མོའི་བར་ན་མ་འགྲིགཔ་ སྨྱོ་རྫས་ལས་བརྟེན་ཏེ་ཨིནམ་བཟུམ་ཅིག་ཨིན་པས།

ནང་པའི་ཆོས་ནང་ལས་ སྐྱེ་བའི་མཐའ་མར་ཤི་དགོཔ་དང་ ག་ཅི་ར་འབད་རུང་ ཚེ་སྔོན་མའི་ལས་ལུ་བརྟེན་ཏེ་བྱུང་དོ་ཡོདཔ་ལས་ དུས་ཚོད་ལུ་ལྷོད་པའི་ཚེ་ཟུར་ཐབས་མེད་པར་ མི་ཚེ་རྫོགས་དགོ་པའི་ཡིད་ཆེས་བསྐྱེདཔ་ཨིན་རུང་ ཚེ་ད་ལྟོའི་བར་རྐྱེན་ལུ་བརྟེན་ཏེ་ དེ་བཟུམ་གྱི་རྐྱེན་ངན་འབྱུངམ་སྲིད་ནི་ཨིན་པས།

ག་དེ་སྦེ་ར་ཨིན་རུང་ ཚེ་ད་ལྟོ་མི་ལུས་རིན་པོ་ཆེ་ཐོབ་པའི་སྐབས་ལུ་ ཕ་མ་སེམས་ཅན་ཐམས་ཅད་ཀྱི་དོན་ལུ་ གཞན་དོན་འགྲུབ་མ་ཚུགས་རུང་ རང་གི་བཟའ་ཚང་མཐའ་སྐྱོང་འབད་ཚུགསཔ་ཅིག་འབད་རུང་ དྲག་ནི་ཨིན་རུང་ དེ་མིན་པར་རང་སྲོག་གཅད་པ་ཅིན་ སྐྱེ་བ་ལྔ་བརྒྱ་རང་སྲོག་གཅད་དགོ་ཟེར་ཡིད་ཆེས་བསྐྱེདཔ་ཨིན་པས།

གནས་ཚུལ་ཐོབ་དབང་དཔྱད་ཡིག། ?


གོ་རྒྱུས་གོ་དོ་བཟུམ་ཨིན་པ་ཅིན་ འབྲུག་གི་གནས་ཚུལ་ཐོབ་དབང་གི་དཔྱད་ཡིག་ཟིན་བྲིས་དེ་ སྤྱི་ལོ་༢༠༠༦དེ་ཅིག་ལས་ བརྒྱུད་འབྲེལ་ལྷན་ཁག་ལུ་ཕུལ་ཏེ་ དབྱེ་ཞིབ་མ་བཏུབ་སྦེ་འབད་དེ་ ལོ་ངོ་མང་རབས་ཅིག་སོང་པའི་ཤུལ་ལུ་ སྤྱི་ལོ་༢༠༠༨ལུ་ དམངས་གཙོའི་གཞུང་དབུ་བརྙེས་ཞིནམ་ལས་ སྤྱི་ཚོགས་དང་པའི་ཚོགས་ཐེངས་༢པའི་ནང་ གྲོས་གཞིའི་གྲངས་སུ་ཕུལ་ཡོད་རུང་། གནད་དོན་ག་ཅི་ལས་བརྟེན་ཏེ་ཨིན་ན་མ་ཤེས་ འབྲུག་ཕུན་སུམ་ཚོགས་པའི་གཞུང་གི་སྐབས་ལུ་གསུང་གྲོས་གནང་མ་ཚུགས་རུང་ མི་སེར་དམངས་གཙོ་ཚོགས་པའི་གཞུང་གིས་ སྤྱི་ཚོགས་དང་པའི་ནང་ར་ གྲོས་གཞི་གཙོ་བོ་ཅིག་སྦེ་བཙུགས་ཡོད་རུང་ ལྡོག་ཕྱོགས་ཚོགས་པའི་ཁ་ཐུག་ལས་ རྩ་ཁྲིམས་ཆེན་མོའི་ནང་ འབྲུག་པའི་མི་སེར་ཡོངས་ལུ་ གནས་ཚུལ་ཐོབ་དབང་གི་རྩ་ཚན་ཅིག་བཀོད་དེ་ཡོདཔ་ལས་ ལོགས་སུ་སྦེ་བཅའ་ཁྲིམས་བཟོ་མི་དགོ་པའི་བསམ་འཆར་བཀོད་ཡོདཔ་མ་ཚད་ ག་དེམ་ཅིག་སྦེ་དགོ་རུང་ མི་མང་གི་བསམ་ལན་བསྡུ་ནིའི་དོན་ལུ་ ཤུལ་མའི་ཚོགས་བཞུགས་ནང་གསུང་གྲོས་གནང་ནི་སྦེ་ཆ་འཇོག་གྲུབ་ཨིན་པས། 
མ་གཞི་བློན་ཆེན་ཚེ་རིང་སྟོབས་རྒྱས་མཆོག་གིས་ སྲིད་བྱུས་ཟིན་བྲིས་དེ་ མི་མང་ལས་ བསམ་ལན་བསྡུ་ནིའི་དོན་ལུ་ མི་སྡེའི་བརྡ་བརྒྱུད་ཡོངས་འབྲེལ་ནང་བཙུགས་ནུག གཅིག་ལས་ལྟ་བ་ཅིན་ འབྲུག་མི་མང་ཤོས་ཀྱིས་ ཡོངས་འབྲེལ་ནང་ལྷག་ནིའི་གོ་སྐབས་མ་ཐོབ་མ་ཚད་ ལ་ལུ་ཅིག་གིས་ལྷག་ནིའི་རིག་རྩལ་མེདཔ་ལས་བརྟེན་ དངོས་སུ་སྦེ་རྒེད་འོག་གི་གནས་ཚད་ལས་མི་མང་གི་བསམ་འཆར་བསྡུ་ཚུགས་པ་ཅིན་ ལེགས་ཆ་ཆེ་ནི་ཨིན་རུང་ དེ་སྦེ་མ་མཛད་མི་དེ་ གནད་དོན་ག་ཅི་ལུ་བརྟེན་ཏེ་ཨིན་ན་ཧ་གོ་མ་ཚུགས།

གནས་ཚུལ་གྱི་ཐོབ་དབང་དཔྱད་ཡིག་འདི་ བཅའ་ཁྲིམས་སྦེ་ཆ་འཇོག་འགྲུབ་པ་ཅིན་ གཞུང་སྐྱོང་ནང་ མི་སེར་གྱིས་བཅའ་མར་དངོས་སུ་གཏོགས་མ་ཚུགས་རུང་ གནད་དོན་ཚུ་དྭངས་གསལ་ཅན་དང་ འགན་འཁྲི་ཅན་བཟོ་ནི་གི་ཕན་པ་ལེ་ཤ་ཡོདཔ་བཞིན་དུ་ གཞུང་གསརཔ་གིས་ བཙག་འཐུའི་བསྐུལ་བསྒྲགས་སྐབས་ བཅའ་ཁྲིམས་དེ་ལུ་ ངོས་ལེན་འབད་ནི་གི་ཁས་བླངས་འབད་ཡོདཔ་ཨིན།

དཔྱད་ཡིག་དེ་ལུ་བརྟེན་པའི་ ཕན་གནོད་ག་དེ་སྦེ་ར་འོང་ནི་ཨིན་རུང་ གནས་ཚུལ་གྱི་ ཐོབ་དབང་དཔྱད་ཡིག་ཟིན་བྲིས་བཀོད་དེ་ལོ་༧ གྱི་ཤུལ་ལས་ གཞུང་འབྲེལ་ཐོག་ གྲོས་བསྡུར་གནང་ས་མཐོངམ་ལས་ ག་དེ་སྦེ་ཨིན་ན་ཧ་གོ་མི་ཚུགས་པས། མ་གཞི་གནས་ཚུལ་ཐོབ་དབང་གི་བཅའ་ཁྲིམས་ཅིག་ཡོད་པ་ཅིན་ དེ་གིས་བརྡ་བརྒྱུད་རྐྱངམ་ཅིག་མིན་པར་ སྤྱིར་བཏང་མི་མང་གི་དོན་ལུ་དགོས་མཁོ་ཆེ་ཏོག་ཏོ་ཅིག་ཨིནམ་འདི་ ལོགས་སུ་སྦེ་ཁུངས་བཀལ་དགོཔ་མིན་ནུག།
ད་ལྟོའི་གནས་སྟངས་ལུ་ཆ་དཔག་པ་ཅིན་ བརྡ་བརྒྱུད་བཟུམ་ཅིག་ལུ་ཆ་བཞག་རུང་ ངན་ལྷད་ཀྱི་གནད་དོན་ཅིག་ནང་ གཞུང་སྐྱོང་གི་ཆེ་མཐོའི་གོ་གནས་འཆང་མི་ཅིག་འབྲེལ་བ་ཡོད་པ་ཅིན་ བརྡ་བརྒྱུདཔ་ཅིག་གིས་ གནས་ཚུལ་རྩོམ་སྒྲིག་འབད་ནི་ལུ་ མགོ་རྙོགས་དྲག་སྦེ་ གནད་དོན་དེ་འགོ་ལས་མཇུག་ཚུན་ཧིང་སངས་ས་སྦེ་ གནས་ཚུལ་བཏོན་ནི་འཇམ་ཏོང་ཏོ་མིན་ནུག། ག་དེམ་ཅི་སྦེ་གནས་ཚུལ་བཀྲམ་ད་པ་ཅིན་ དབང་ཚད་ཅན་དེ་གིས་ བརྡ་བརྒྱུད་ལས་ཁང་དེ་ལུ་ཧེད་བཏགས་འཚོལ་རུང་ རྒྱབ་གཏད་ཀྱི་བཅའ་ཁྲིམས་ཅིག་མེདཔ་ལས་བརྟེན་ མཇུག་ལུ་ཕམ་ཤོ་ར་གནས་ཚུལ་རྩོམ་སྒྲིགཔ་དེ་ཨིན་པས། གནད་དོན་གཞན་མི་ཡང་ གནས་ཚུལ་བསྡུ་ལེན་པ་ཅིག་གིས་ གནད་དོན་ཅིག་གི་སྐོར་ལས་ གཞུང་གི་ཆེ་མཐོའི་འགོ་དཔོན་ཅིག་ལུ་བརྡ་དོན་ལེན་རུང་ འགོ་དཔོན་དེ་གིས་ ལོ་རྒྱུས་སླབ་ནིའི་དང་འདོད་མེདཔ་ལས་ དགོ་པའི་བརྡ་དོན་ལུ་བྱིན་བ་ལྷགཔ་སྦེ་ བཞུ་མ་ཚུགས་པའི་གཏམ་སླབ་ནི་འདི་གིས་ ངན་ལྷད་དང་འབྲེལ་བའི་གནད་དོན་དེ་ མི་མང་གིས་མཁྱེན་མ་ཚུགསཔ་བཟུམ་ཅིག་ཨིན་པས། མ་གཞི་གནས་ཚུལ་ག་ཅི་ར་ཨིན་རུང་ ཆགས་སྡང་ཕྱོགས་རིའི་དབང་ལུ་མ་ཐལ་བར་ དྲང་བདེན་གྱི་གནས་ཚུལ་ཁྱབ་སྤེལ་འབད་དགོཔ་ཨིན་རུང་ དུམ་གྲ་རེ་ཕྱོགས་བཟུང་སྦེ་འགྱོ་དོ་ཡོད་མི་དེ་ཡང་ གནས་ཚུལ་གཅིག་ བརྡ་བརྒྱུད་སོའི་གནས་ཚུལ་ནང་ མ་འདྲཝ་སྦེ་ཐོན་མི་དེ་གིས་ཧ་གོ་ཚུགས་པས། དེ་འབད་ནི་འདི་གིས་ བཅའ་ཁྲིམས་ཅིག་ཡོད་པ་ཅིན་དེ་ཚུ་ཡང་གཅིག་མཚུངས་དང་ དྲང་བདེན་སྦེ་ཧ་གོ་ཚུགས་ནིའི་ཕན་པ་འདུག་ཟེར་ཞུ་ནི་ཨིན།

ལམ་འགྲུལ་གྱི་ཁྲིམས་ལུགས་གཟིགས་དགོཔ།


ee

ད་རིས་ནངས་པ་ རྒྱབ་ཁབ་ཡར་གོང་འཕེལ་དང་བསྟུན་ཏེ་ རྒྱབ་ཁབ་ནང་སྔོན་མ་དང་ཕྱདཔ་ད་ ད་རིས་ནངས་པ་སྣུམ་འཁོར་རྒྱགས་ཚད་ཡོད་པའི་ཁར་ དེའི་ནང་དོན་ཉིད་ལས་ཡང་ རྒྱལ་ས་ལྟེ་བ་ཐིམ་ཕུག་ལུ་ སྣུམ་འཁོར་རྒྱུན་འགྲུལ་འཐབ་མི་མང་ནི་འདི་གིས་ ཉིན་བསྟར་བཞིན་དུ་ སྣུམ་འཁོར་ཐུག་རྐྱེན་བྱུང་དོ་ཡོདཔ་ཨིན།

འདས་པའི་བདུན་ཕྲག་ནང་ འབྲུག་རྒྱལ་ཡོངས་དངུལ་ཁང་གི་འོག་ལས་ ཞབས་ཏོག་ལྷན་ཁག་ཁ་ཐུག་འགྱོ་སའི་ལམ་བདའ་སྟེ་ སྣུམ་འཁོར་བཞག་མ་ཆོག་པའི་བརྡ་བྱང་གསལ་ཏོག་ཏོ་སྦེ་ལྷོང་སྟེ་ཡོད་རུང་ སྣུམ་འཁོར་ཧའི་ལསི་ཅིག་བཞག་མི་འདི་གིས་ གཞུང་ལམ་བདའ་སྟེ་ སྣུམ་འཁོར་འོང་ཡོད་ག་མ་ལྟཝ་མ་ཚད་ གཞུང་ལམ་ནང་འཛུལ་དོ་ཟེར་བའི་བརྡ་མེ་མ་བཏེག་པར་ འཕྲལ་ཐུམ་ལུ་གཡས་ལྷོང་ལུ་ སྒྱིར་ཏེ་ གཞུང་ལམ་འཛུལ་མི་ལུ་བརྟེན་ གཞུང་ལམ་བདའ་སྟེ་འཕྲང་སྟེ་འོང་མི་ སྣུམ་འཁོར་ཀོ་ཀོ་ན་ཀར་གུ་བརྡུང་རུང་ ཁྲིམས་སྲུང་བརྡ་དོན་གྱི་ལམ་ལུགས་དང་འཁྲིལ་པ་ཅིན་ རྒྱབ་ལས་བརྡུང་མི་སྣུམ་འཁོར་འདི་ལུ་ཡང་ ཉེས་རྒྱ་ཕོགཔ་སྦེ་ཡོད་མི་འདིའི་ཐད་ ང་བཅས་ཀྱིས་བལྟ་བ་ཅིན་ བཞག་མ་ཆོག་པའི་ས་ཁོངས་ནང་ སྣུམ་འཁོར་བཞག་ནི་དང་ ཟུར་ཕྱོགས་གཞུང་ལམ་ནང་འཛུལཝ་ད་ རྒྱབ་ལས་སྣུམ་འཁོར་འོང་ག་མ་འོང་ག་ན་འཐན་བལྟ་དགོཔ་མ་ཚད་ བརྡ་མ་འབད་བ་འཕྲང་ཕྲ་འོང་མི་དེ་ལུ་ཉེས་རྒྱ་ཕོག་དགོཔ་ངེས་བདེན་མཐོངམ་མས།